I-se-kiat 第 10 章 - 巴克禮全羅

1

Góa koan-khòaⁿ, khòaⁿ-kìⁿ ki-lō͘-peng thâu-khak-téng kiong-chhong ê tiong-kan, chhin-chhiūⁿ lâm-sek ê pó-chio̍h, chhin-chhiūⁿ pó-chō ê hêng-siōng ê khóan-sit.

2

I tùi hit ê chhēng iù-tōe-saⁿ ê lâng kóng, Lí jı̍p-khì, tī tńg-se̍h ê lûn ê tiong-kan, ki-lō͘-peng í-ē, tùi ki-lō͘-peng ê tiong-kan the̍h to̍h ê hé-thòaⁿ, móa nn̄g chhiú, iā tī siâⁿ-téng. Góa chiū chhin-ba̍k khòaⁿ-kìⁿ i jı̍p-khì.

3

Hit-lâng jı̍p-khì ê sî, ki-lō͘-peng khiā tī tiān ê chiàⁿ-pêng, hûn chhiong-móa lāi-īⁿ.

4

Iâ-hô-hoa ê êng-kng tùi ki-lō͘-peng hia chiūⁿ--khì, thêng tī tiān ê hō͘-tēng ê téng-bīn; tiān ū hûn móa-móa; hit ê īⁿ ia̍h hō͘ Iâ-hô-hoa êng-kng ê chhàn-lān chhiong-móa.

5

Ki-lō͘-peng ê sı̍t ê siaⁿ thiaⁿ kàu gōa-īⁿ, chhin-chhiūⁿ chôan-lêng ê Siōng-tè kóng-ōe ê siaⁿ.

6

I hoan-hù hit ê chhēng iù-tōe-saⁿ ê lâng kóng, Tio̍h tùi tńg-se̍h ê lûn ê tiong-kan, ki-lō͘-peng ê tiong-kan, chhú hé; hit-sî i chiū jı̍p-khì, khiā tī chı̍t ê lûn ê piⁿ-thâu.

7

Ū chı̍t ê ki-lō͘-peng tùi ki-lō͘-peng tiong chhun i ê chhiú, kàu ki-lō͘-peng tiong-kan ê hé, the̍h kóa khí-lâi, hē tī chhēng iù-tōe-saⁿ ê lâng ê nn̄g ki chhiú; hit-lâng kā i the̍h--lâi, chiū chhut-khì.

8

Tī ki-lō͘-peng ê sı̍t-ē, ū hián-chhut lâng ê chhiú ê khóan.

9

Góa koh koan-khòaⁿ, khòaⁿ-kìⁿ ki-lō͘-peng ê piⁿ--thâu sì ê lûn; chit ê ki-lō͘-peng ê piⁿ--thâu ū chı̍t ê lûn, hit ê ki-lō͘-peng ê piⁿ--thâu iā ū chı̍t ê lûn; lûn ê khóan-sit chhin-chhiūⁿ n̂g ê ge̍k ê sek-tì.

10

Lūn-kàu in ê khóan-sit, sì-ê lóng siâng chı̍t-iūⁿ ê hêng-chōng, chhin-chhiūⁿ lûn-tiong ū lûn.

11

Kiâⁿ ê sî, sì-bīn lóng ōe kiâⁿ--tit, kiâⁿ ê sî m̄-bián o̍at, thâu ǹg sím-mı̍h só͘-chāi, in chiū tè i kiâⁿ; kiâⁿ ê sî m̄-bián o̍at.

12

In thong sin-khu, in ê ka-chiah, in ê chhiú, in ê sı̍t, kap lûn, sì-ûi ū ba̍k-chiu móa-móa; chiū-sī in sì-ê só͘ ū ê lûn.

13

Lūn-kàu chiah ê lûn, góa hī-khang-tiong thiaⁿ-kìⁿ kóng, Tńg-se̍h--ê.

14

Tāk-ê ū sì ê bīn, thâu chı̍t ê bīn sī ki-lō͘-peng ê bīn, tē-jī ê bīn sī lâng ê bīn, tē-saⁿ ê bīn sī sai ê bīn, tē-sì ê bīn sī eng ê bīn.

15

Ki-lō͘-peng lóng chiūⁿ--khì; che sī góa tī Ka-pa-ló͘ hô-piⁿ só͘ bat khòaⁿ-kìⁿ ê o̍ah-mı̍h.

16

Ki-lō͘-peng kiâⁿ, lûn ia̍h tī piⁿ--thâu kiâⁿ; ki-lō͘-peng thí-khui sı̍t tùi tōe chiūⁿ--khì, lûn iā bô o̍at-tńg lī-khui in ê sin-piⁿ.

17

Hiah-ê thêng, chiah-ê iā thêng; hiah-ê chiūⁿ--khì, chiah-ê ia̍h saⁿ-kap chiūⁿ--khì; in-ūi o̍ah-mı̍h ê sîn tī in ê lāi-bīn.

18

Iâ-hô-hoa ê êng-kng tùi tiān ê hō͘-tēng-téng chhut-khì, thêng tī ki-lō͘-peng ê téng-bīn.

19

Ki-lō͘-peng chhut-khì ê sî chiū thí-khui sı̍t, tī góa ê ba̍k-chiu-chêng tùi tōe chiūⁿ--khì, lûn ia̍h tī in ê sin-piⁿ; thêng tī Iâ-hô-hoa ê chhù tang-mn̂g ê mn̂g-khàu, tī in ê téng-bīn, ū Í-sek-lia̍t Siōng-tè ê êng-kng.

20

Che sī góa chêng tī Ka-pa-ló͘ hô-piⁿ só͘ khòaⁿ-kìⁿ Í-sek-lia̍t Siōng-tè ê ē-bīn ê o̍ah-mı̍h; góa chai in sī ki-lō͘-peng.

21

Ta̍k-ê ū sì ê bīn, ta̍k-ê ū sì ê sı̍t; in ê sı̍t-ē ū lâng ê chhiú ê hêng-siōng.

22

Lūn-kàu in ê bīn ê hêng-siōng, chiū-sī góa chêng tī Ka-pa-ló͘ hô-piⁿ só͘ khòaⁿ-kìⁿ ê bīn; in ê khóan-sit, in ê sin-thé, lóng án-ni; lóng ta̍k-ê tı̍t-tı̍t kiâⁿ--khì.