Chhut Ai-ki̍p-kì 第 9 章 - 巴克禮全羅

1

Iâ-hô-hoa tùi Mô͘-se kóng, Lí jı̍p-khì kìⁿ Hoat-ló, kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Tio̍h chún Góa ê peh-sìⁿ khì, thang ho̍k-sāi Góa.

2

Lí nā m̄-khéng hō͘ in khì, iû-gôan bián-kióng lâu in,

3

khòaⁿ ah, Iâ-hô-hoa ê chhiú beh chhun tī lí chhân-nı̍h ê cheng-siⁿ, bé, lû, lo̍k-tô, gû-kûn, iûⁿ-kûn; beh ū tāng ê un-e̍k.

4

Iâ-hô-hoa beh hun-piat Í-sek-lia̍t ê cheng-siⁿ kap Ai-kı̍p ê cheng-siⁿ; hōan-nā sio̍k Í-sek-lia̍t lâng ê, bô sí chı̍t-chiah.

5

Iâ-hô-hoa chiū tiāⁿ-tio̍h sî-kî, kóng, Bîn-á-jı̍t Iâ-hô-hoa beh tī chit-ê tōe kiâⁿ chit-ê sū.

6

Keh-jı̍t Iâ-hô-hoa chiū kiâⁿ chit-ê sū; Ai-kı̍p ê cheng-siⁿ lóng-chóng sí; chóng-sī Í-sek-lia̍t lâng ê cheng-siⁿ lóng bô sí chı̍t-chiah.

7

Hoat-ló chhe lâng khì, khòaⁿ ah, Í-sek-lia̍t lâng ê cheng-siⁿ, liân chı̍t-chiah iā bô sí. Chóng-sī Hoat-ló ê sim kò͘-chip, m̄-chún peh-sìⁿ khì.

8

Iâ-hô-hoa tùi Mô͘-se, A-lûn kóng, Lín tio̍h put kúi-nā phóng lô͘-nı̍h ê hé-hu, Mô͘-se tio̍h tī Hoat-ló ê bīn-chêng ǹg-thiⁿ iā-khì;

9

beh tī Ai-kı̍p chôan-tōe pìⁿ-chòe tîn-ai; tī Ai-kı̍p chôan-tōe, tī lâng kap cheng-siⁿ ê seng-khu, lóng siⁿ lia̍p-á, chiâⁿ-chòe chhng.

10

In chiū put lô͘-nı̍h ê hé-hu, khiā tī Hoat-ló ê bīn-chêng; Mô͘-se ǹg-thiⁿ iā-khì, chiū tī lâng kap cheng-siⁿ ê seng-khu siⁿ lia̍p-á, chiâⁿ-chòe chhng.

11

Phok-sū in-ūi lia̍p-á tī Mô͘-se ê bīn-chêng khiā-bōe-tiâu; in-ūi phok-sū kap it-chhè Ai-kı̍p lâng ê seng-khu lóng ū hit-hō lia̍p-á.

12

Iâ-hô-hoa hō͘ Hoat-ló ê sim ngī, tì-kàu m̄-thiaⁿ in; tú-tú chiàu Iâ-hô-hoa tùi Mô͘-se só͘ kóng ê.

13

Iâ-hô-hoa tùi Mô͘-se kóng, Lí chheng-chá khí-lâi, khiā tī Hoat-ló ê bīn-chêng kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Tio̍h chún Góa ê peh-sìⁿ khì, hō͘ in thang ho̍k-sāi Góa.

14

In-ūi chit-chı̍t-pái Góa beh hō͘ Góa it-chhè ê chai-ē kàu tī lí ê sim, kap lí ê jîn-sîn, í-kı̍p lí ê peh-sìⁿ, hō͘ lí chai tī phó͘-thiⁿ-ē bô chı̍t-ê ōe pí-phēng Góa.

15

Góa nā chhun-chhiú, ēng un-e̍k kong-kek lí kap lí ê peh-sìⁿ, lí chiū í-keng bia̍t tī tōe-chiūⁿ;

16

chóng-sī Góa hō͘ lí khiā-chāi, sī tiâu-kò͘-ì beh ēng lí hián-bêng Góa ê tōa kôan-lêng, hō͘ Góa ê miâ pò-iông tī piàn-tōe-chiūⁿ.

17

Lí iáu-kú tùi Góa ê peh-sìⁿ chū-ko, m̄-chún in khì mah?

18

Khòaⁿ ah, bîn-á-jı̍t chiong-kūn chit-sî, Góa beh lo̍h tōa-pha̍uh, tùi Ai-kı̍p khai-kok í-lâi bē-bat ū án-ni.

19

Taⁿ lí tio̍h chhe lâng, chiong lí ê cheng-siⁿ kap lí chhân-nı̍h it-chhè só͘-ū-ê, pek in jı̍p-lâi; hōan-nā tī chhân-nı̍h, bô siu tò-lâi ke-nı̍h-ê, bô-lūn lâng kap cheng-siⁿ, pha̍uh beh lo̍h tī in ê sin-chiūⁿ, in chiū beh sí.

20

Hoat-ló jîn-sîn ê tiong-kan, kiaⁿ-ùi Iâ-hô-hoa ê ōe ê, chiū hō͘ i ê lô͘-po̍k kap cheng-siⁿ cháu jı̍p chhù-lāi;

21

chóng-sī hit-ê bô lia̍h Iâ-hô-hoa ê ōe chòe iàu-kín ê, chiū chiong i ê lô͘-po̍k kap cheng-siⁿ lâu tī chhân-nı̍h.

22

Iâ-hô-hoa tùi Mô͘-se kóng, Lí ǹg-thiⁿ chhun-chhiú, hō͘ pha̍uh lo̍h tī Ai-kı̍p ê piàn-tōe, phah lâng kap cheng-siⁿ, í-kı̍p chhân-nı̍h ê chhài-soe, thong Ai-kı̍p tōe lóng án-ni.

23

Mô͘-se ǹg-thiⁿ chhun-chhut i ê kóaiⁿ-á, Iâ-hô-hoa chiū khí-lûi lo̍h-pha̍uh, ū hé kiâⁿ tī tōe-bīn-chiūⁿ; Iâ-hô-hoa lo̍h-pha̍uh tī Ai-kı̍p tōe.

24

Tùi án-ni ū pha̍uh , iā ū hé chham tī pha̍uh ê lāi-bīn, chin lī-hāi; tùi Ai-kı̍p khai-kok í-lâi piàn-tōe bē bat ū án-ni.

25

Tī Ai-kı̍p piàn-tōe, kìⁿ-nā tī chhân-nı̍h-ê, bô-lūn lâng á-sī cheng-siⁿ, lóng hō͘ pha̍uh phah; pha̍uh iā phah chhân-nı̍h it-chhè ê chhài-soe, koh phah-chı̍h chhân-nı̍h it-chhè ê chhiū-ba̍k.

26

To̍k-to̍k tī Í-sek-lia̍t lâng só͘ tiàm ê Ko-san tōe bô lo̍h-pha̍uh.

27

Hoat-ló chhe lâng kiò Mô͘-se, A-lûn lâi, kā in kóng, Chit-chı̍t-pái góa ū hōan-chōe; Iâ-hô-hoa sī kong-gī, góa kap góa ê peh-sìⁿ sī pháiⁿ.

28

Taⁿ chiah-ê chhè-lûi kap pha̍uh í-keng kàu-gia̍h lah; kiû lín kî-tó Iâ-hô-hoa; góa chiū chún lín khì, m̄-bián koh tiàm chia.

29

Mô͘-se kā i kóng, Góa chı̍t-ē chhut-siâⁿ chiū beh ǹg Iâ-hô-hoa kia̍h-khí góa siang ki chhiú; lûi beh soah, pha̍uh iā bô koh lo̍h; hō͘ lí chai chôan-tōe lóng sio̍k tī Iâ-hô-hoa.

30

Chóng-sī lūn-kàu lí kap lí ê jîn-sîn, góa chai lín iáu sī bô kiaⁿ-ùi Iâ-hô-hoa Siōng-tè.

31

Hit-sî môa kap tōa-be̍h siū phah-pháiⁿ; in-ūi tōa-be̍h í-keng chhut-sūi, môa iā khui-hoe.

32

To̍k-to̍k sió-be̍h kap chho͘-be̍h bô siū phah-pháiⁿ; in-ūi iáu-bē tōa-châng.

33

Mô͘-se lī-khui Hoat-ló chhut-siâⁿ, kia̍h-khí siang-chhiú ǹg Iâ-hô-hoa, lûi kap pha̍uh chiū soah, hō͘ iā bô koh piàⁿ-lo̍h tōe.

34

Hoat-ló khòaⁿ-kìⁿ hō͘, pha̍uh, kap lûi lóng soah, chiū it-hoat hōan-chōe; i kap i ê jîn-sîn lóng ngī-sim.

35

Hoat-ló sim ngī, m̄-chún Í-sek-lia̍t lâng khì, tú-tú chiàu Iâ-hô-hoa thok Mô͘-se só͘ kóng ê.