I-se-kiat 第 15 章 - 巴克禮全羅

1

Iâ-hô-hoa ê ōe lîm-kàu góa kóng,

2

Jîn-chú ah, phû-tô-chhiū chiū-sī chhiū-nâ-lāi chhiū-ba̍k-tiong ê chı̍t-ki, i pí ta̍k-hō chhiū ū sím-mı̍h khah-iâⁿ?

3

Kiám ōe thang tùi i chhú chhâ-liāu chòe sím-mı̍h lō͘-ēng? á-sī thang ēng i chòe khı̍t-á lâi tiàu sím-mı̍h khì-kū mah?

4

Khòaⁿ ah, sī hiat tī hé--nih chòe hé-chhâ, siang-thâu í-keng hō͘ hé sio-liáu, tiong-ng ia̍h siū-sio, iáu ū sím-mı̍h lō͘-ēng ah?

5

Khòaⁿ ah, hó-hó ê sî, siōng-chhiáⁿ m̄-ha̍p sím-mı̍h lō͘-ēng, hô-hòng hō͘ hé sio, í-keng pháiⁿ--khì, iáu ōe ha̍p sím-mı̍h lō͘-ēng ah?

6

Só͘-í Chú Iâ-hô-hoa án-ni kóng, Chhin-chhiūⁿ chhiū-nâ-lāi chiah ê chhiū-tiong ê phû-tô, Góa só͘ kau-hù tī hé-tiong chòe hé-chhâ--ê, Góa ia̍h beh chiàu án-ni khóan-thāi Iâ-lō͘-sat-léng khiā-khí ê peh-sìⁿ.

7

Góa beh tùi in pìⁿ-bīn; in tùi hé-tiong chhut-lâi, chóng-sī hé beh sio-bia̍t in. Góa tùi in pìⁿ-bīn ê sî, lín chiū chai Góa sī Iâ-hô-hoa.

8

Góa beh hō͘ chit só͘-chāi hong-hòe, in-ūi in kiâⁿ tāi-chì lâi hōan-chōe; che sī Chú Iâ-hô-hoa kóng--ê.