I-se-kiat 第 11 章 - 巴克禮全羅

1

Sîn chiū kú-khí góa, tòa góa kàu Iâ-hô-hoa ê chhù, ǹg-tang ê tang-mn̂g; khòaⁿ ah, tī mn̂g ê mn̂g-kháu, ū jī-cha̍p-gō͘ lâng; góa khòaⁿ-kìⁿ in tiong-kan ū peh-sìⁿ ê kùi-cho̍k, Ap-sok ê kiáⁿ Ngá-sat-nî, kap Pí-ná-ngá ê kiáⁿ Pí-la̍h-thê.

2

I kā góa kóng, Jîn-chú ah, che chiū-sī tô͘-bô͘ chōe-ok ê lâng, thê-chhiòng pháiⁿ-tāi tī chit ê siâⁿ-lāi.

3

In kóng, Khí-chhù ê kî iáu-bē kàu, chit ê siâⁿ sī tiáⁿ, góan sī hit lāi-bīn ê bah.

4

Jîn-chú ah, in-ūi án-ni, lí tio̍h soan-thôan; tio̍h soan-thôan lâi kong-kek in.

5

Iâ-hô-hoa ê sîn lîm-kàu góa, tùi góa kóng, Lí tio̍h kóng, Iâ-hô-hoa án-ni kóng, Í-sek-lia̍t-ke ah, lín kóng án-ni, lín ê sim só͘ siūⁿ, Góa chai lah.

6

Lín tī chit ê siâⁿ-lāi thâi-sí chōe-chōe lâng, hō͘ sin-si móa koe-lō͘.

7

Só͘-í Chú Iâ-hô-hoa án-ni kóng, Lín só͘ hē tī chit ê siâⁿ-lāi ê sí-lâng chiū-sī bah; chit ê siâⁿ chiū-sī tiáⁿ; chóng-sī lín beh tùi hit tiong-kan siū tòa-chhut--khì.

8

Lín kiaⁿ to-kiàm, Góa beh hō͘ to-kiàm lîm-kàu lín; che sī Chú Iâ-hô-hoa kóng--ê.

9

Góa beh tùi hit tiong-kan chhōa lín chhut-khì, kau tī gōa-pang lâng ê chhiú; koh beh tī lín tiong-kan kiâⁿ sím-phòaⁿ.

10

Lín beh tó tī to-ē, Góa beh tī Í-sek-lia̍t ê kau-kài sím-phòaⁿ lín; lín chiū chai Góa sī Iâ-hô-hoa.

11

Chit ê siâⁿ bô beh chòe lín ê tiáⁿ, lín ia̍h bô beh chòe hit tiong-kan ê bah; Góa beh tī Í-sek-lia̍t ê kau-kài sím-phòaⁿ lín.

12

Lín chiū chai Góa sī Iâ-hô-hoa, in-ūi lín bô kiâⁿ Góa ê lu̍t-lē, ia̍h bô sūn-thàn Góa ê hoat-tō͘; chiū-sī thàn lín sì-ûi lia̍t-kok ê hoat-tō͘.

13

Góa tú-á teh soan-thôan ê sî, Pí-ná-ngá ê kiáⁿ Pí-la̍h-thê sí--khì. Góa chiū phak tī tōe--nih, tōa-siaⁿ kiò kóng, Hāiⁿ ah! Chú Iâ-hô-hoa ah, Lí beh chiong Í-sek-lia̍t ê lâng it-chīn châu-bia̍t mah?

14

Iâ-hô-hoa ê ōe lîm-kàu góa kóng,

15

Jîn-chú ah, Iâ-lō͘-sat-léng khiā-khí ê peh-sìⁿ, tùi lí ê hiaⁿ-tī, chiū-sī lí ê hiaⁿ-tī, lí ê chhin-lâng, kap Í-sek-lia̍t chôan-ke, chiū-sī tùi chèng-lâng kóng, Lín tio̍h lī-khui Iâ-hô-hoa, in-ūi chit ê tōe sī hō͘ góan chòe-gia̍p--ê.

16

Só͘-í lí tio̍h kóng, Chú Iâ-hô-hoa án-ni kóng, Góa sui-jiân chhian-sóa in hn̄g-hn̄g, tī lia̍t-pang-tiong, sì-sòaⁿ in tī lia̍t-kok-tiong, Góa iáu beh tī in só͘ kàu ê kok, chiām-sî chòe in ê sèng-só͘.

17

Só͘-í lí tio̍h kóng, Chú Iâ-hô-hoa án-ni kóng, Góa beh tùi chiah ê peh-sìⁿ-tiong chio-chı̍p lín, ia̍h beh tùi lín sì-sòaⁿ kàu ê lia̍t-kok-tiong chū-chı̍p lín, koh beh chiong Í-sek-lia̍t tōe siúⁿ-sù lín.

18

In beh kàu hia, ia̍h beh tùi in tiong-kan tû-khì it-chhè khó-ò͘ⁿ thang òan-hūn ê mı̍h.

19

Góa beh hō͘ in choan-it ê sim, ia̍h beh chiong sin ê sîn hē tī lín ê lāi-bīn; koh beh tùi in ê jio̍k-thé-tiong tû-khì hit-hō chhin-chhiūⁿ chio̍h ê sim, siúⁿ-sù in hit-hō chhin-chhiūⁿ bah ê sim.

20

Hō͘ in sūn-thàn Góa ê lu̍t-lē, chun-siú Góa ê hoat-tō͘ lâi kiâⁿ--i; in chòe Góa ê peh-sìⁿ, Góa ia̍h beh chòe in ê Siōng-tè.

21

Chóng-sī sim thàn khó-ò͘ⁿ thang iàm-chiān--ê ê sim hit-hō lâng, Góa beh chiàu in só͘ kiâⁿ--ê pò-èng tī in ê thâu-khak-téng; che sī Chú Iâ-hô-hoa kóng--ê.

22

Hit-sî ki-lō͘-peng thí-khui in ê sı̍t, hiah ê lûn ia̍h tī in ê piⁿ-thâu; tī in ê téng-bīn ū Í-sek-lia̍t Siōng-tè ê êng-kng.

23

Iâ-hô-hoa ê êng-kng tùi siâⁿ-tiong chiūⁿ--khì, hioh tī siâⁿ-gōa tang--sì ê soaⁿ.

24

Sîn kú-khí góa, tī īⁿ-siōng-tiong tùi Siōng-tè ê sîn tòa góa kàu Ka-le̍k-tí siū-lia̍h ê lâng hia; góa só͘ khòaⁿ-kìⁿ ê īⁿ-siōng, chiū lī-khui góa chiūⁿ--khì.

25

Góa chiū chiong Iâ-hô-hoa só͘ chí-sī góa it-chhè ê sū, lóng kóng hō͘ siū-lia̍h ê lâng thiaⁿ.