I-se-kiat 第 21 章 - 巴克禮全羅

1

Iâ-hô-hoa ê ōe lîm-kàu góa kóng,

2

Jîn-chú ah, lí tio̍h bīn ǹg Iâ-lō͘-sat-léng, ǹg hiah ê sèng-só͘ piàⁿ-chhut ōe kong-kek Í-sek-lia̍t tōe lâi soan-thôan.

3

Tùi Í-sek-lia̍t tōe kóng, Iâ-hô-hoa án-ni kóng, Khòaⁿ ah, Góa beh tí-te̍k lí, ia̍h beh pu̍ih Góa ê to chhut i ê siù; tùi lí ê tiong-kan chián-tû gī-lâng pháiⁿ-lâng.

4

Góa kì-jiân beh tùi lí tiong-kan chián-tû gī-lâng kap pháiⁿ-lâng, só͘-í Góa ê to beh chhut i ê siù, tùi lâm kàu pak, kong-kek it-chhè ū hiat-khì-ê.

5

It-chhè ū hiat-khì-ê chiū chai Góa Iâ-hô-hoa í-keng pu̍ih to chhut i ê siù, tek-khak bô koh siu-jı̍p.

6

Jîn-chú ah, lí tio̍h thó͘-khùi, io-kut chı̍h, thòng-khó͘; thó͘-khùi tī in ê bīn-chêng.

7

In mn̄g lí kóng, Lí siáⁿ-sū thó͘-khùi? lí chiū tio̍h kóng, In-ūi ū hong-siaⁿ tāi-chì beh lâi, lâng ê sim lóng beh siau-iûⁿ, chhiú lóng sng-nńg, cheng-sîn soe-pāi, kha-thâu-u lóan-jio̍k chhin-chhiūⁿ chúi; khòaⁿ ah, chit ê sū teh lâi, tek-khak ōe chiâⁿ; che sī Chú Iâ-hô-hoa kóng--ê.

8

Iâ-hô-hoa ê ōe lîm-kàu góa kóng,

9

Jîn-chú ah, lí tio̍h soan-thôan kóng, Iâ-hô-hoa án-ni kóng, Lí tio̍h kóng, Ū to, ū to, sī bôa-lāi lù-kng ê.

10

Bôa-lāi sī beh thâi lâng, lù-kng sī beh chhin-chhiūⁿ sih-nà; lán kiám thang hoaⁿ-hí mah? Góa ê kiáⁿ ê kóaiⁿ-á biáu-sī chèng chhiū-ba̍k.

11

Chit ki to í-keng kau hō͘ lâng lù-kng, thang hō͘ lâng ê chhiú kia̍h--i; i í-keng bôa-lāi lù-kng, thang kau tī thâi-lâng--ê ê chhiú.

12

Jîn-chú ah, lí tio̍h hoah, âu-kiò; in-ūi chit ê lîm-kàu Góa ê peh-sìⁿ, kap Í-sek-lia̍t it-chhè ê kùi-cho̍k; in kap Góa ê peh-sìⁿ lóng kau tī to-ē, só͘-í lí tio̍h tah tōa-thúi.

13

Ū chhì-giām ê sū; nā hit ê biáu-sī ê kóaiⁿ-á kui tī bô, beh àn-cháiⁿ-iūⁿ ah? che sī Chú Iâ-hô-hoa kóng--ê.

14

Jîn-chú ah, lí tio̍h tah chhiú soan-thôan, chit ki to tio̍h saⁿ-pái ka-pē, chiū-sī hō͘ lâng tio̍h tāng-siong ê to, ia̍h sī hō͘ tāi-jîn tio̍h tāng-siong ê to, jı̍p tī ba̍t-pâng--ê.

15

Góa pī-pān hō͘ lâng kiaⁿ ê to, kong-kek in it-chhè ê siâⁿ-mn̂g; hō͘ in ê sim siau-iûⁿ, ke-thiⁿ in po̍ah-tó ê sū; hāiⁿ ah, chit ki to chhòng kàu chhin-chhiūⁿ sih-nà, bôa kàu chin-lāi, beh thâi-sí lâng.

16

Lí tio̍h ha̍p-óa, ǹg chiàⁿ-pêng; pâi-tīn, ǹg tò-pêng; chhut-chāi lí ê bīn ǹg toh-lo̍h, chiū ǹg hia.

17

Góa ia̍h beh tah-chhiú, ia̍h beh hō͘ Góa ê tōa siū-khì soah; che sī Góa Iâ-hô-hoa kóng--ê.

18

Iâ-hô-hoa ê ōe koh lîm-kàu góa kóng,

19

Jîn-chú ah, lí tio̍h ūi-tio̍h pún-sin siat nn̄g tiâu lō͘, thang hō͘ Pa-pí-lûn ông ê to-kiàm tùi hia lâi; chí nn̄g tiâu lō͘ tio̍h tùi chı̍t só͘-chāi pun-chhut; koh tio̍h ūi chit ki chhiú, ūi tī thàu-kàu siâⁿ ê lō͘-thâu.

20

Lí tio̍h siat chı̍t tiâu lō͘, hō͘ to lâi kàu A-bûn lâng ê La̍h-pa, iā thang kàu Iû-tāi kian-kò͘ ê siâⁿ Iâ-lō͘-sat-léng.

21

In-ūi Pa-pí-lûn ông khiā tī siang-chhe lō͘ hia, tī nn̄g tiâu lō͘-thâu beh chiam-pok, i ê iô chìⁿ; mn̄g ngó͘-siōng, giām seng-lé ê koaⁿ.

22

Tī i ê chiàⁿ-chhiú, ū chiam-pok khì Iâ-lō͘-sat-léng ê chìⁿ; siat iûⁿ-thâu-thûi, khui-chhùi hoah thâi, tōa-siaⁿ âu-kiò, siat iûⁿ-thâu-khûi, kong-kek siâⁿ-mn̂g, khí thô͘-tui, chō-tâi.

23

Hiah ê bat tùi in chiù-chōa ê lâng khòaⁿ i chòe ké ê chiam-pok; chóng-sī i beh hō͘ lâng kì-tit in ê pháiⁿ, tì-kàu in chèng-lâng siū-lia̍h.

24

Só͘-í Chú Iâ-hô-hoa án-ni kóng, In-ūi lín ê kè-sit lō͘-hiān, hō͘ lín ê chōe-kòa tú-tio̍h kì-tit, tì-kàu lín ê chōe-ok tī lín ê kiâⁿ-chòe lóng hián-chhut; koh in-ūi lín siū kì-tit, beh hō͘ lâng ê chhiú só͘ lia̍h.

25

Lí chit ê siū tāng-siong kiâⁿ-pháiⁿ ê Í-sek-lia̍t ông ah, lí ê chōe-ok kòan-móa, lí ê jı̍t-chí kàu lah.

26

Chú Iâ-hô-hoa án-ni kóng, Tio̍h tû-khì ông-bō, liù bián-liû, bô koh ū chit hō kéng-hóng; taⁿ beh hō͘ kē--ê seng kôaiⁿ, kôaiⁿ-ê kàng-kē.

27

Góa beh chhia-tó, chhia-tó, chhia-tó--i; bô koh ū chit-ê, thèng-hāu eng-kai tit-tio̍h--ê kàu, Góa chiū hō͘--i.

28

Jîn-chú ah, lí tio̍h soan-thôan kóng, Chú Iâ-hô-hoa lūn-kàu A-bûn lâng, kap in ê bú-bān, ū án-ni kóng; lí tio̍h kóng, Ū to, ū pu̍ih-chhut ê to, í-keng lù-kng, beh thâi-sí lâng; hō͘ i chhin-chhiūⁿ sih-nà beh thun-bia̍t lâng.

29

Lâng ūi-tio̍h lí khòaⁿ hu-ké ê īⁿ-siōng, kiâⁿ pe̍h-chha̍t ê chiam-pok; chiong lí hē tī siū tāng-siong pháiⁿ-lâng ê ām-kún; in ê chōe-ok kòan-móa, in ê jı̍t-chí kàu lah.

30

Hō͘ to jı̍p siù, Góa beh tī lí siū-chō ê ūi, seng-tióng ê tōe, sím-phòaⁿ lí.

31

Góa beh chiong Góa ê thòng-hūn piàⁿ tī lí ê sin-chiūⁿ, chiong Góa tōa siū-khì ê hé pûn tī lí; kau lí tī chân-jím gâu thâi-lâng--ê ê chhiú.

32

Lí beh chòe hiâⁿ-hé ê chhâ, lí ê huih beh lâu tī chit ê tōe-hng, lí bô koh tit-tio̍h kì-liām; in-ūi che sī Góa Iâ-hô-hoa kóng--ê.