Iâ-lī-bí Ai-ko 第 5 章 - 巴克禮全羅

1

Iâ-hô-hoa ah, kiû Lí kì-liām góan só͘ tú-tio̍h ê sū; Khòaⁿ góan só͘ siū ê lêng-jio̍k, lâi kàm-chhat--i.

2

Góan ê sán-gia̍p kui tī gōa-pang lâng, Góan ê chhù-the̍h kui tī pa̍t-cho̍k.

3

Góan sī bô lāu-pē ê ko͘-jî, Góan ê lāu-bú chhin-chhiūⁿ kóaⁿ-hū.

4

Góan tio̍h chhut gûn chiah ū chúi thang lim, Góan hiâⁿ-chhâ ia̍h tio̍h bóe.

5

Tui-jip góan--ê chhı̍h--tio̍h góan ê ām-kún; Góan ià-siān, bōe tit-tio̍h hioh-khùn.

6

Góan tâu-hâng Ai-kı̍p lâng kap A-su̍t lâng, In-ūi beh tit-tio̍h bí-niû thang chia̍h-pá.

7

Góan ê lia̍t-chó͘ hōan-chōe, taⁿ in bô--khì lah; Góan tio̍h tam-tng in ê chōe-kòa.

8

Lô͘-po̍k kóan-hat góan; Bô lâng kiù góan thoat-lī in ê chhiú.

9

Góan piàⁿ sìⁿ-miā lâi tit-tio̍h bí-niû, In-ūi ū to-kiàm tī khòng-iá.

10

Góan ê phê-hu o͘ chhin-chhiūⁿ hé-lô͘, In-ūi ki-hng lâi hoat-jia̍t.

11

In tī Sek-an kiông-kan hū-jîn-lâng, Í-kı̍p Iû-tāi chiah ê siâⁿ ê chāi-sek-lú.

12

In pa̍k hiah ê kùi-cho̍k ê chhiú, kā in tiàu lī tōe; Kìⁿ-tio̍h lāu-tōa ê bīn, ia̍h bô chun-kèng.

13

Siàu-liân lâng kng chio̍h-bō, Gín-á taⁿ-chhâ, tì-kàu po̍ah-tó.

14

Lāu-lâng bô koh chē tī siâⁿ-mn̂g-kháu, Siàu-liân lâng bô koh chok-ga̍k.

15

Góan ê sim khòai-lo̍k í-keng soah, Góan ê thiàu-bú pìⁿ-chòe pi-ai.

16

Góan thâu-khak-téng ê bián-liû ka-la̍uh, Góan ū chai-ē ah! in-ūi góan ū hōan-chōe.

17

In-ūi án-ni, góan ê sim hūn--khì; In-ūi án-ni, góan ê ba̍k-chiu hoe.

18

Sī ūi-tio̍h Sek-an soaⁿ pha-hng; Soaⁿ-káu kiâⁿ-iû tī hit téng-bīn.

19

Iâ-hô-hoa ah, Lí sī éng-óan tī-teh; Lí ê pó-chō tāi-tāi bô soah.

20

Lí siáⁿ-sū éng-óan bōe-kì-tit góan? Siáⁿ-sū khì-sak góan kàu hiah-kú?

21

Iâ-hô-hoa ah, kiû Lí hō͘ góan o̍at-tńg kui Lí; góan chiū o̍at-tńg. Kiû Lí ōaⁿ-sin góan ê jı̍t, chhin-chhiūⁿ chá-sî chı̍t-iūⁿ.

22

Lí it-chīn khì-sak góan, Siū-khì góan kàu-ke̍k.