I-se-kiat 第 16 章 - 巴克禮全羅

1

Iâ-hô-hoa ê ōe koh lîm-kàu góa kóng,

2

Jîn-chú ah, lí tio̍h hō͘ Iâ-lō͘-sat-léng chai i hiah ê khó-ò͘ⁿ ê sū,

3

kóng, Chú Iâ-hô-hoa tùi Iâ-lō͘-sat-léng án-ni kóng, Lí ê pún-gôan, lí ê chhut-sì, sī tī Ka-lâm tōe; A-mô͘-lī lâng sī lí ê lāu-pē, lí ê lāu-bú sī Hek-lâng.

4

Lūn-kàu lí chhut-sì ê kéng-hóng, tng lí chhut-sì ê jı̍t bô kā lí tńg-châi; iā bô ēng chúi kā lí sóe hō͘ lí chheng-khì; lóng bô kā lí sám iâm, ia̍h bô ēng pò͘ kā lí pau.

5

Bô lâng khòaⁿ-kò͘ lí, kā lí chòe chiah ê sū, lîn-bín lí; lí chhut-sì ê jı̍t hiat tī chhân-iá, sī in-ūi lí hō͘ lâng iàm-ò͘ⁿ.

6

Góa tùi lí hia kè, khòaⁿ-kìⁿ lí kō tī lí ê huih-lāi, chiū tùi lí kóng, Lí sui-jiân tī lí ê huih-tiong, iáu-kú thang o̍ah; Góa sı̍t-chāi tùi lí kóng, Lí sui-jiân tī lí ê huih-tiong, iáu-kú thang o̍ah.

7

Góa hō͘ lí tióng-sêng, chhin-chhiūⁿ chhân--nih só͘ hoat-siⁿ--ê, koh lí chiām-chiām chiâⁿ-chòe tōa-lâng, bīn-māu chheng-siù, lin phòng, thâu-mn̂g tn̂g; chóng-sī lí iû-gôan chhiah-sin lō͘-thé.

8

Góa tùi lí hia kè, khòaⁿ-kìⁿ lí; khòaⁿ ah, hit-sî sī lí heng-khí ài-chêng ê sî; Góa chiū ēng saⁿ-á-ku khàm lí, jia lí ê thǹg-theh-theh; koh tùi lí chiù-chōa, kap lí kiat-iok; lí chiū sio̍k tī Góa; che sī Chú Iâ-hô-hoa kóng--ê.

9

Hit-sî Góa ēng chúi sóe lí, sóe chheng-khì lí sin-thé ê huih, koh ēng iû boah lí.

10

Góa hō͘ lí chhēng siù-hoe ê saⁿ, ia̍h hō͘ lí chhēng hái-káu phê ê ôe, ia̍h ēng iù-tōe-pò͘ hō͘ lí hâ-io; koh ēng tiû-tōan chòe-saⁿ hō͘ lí moa.

11

Góa ēng chng-thāⁿ ê mı̍h chng-thāⁿ lí; ēng chhiú-khôan kòa tī lí ê chhiú, ēng kim-liān-á kòa tī lí ê ām-kún.

12

Góa ia̍h ēng khôan khòa tī lí ê phīⁿ; ēng hī-kau kòa tī lí ê hī-á, ēng súi ê bō tì tī lí ê thâu-khak.

13

Án-ni, lí chiū ū kim-gûn ê chng-thāⁿ; só͘ chhēng--ê sī iù-tōe-pò͘, kap tiû-tōan, kap siù-hoe ê saⁿ; só͘ chia̍h-ê sī iù-iù ê mī, phang ê bı̍t, kap iû; lí ia̍h ke̍k-kî súi, hoat-ta̍t kàu ông-hō͘ ê chun-kùi.

14

Lí súi ê miâ-siaⁿ thôan tī lia̍t-kok-tiong; sī tùi lí ê súi ôan-chôan, in-ūi Góa ū ēng Góa ê êng-kng hō͘ lí; che sī Chú Iâ-hô-hoa kóng--ê.

15

To̍k-to̍k lí óa-khò ka-kī ê súi, koh in-ūi lí ê miâ-siaⁿ, chiū kiâⁿ îm-lōan; lí hòng-chhiòng îm-io̍k, hō͘ kè-lō͘ lâng chhut-chāi i ê ì-sù lâi kiâⁿ.

16

Koh ēng lí ê saⁿ, chng-thāⁿ kôaiⁿ ê só͘-chāi, ngó͘-sek lóng chiâu-pī; tī hit téng-bīn kiâⁿ îm-lōan; chit hō sū bô beh lâi, ia̍h bô koh ū.

17

Lí ia̍h chhú Góa só͘ hō͘ lí kim-gûn súi ê pó-khì; ūi-tio̍h ka-kī chòe lâng ê siōng, kap i kiâⁿ-îm.

18

Koh ēng lí siù-hoe ê saⁿ kā i moa, ia̍h ēng Góa ê ko-iû, Góa ê hiuⁿ-liāu, pâi tī i ê bīn-chêng.

19

Koh Góa só͘ siúⁿ-sù lí ê chia̍h-mı̍h, iù-mī, kap iû kap bı̍t, Góa só͘ ēng lâi iúⁿ-chhī lí--ê, lí chiū ēng--i, pâi tī in ê bīn-chêng, lâi chòe phang-bī, sı̍t-chāi ū án-ni; che sī Chú Iâ-hô-hoa kóng--ê.

20

Koh lí ēng lí ê kiáⁿ , lí ê cha-bó͘-kiáⁿ, chiū-sī lí só͘ kā Góa siⁿ--ê, lâi hiàn hō͘ in chia̍h; lí kiâⁿ chiah ê îm-lōan, kiám sī sió-khóa sū?

21

lí kéng-jiân koh thâi-sí Góa chiah ê kiáⁿ lâi kau-hù i, hō͘ in keng-kè hé lâi kui tī i?

22

Lí kiâⁿ chiah-ê it-chhè khó-ò͘ⁿ kap îm-lōan ê sū lóng bô siūⁿ-tio̍h lí sòe-hàn chhiah-sin lō͘-thé, kō tī lí huih-tiong ê jı̍t.

23

Chú Iâ-hô-hoa kóng, Lí ū chai-ē ah, ū chai-ē ah;

24

lí kiâⁿ che it-chhè pháiⁿ-tāi í-āu, koh ūi ka-kī khí hoe-lâu, tī ta̍k tiâu koe-lō͘ khí kôaiⁿ-tâi.

25

Lí tī it-chhè koe-lō͘-kháu khí kôaiⁿ-tâi, hō͘ lí ê súi piàn chòe khó-ò͘ⁿ--ê; koh kap it-chhè kè-lō͘--ê chōe-chōe kiâⁿ îm-lōan.

26

Lí ia̍h kap lí keh-piah kok, hòng-chhiòng chêng-io̍k ê Ai-kı̍p lâng kiâⁿ-îm, ke-thiⁿ lí ê îm-lōan, jiá Góa siū-khì.

27

Khòaⁿ ah, Góa chhun-chhut Góa ê chhiú kong-kek lí; kiám-chió lí èng-iōng ê mı̍h; koh chiong lí kau hō͘ òan-hūn lí ê Hui-lī-sū hiah ê cha-bó͘-gín-á, hō͘ in chhut-chāi ì-sù khóan-thāi lí; in khòaⁿ-kìⁿ lí kiâⁿ pháiⁿ, lâi kiàn-siàu.

28

Lí in-ūi hò͘ⁿ-sek put-ti-chiok, koh kap A-su̍t lâng kiâⁿ-îm; kap in kiâⁿ-îm liáu-āu, iû-gôan bô móa-ì.

29

Lí koh tī Ka-lâm tōe kàu Ka-le̍k-tí kiâⁿ chōe-chōe îm-lōan, iáu-kú bô móa-ì.

30

Chú Iâ-hô-hoa kóng, Lí kiâⁿ che it-chhè ê sū, sī pà-sèng îm-hū ê só͘ kiâⁿ, khó-kiàn lí ê sim sī jōa lóan-jio̍k.

31

In-ūi lí tī it-chhè koe-lō͘-kháu khí hoe-lâu, tī ta̍k tiâu koe-lō͘ khí kôaiⁿ-tâi; in-ūi lí bô chhin-chhiūⁿ pa̍t ê chhiong-ki, m̄-tı̍h chîⁿ.

32

Gōa! Lí chit ê kiâⁿ-îm ê bó͘ ah, beh tı̍h pa̍t-lâng lâi thòe tiōng-hu!

33

Lâng sī ēng mı̍h sàng chhiong-ki, lí hóan-tńg ēng mı̍h sàng lí siong-hó ê lâng, chhiáⁿ in tùi sì-ûi lâi kap lí kiâⁿ-îm.

34

Lí ê kiâⁿ-îm kap pa̍t ê hū-jîn-lâng tùi-hóan; in-ūi m̄-sī lâng chhē lí kiâⁿ-îm, sī lí ēng mı̍h sàng lâng, m̄-sī lâng sàng lí; só͘-í lí kap pa̍t-ê hū-jîn-lâng tùi-hóan.

35

In-ūi án-ni, lí chit ê chhiong-ki ah, tio̍h thiaⁿ Iâ-hô-hoa ê ōe;

36

Chú Iâ-hô-hoa án-ni kóng, In-ūi lí piàⁿ-chhut lí ê ù-òe; lí kap lí só͘ siong-hó--ê thǹg-theh-theh kiâⁿ-îm; koh in-ūi lí só͘ pài it-chhè khó-ò͘ⁿ ê ngó͘-siōng, koh ūi-tio̍h só͘ lâu lí chiah ê kiáⁿ ê huih, chiū-sī lí só͘ hiàn hō͘ in--ê;

37

khòaⁿ ah, in-ūi án-ni, Góa beh chū-chı̍p lí it-chhè siong-hó--ê, chiū-sī lí bat kap i iàn-lo̍k--ê, kap lí it-chhè só͘ thiàⁿ--ê, lí it-chhè só͘ òan-hūn-ê, Góa beh tùi sì-ûi chū-chı̍p lâi kong-kek lí, ia̍h beh tùi in lō͘-chhut lí ê thǹg-theh, hō͘ in khòaⁿ lí ê thǹg-theh.

38

Góa ia̍h beh sím-phòaⁿ lí, chhin-chhiūⁿ sím-phòaⁿ kiâⁿ-îm kap thâi-lâng ê hū-jîn-lâng chı̍t-iūⁿ; Góa beh ēng tōa siū-khì tò͘-khī, hō͘ lí lâu-huih.

39

Góa koh beh chiong lí kau tī in ê chhiú, in beh thiah-húi lí ê hoe-lâu, húi-hōai lí ê kôaiⁿ-tâi, thǹg lí ê saⁿ, chhiúⁿ lí súi ê pó-khì; lâu lí chhiah-sin lō͘-thé.

40

In iā beh chhōa chōe-chōe lâng khí--lâi kong-kek lí, ēng chio̍h-thâu tìm-sí lí, ēng to-kiàm chha̍k-thàu lí.

41

Ēng hé sio lí ê chhù-the̍h, tī chōe-chōe hū-jîn-lâng ê bīn-chêng sím-phòaⁿ lí; Góa tek-khak hō͘ lí bô koh kiâⁿ-îm, ia̍h bô koh sàng lâng mı̍h.

42

Án-ni, Góa ǹg lí ê tōa siū-khì beh soah, Góa ê tò͘-khī ia̍h beh lī-khui lí; Góa beh an-chēng bô koh siū-khì.

43

In-ūi lí bōe-kì-tit lí sòe-hàn ê jı̍t, tī che it-chhè ê sū lâi kek Góa; só͘-í Góa beh chiàu lí só͘ kiâⁿ--ê, pò-èng tī lí ê thâu-khak-téng; hō͘ lí bô koh kiâⁿ-îm, ke-thiⁿ tī lí it-chhè khó-ò͘ⁿ ê sū; che sī Chú Iâ-hô-hoa kóng--ê.

44

Khòaⁿ ah, kìⁿ-nā kóng sio̍k-gú--ê, beh ēng sio̍k-gú thóe-thak lí, kóng, Lāu-bú án-ni, cha-bó͘-kiáⁿ iā sī án-ni.

45

Lí chin-chiàⁿ sī lín lāu-bú ê cha-bó͘-kiáⁿ, iàm-chiān i ê tiōng-hu kap kiáⁿ-jî; lí chin-chiàⁿ sī lín chí-bē ê chí-bē, iàm-chiān in ê tiōng-hu kap kiáⁿ-jî; lín lāu-bú sī Hek lâng, lín lāu-pē sī A-mô͘-lī lâng.

46

Lí ê tōa-chí sī Sat-má-lī-a, i kap i ê chèng cha-bó͘-kiáⁿ tiàm tī lí ê tò-pêng; lí ê sió-bē sī Só͘-to-má, i kap i ê chèng cha-bó͘-kiáⁿ tiàm tī lí ê chiàⁿ-pêng.

47

Lí bô o̍h in ê só͘-kiâⁿ, ia̍h bô chiàu in khó-ò͘ⁿ ê sū khì chòe; lí lia̍h chòe sió-khóa sū, lí it-chhè só͘-kiâⁿ-ê, pí in khah-chhàu.

48

Chú Iâ-hô-hoa kóng, Góa kí Góa ê éng-o̍ah lâi chiù-chōa; lí ê sió-bē Só͘-to-má, kap i chèng cha-bó͘-kiáⁿ, bē ū kiâⁿ lí kap lí chèng cha-bó͘-kiáⁿ só͘ kiâⁿ ê sū.

49

Khòaⁿ ah, lí ê sió-bē Só͘-to-má ê chōe sī chit-khóan; i kap i ê chèng cha-bó͘-kiáⁿ, sim-chì kiau-ngō͘, bí-niû pá-chiok, hióng-siū an-ia̍t; lóng bô hû-chō͘ khùn-khó͘ kap sòng-hiong lâng ê chhiú.

50

In chū-ko, tī Góa ê bīn-chêng kiâⁿ khó-ò͘ⁿ ê sū, Góa khòaⁿ-liáu chiū chiong in tû--khì.

51

Sat-má-lī-a só͘ hōan ê chōe bô lí ê chı̍t-pòaⁿ; lí ke-thiⁿ khó-ò͘ⁿ ê sū pí in khah-chōe, koh tùi lí só͘ kiâⁿ it-chhè khó-ò͘ⁿ ê sū, hō͘ lí ê chí-bē hián-bêng sī gī.

52

Lí kì-jiân tòan-tēng lí ê chí-bē chòe-gī, chiū tio̍h tam-tng lí ka-kī ê lêng-jio̍k; in-ūi lí só͘ hōan ê chōe pí in khah khó-ò͘ⁿ, in chiū pí lí khah gī; lí í-keng hō͘ lí ê chí-bē hián-bêng sī gī, lí chiū tio̍h kiàn-siàu, tam-tng ka-kī ê lêng-jio̍k.

53

Góa beh hō͘ in siū-lia̍h-ê tò-tńg--lâi; chiū-sī hō͘ Só͘-to-má kap i ê chèng cha-bó͘-kiáⁿ siū-lia̍h-ê, Sat-má-lī-a kap i ê chèng cha-bó͘-kiáⁿ siū-lia̍h--ê, í-kı̍p in tiong-kan lín siū-lia̍h--ê, lóng tò-tńg--lâi.

54

Thang hō͘ lí tam-tng ka-kī ê lêng-jio̍k, koh tùi lí it-chhè só͘ kiâⁿ hō͘ in tit-tio̍h an-ùi--ê, lâi kiàn-siàu.

55

Lí ê chí-bē Só͘-to-má, kap i ê chèng cha-bó͘-kiáⁿ, beh tò-lâi gôan-ūi; Sat-má-lī-a, kap i ê chèng chá-bó͘-kiáⁿ, beh tò-lâi gôan-ūi; lí, kap lí ê chèng cha-bó͘-kiáⁿ , ia̍h beh tò-lâi gôan-ūi.

56

Tng lí kiau-ngō͘ ê jı̍t, lí ê chhùi bô kóng-khí lí ê sió-bē Só͘-to-má,

57

hit-sî lí ê pháiⁿ iáu-bē hoat-hiān, A-lân chiah ê cha-bó͘-kiáⁿ, liân i sì-ûi ê lâng, iáu-bē lêng-jio̍k lí; Hui-lī-sū chiah 5 cha-bó͘-kiáⁿ, pêng-sò͘ tī sì-ûi biáu-sī lí--ê, i iā bē ū lêng-jio̍k lí.

58

Iâ-hô-hoa kóng, Lí hò͘ⁿ-îm kap khó-ò͘ⁿ ê sū, lí í-keng tam-tng lah.

59

In-ūi Chú Iâ-hô-hoa án-ni kóng, Lí pōe-iok khòaⁿ-khin chiù-chōa, Góa beh chiàu lí só͘ kiâⁿ lâi khóan-thāi lí.

60

Chóng-sī Góa beh tui-liām Góa tī lí siàu-liân ê sî, kap lí só͘ lı̍p ê iok; ia̍h beh kap lí siat-lı̍p éng-óan ê iok.

61

Tng lí chiap-la̍p lí ê chí-bē, chiū-sī lí ê tōa-chí kap lí ê sió-bē ê sî, lí beh kì-tit lí só͘ kiâⁿ--ê lâi kiàn-siàu; Góa ia̍h beh chiong in hō͘ lí chòe cha-bó͘-kiáⁿ, to̍k-to̍k m̄-sī tùi lí ê iok.

62

Góa beh kap lí siat-lı̍p Góa ê iok, lí chiū chai Góa sī Iâ-hô-hoa;

63

kàu Góa sià-bián lí it-chhè só͘ chòe ê sî, lí kì-tit chiū kiàn-siàu; koh in-ūi lí ê lêng-jio̍k, chiū bô koh khui-chhùi; che sī Chú Iâ-hô-hoa kóng--ê.