I-se-kiat 第 1 章 - 巴克禮全羅

1

Tng saⁿ-cha̍p--nî, sì-ge̍h chhoe-gō͘, góa tī Ka-pa-ló͘ ê hô-piⁿ, siū-lia̍h ê lâng ê tiong-kan; hit-sî thiⁿ khui, góa khòaⁿ-kìⁿ Siōng-tè ê īⁿ-siōng.

2

Tī hit-ge̍h ê chhoe-gō͘, chiū-sī Iok-ngá-kun ông siū-lia̍h ê tē-gō͘ nî,

3

tī Ka-le̍k-tí lâng ê tōe, Ka-pa-ló͘ ê hô-piⁿ, Iâ-hô-hoa ê ōe tiâu-tî lîm-kàu Pò͘-se ê kiáⁿ, chè-si Í-se-kiat; tī-hia Iâ-hô-hoa ê chhiú hē tī i ê sin-chiūⁿ.

4

Góa khòaⁿ-kìⁿ, lí khòaⁿ, ū kông-hong tùi pak-hng lâi, ū tōa phiàn hûn, ū iām-iām-sih ê hé, i ê chiu-ûi ū kng, tùi hit tiong-kan ê hé-lāi hoat-chhut chhin-chhiūⁿ hó͘-phek ê sek-tì.

5

Koh tùi hit tiong-kan chhut-hiān sì ê o̍ah-mı̍h ê hêng-siōng. In ê khóan-sit sī án-ni; ū lâng ê hêng-siōng.

6

Ta̍k-ê ū sì ê bīn, ta̍k-ê ū sì ki sı̍t.

7

In ê kha sī tı̍t-tı̍t, kha-jiah-tóe chhin-chhiūⁿ gû-á ê kha-tôe; lóng chhàn-lān chhin-chhiūⁿ bôa-kng ê tâng ê chhiah-ba̍k.

8

Tī in sì-bīn ê sı̍t-ē koh ū lâng ê chhiú, chit ê sì ê o̍ah-mı̍h-ê bīn kap sı̍t chiū-sī án-ni;

9

in ê sı̍t lóng saⁿ-liân-chiap; kiâⁿ ê sî, seng-khu m̄-bián o̍at, lóng tı̍t-tı̍t chìn-chêng khì.

10

Lūn-kàu in ê bīn ê hêng-siōng, in ū lâng ê bīn; in sì-ê tī chiàⁿ-pêng ū sai ê bīn, in sì-ê tī tò-pêng ū gû ê bīn; in sì-ê iā ū eng-chiáu ê bīn.

11

In ê bīn sī án-ni; in ê sı̍t tùi téng-bīn thí-khui; chit-ê hit-ê nn̄g ê sı̍t saⁿ-liân, koh ū nn̄g ê sı̍t khàm seng-khu.

12

In ta̍k-ê tı̍t-tı̍t kiâⁿ chìn-chêng; sîn beh khì toh-lo̍h, in chiū khì hia; kiâⁿ ê sî, seng-khu m̄-bián o̍at.

13

Lūn-kàu o̍ah-mı̍h ê khóan-sit, in ê hêng-siōng chhin-chhiūⁿ to̍h ê hé-thòaⁿ, koh chhin-chhiūⁿ hé-pé ê hêng-siōng, khí-khí lo̍h-lo̍h tī o̍ah-mı̍h ê tiong-kan; hé chin kng, tùi hé-tiong hoat-chhut sih-nà.

14

Hiah ê o̍ah-mı̍h cháu-khì cháu-lâi, chhin-chhiūⁿ sih-nà teh sih.

15

Góa teh khòaⁿ o̍ah-mı̍h ê sî, khòaⁿ ah, ū chhia-lûn tī tōe-chiūⁿ, tī o̍ah-mı̍h ê piⁿ-á, chiàu i ê sì-bīn.

16

Chhia-lûn kap in ê chòe-hoat ê khóan-sit chhin-chhiūⁿ n̂g ê ge̍k ê sek-tì; sì ê lûn ê hêng-siōng siāng chı̍t-khóan; in ê khóan-sit kap chòe-hoat sī chhin-chhiūⁿ lûn-tiong ū lûn.

17

Lûn kiâⁿ ê sî, sì-bīn lóng ōe kiâⁿ--tit; kiâⁿ ê sî m̄-bián o̍at.

18

Lūn-kàu chhia-lûn ê khôan sī chin-kôaiⁿ thang kiaⁿ; sì ê lûn ê khôan ū ba̍k-chiu móa-móa.

19

O̍ah-mı̍h kiâⁿ ê sî, lûn iā tī in ê sin-piⁿ teh kiâⁿ; o̍ah-mı̍h kú-khí lī-khui tōe ê sî, lûn iā kú-khí.

20

Sîn só͘ beh khì ê só͘-chāi, in iā khì; sîn nā khì tī-hia, lûn iā tī in ê sin-piⁿ kú-khí; in-ūi o̍ah-mı̍h ê sîn tī lûn ê lāi-bīn.

21

Hiah-ê nā kiâⁿ, chiah-ê iā kiâⁿ, hiah-ê nā thêng, chiah-ê iā thêng; hiah-ê nā kú-khí lī-khui tōe ê sî, lûn iā tī in ê sin-piⁿ kú-khí; in-ūi o̍ah-mı̍h ê sîn tī lûn ê lāi-bīn.

22

O̍ah-mı̍h ê thâu-khak ê téng-bīn ū kiong-chhong ê hêng-siōng, khòaⁿ-liáu chhin-chhiūⁿ thang-kiaⁿ ê chúi-chiⁿ ê sek-tì, pho͘ tī in ê thâu-khak ê téng-bīn.

23

Tī kiong-chhong ê ē-bīn in ê sı̍t thí tı̍t-tı̍t, tāi-ke saⁿ-tùi; koh ū nn̄g ki sı̍t khàm i ê seng-khu ê chit-pêng, iā koh ū nn̄g ki sı̍t khàm i ê seng-khu ê hit-pêng.

24

In kiâⁿ ê sî, góa thiaⁿ-kìⁿ in ê sı̍t ê siaⁿ, chhin-chhiūⁿ chōe-chōe chúi ê siaⁿ, chhin-chhiūⁿ Chôan-lêng--ê ê siaⁿ, ū hōa-hōa-jióng ê siaⁿ, chhin-chhiūⁿ kun-tūi ê siaⁿ; in thêng ê sî, sı̍t chiū pàng--lo̍h-lâi.

25

Tī in thâu-khak-téng kiong-chhong ê téng-bīn ū siaⁿ; in thêng ê sî, sı̍t chiū pàng--lo̍h-lâi.

26

Tī in thâu-khak-téng kiong-chhong ê téng-bīn ū pó-chō ê hêng-siōng, chhin-chhiūⁿ lâm-sek ê pó-chio̍h; tī pó-chō hêng-siōng ê téng-bīn ū hêng-siōng chhin-chhiūⁿ lâng ê khóan-sit.

27

Góa khòaⁿ-kìⁿ tùi i ê io ê hêng-siōng ê téng-bīn ū hó͘-phek ê sek-tì, tī i ê lāi-bīn chiu-ûi ū hé ê hêng-siōng; iā khòaⁿ-kìⁿ tùi i ê io ê hêng-siōng ê ē-bīn ū chhin-chhiūⁿ hé ê hêng-siōng chiū-ûi chin-kng.

28

Tī lo̍h-hō͘ ê jı̍t hûn-tiong khēng ê hêng-siōng cháiⁿ-iūⁿ, chiu-ûi ê kng ê hêng-siōng iā sī án-ni. Góa chı̍t-ē khòaⁿ-kìⁿ, chiū phak tī tōe--nih; koh thiaⁿ-kìⁿ chı̍t-ūi kóng-ōe--ê ê siaⁿ.