Chhut Ai-ki̍p-kì 第 8 章 - 巴克禮全羅

1

Iâ-hô-hoa kā Mô͘-se kóng, Lí jı̍p-khì kìⁿ Hoat-ló, kā i kóng, Iâ-hô-hoa án-ni kóng, Chún Góa ê peh-sìⁿ khì, thang ho̍k-sāi Góa.

2

Lí nā m̄-chún in khì, khòaⁿ ah, Góa beh hō͘ chhân-kap-á phah-pháiⁿ lí ê kéng-lāi.

3

Hô beh siⁿ-thòaⁿ chhân-kap-á, in beh chiūⁿ-lâi jı̍p lí ê kiong-tiān, lí ê khùn-pâng, chiūⁿ lí ê bîn-chhn̂g, jı̍p lí ê jîn-sîn ê chhù, chiūⁿ lí ê peh-sìⁿ ê seng-khu, jı̍p lí ê chàu-khang, kap lí chhiau-mī ê khì-kū.

4

Koh beh chiūⁿ lí, kap lí ê peh-sìⁿ, í-kı̍p lí chèng jîn-sîn ê seng-khu.

5

Iâ-hô-hoa tùi Mô͘-se kóng, Lí kā A-lûn kóng, Lí ê chhiú kia̍h kóaiⁿ-á, chhun tī kang, hô, tî ê téng-bīn, hō͘ chhân-kap-á chiūⁿ-lâi Ai-kı̍p tōe.

6

A-lûn chiū chhun i ê chhiú tī Ai-kı̍p chiah-ê chúi ê téng-bīn; chhân-kap-á chiū chiūⁿ-lâi jia-khàm thong Ai-kı̍p tōe.

7

Phok-sū ēng in ê siâ-su̍t iā án-ni kiâⁿ, hō͘ chhân-kap-á chiūⁿ-lâi Ai-kı̍p tōe.

8

Hoat-ló kiò Mô͘-se, A-lûn kóng, Chhiáⁿ lín kiû Iâ-hô-hoa hō͘ chiah-ê chhân-kap-á lī-khui góa kap góa ê peh-sìⁿ; góa chiū chún chit-ê peh-sìⁿ khì thang chè-sū Iâ-hô-hoa.

9

Mô͘-se tùi Hoat-ló kóng, Góa chun-chhûn lí ê ì-sù; góa tio̍h ūi lí, kap lí ê jîn-sîn, í-kı̍p lí ê peh-sìⁿ, kî-kiû tī sím-mı̍h sî thang tû-bia̍t chhân-kap-á lī-khui lí, kap lí hiah-ê chhù, chí-ū lâu tī hô-nı̍h ah?

10

I kóng, Bîn-á-jı̍t. Kóng, Thang chiàu lí ê ōe; hō͘ lí chai góan ê Siōng-tè Iâ-hô-hoa bô chı̍t-ê ōe pí-phēng-tit.

11

Chhân-kap-á beh lī-khui lí kap lí hiah-ê chhù, kap lí ê jîn-sîn, í-kı̍p lí ê peh-sìⁿ, chí-ū lâu tī hô-nı̍h.

12

Mô͘-se, A-lûn lī-khui Hoat-ló chhut-khì; Mô͘-se ūi-tio̍h I só͘ chhe lâi hāi Hoat-ló ê chhân-kap-á kiû-kiò Iâ-hô-hoa.

13

Iâ-hô-hoa chiū chiàu Mô͘-se ê ōe lâi kiâⁿ; kìⁿ-nā tī chhù-lāi, īⁿ-tiong, chhân-nı̍h ê chhân-kap-á lóng sí.

14

Lâng khioh in kui-tui, piàn-tōe lóng chhàu-bī.

15

Hoat-ló khòaⁿ-kìⁿ tāi-chì ū khah-khoan, chiū ngī i ê sim, m̄-thiaⁿ in; tú-tú chiàu Iâ-hô-hoa só͘ kóng ê.

16

Iâ-hô-hoa tùi Mô͘-se kóng, Lí kā A-lûn kóng, Chhun-chhut lí ê kóaiⁿ-á, phah tōe-nı̍h ê thô͘-hún, hō͘ i tī Ai-kı̍p piàn-tōe pìⁿ-chòe sat-bú.

17

In chiū án-ni kiâⁿ; A-lûn kia̍h kóaiⁿ-á, chhun-chhiú phah tōe-nı̍h ê thô͘-hún, chiū tī lâng kap cheng-siⁿ ê seng-khu lóng ū sat-bú; tōe-nı̍h ê thô͘-hún tī Ai-kı̍p piàn-tōe lóng piàn-chòe sat-bú.

18

Phok-sū iā ēng in ê siâ-su̍t chiàu án-ni chòe, ài siⁿ-chhut sat-bú, chóng-sī bōe-ōe; án-ni tī lâng kap cheng-siⁿ ê seng-khu lóng ū sat-bú.

19

Phok-sū tùi Hoat-ló kóng, Che sī Siōng-tè ê chhiú-tōaⁿ; Hoat-ló ê sim ngī, m̄-thiaⁿ in; tú-tú chiàu Iâ-hô-hoa só͘ kóng ê.

20

Iâ-hô-hoa kā Mô͘-se kóng, Lí chheng-chá khí-lâi; khòaⁿ ah, Hoat-ló beh kàu chúi-piⁿ; lí khiā tī i ê bīn-thâu-chêng, kā i kóng, Iâ-hô-hoa án-ni kóng, Chún Góa ê peh-sìⁿ khì, thang ho̍k-sāi Góa.

21

Lí nā m̄-chún Góa ê peh-sìⁿ khì, Góa beh chhe kui-tīn ê hô͘-sîn kàu tī lí, kap lí ê jîn-sîn, í-kı̍p lí ê peh-sìⁿ, iā beh jı̍p lí hiah-ê chhù; koh Ai-kı̍p lâng ê chhù, kap in só͘ khiā-khí ê só͘-chāi, lóng beh ū kui-tīn ê hô͘-sîn móa-móa.

22

Tng hit-jı̍t, Góa beh hun-piat Góa ê peh-sìⁿ só͘ khiā-khí ê Ko-san tōe, tī-hia bô beh ū kui-tīn ê hô͘-sîn; thang hō͘ lí chai Góa tī thiⁿ-ē-tiong chòe Iâ-hô-hoa.

23

Góa beh hun-piat Góa ê peh-sìⁿ kap lí ê peh-sìⁿ; bîn-á-chài beh ū chit-ê sîn-jiah.

24

Iâ-hô-hoa án-ni kiâⁿ; chiū ū hô͘-sîn kui tōa-tīn lâi jı̍p Hoat-ló ê kiong-tiān kap i ê jîn-sîn ê chhù, kap Ai-kı̍p chôan-tōe; tōe in-ūi chit-ê kui-tīn ê hô͘-sîn siū pāi-hōai.

25

Hoat-ló kiò Mô͘-se, A-lûn lâi, kóng, Lín khì, tī chit-ê tōe chè-sū lín ê Siōng-tè.

26

Mô͘-se kóng, Án-ni kiâⁿ bô ha̍p-gî; in-ūi góan beh ēng Ai-kı̍p lâng só͘ iàm-ò͘ⁿ ê mı̍h chè-sū Iâ-hô-hoa, góan ê Siōng-tè; góan nā tī Ai-kı̍p lâng ê ba̍k-chiu-chêng, ēng in só͘ iàm-ò͘ⁿ ê mı̍h lâi hiàn-chè, in kiám bô beh ēng chio̍h-thâu tìm góan mah?

27

Góan beh khì khòng-iá, kiâⁿ saⁿ-jı̍t ê lō͘-chām, chè-sū góan ê Siōng-tè Iâ-hô-hoa, chiàu I só͘ beh hoan-hù góan.

28

Hoat-ló kóng, Góa beh chún lín khì, tī khòng-iá chè-sū Iâ-hô-hoa lín ê Siōng-tè; to̍k-to̍k m̄-thang khì hn̄g; lín tio̍h thòe góa kî-tó.

29

Mô͘-se kóng, Góa beh tùi lí chia chhut-khì iā beh kiû Iâ-hô-hoa hō͘ kui-tīn ê hô͘-sîn bîn-á-jı̍t lī-khui Hoat-ló, kap i ê jîn-sîn, í-kı̍p i ê peh-sìⁿ; chóng-sī Hoat-ló m̄-thang koh khúi-chà, m̄-chún peh-sìⁿ khì chè-sū Iâ-hô-hoa.

30

Mô͘-se chiū tùi Hoat-ló hia chhut-khì, kî-tó Iâ-hô-hoa.

31

Iâ-hô-hoa chiū chiàu Mô͘-se ê ōe kiâⁿ, hō͘ kui-tīn ê hô͘-sîn lī-khui Hoat-ló, kap i ê jîn-sîn, í-kı̍p i ê peh-sìⁿ; bô lâu chı̍t-chiah.

32

Chit-pái Hoat-ló koh ngī i ê sim, m̄-chún peh-sìⁿ khì.