I-se-kiat 第 20 章 - 巴克禮全羅

1

Tē chhit--nî, gō͘-ge̍h chhoe-cha̍p, ū Í-sek-lia̍t ê tióng-ló kúi-nā lâng, lâi beh mn̄g Iâ-hô-hoa, chē tī góa ê bīn-chêng.

2

Iâ-hô-hoa ê ōe lîm-kàu góa kóng,

3

Jîn-chú ah, lí tio̍h tùi Í-sek-lia̍t ê tióng-ló kóng, kā i kóng, Chú Iâ-hô-hoa án-ni kóng, Lín lâi sī beh mn̄g Góa mah? Chú Iâ-hô-hoa kóng, Góa chí Góa ê éng-o̍ah lâi chiù-chōa, Góa m̄ hō͘ lí mn̄g.

4

Jîn-chú ah, lí beh sím-mn̄g in, sím-mn̄g in mah? lí tio̍h hō͘ in chai in ê lia̍t-chó͘ hiah ê khó-ò͘ⁿ ê sū;

5

tùi in kóng, Chú Iâ-hô-hoa án-ni kóng, Tng Góa kéng Í-sek-lia̍t ê jı̍t, ǹg Ngá-kok ke ê hō͘-è, kia̍h-khí Góa ê chhiú, tī Ai-kı̍p tōe hō͘ in bat Góa, tùi in kia̍h-khí Góa ê chhiú, kóng, Góa sī Iâ-hô-hoa, lín ê Siōng-tè.

6

Hit-jı̍t Góa tùi in kia̍h-khí chhiú, beh chhōa in chhut Ai-kı̍p tōe, kàu Góa ūi-tio̍h in só͘ kóng, lâu ni kap bı̍t ê tōe; hit ê tōe tī bān-kok-tiong sī khah ū êng-kng--ê.

7

Góa tùi in kóng, Lín ta̍k-lâng tio̍h khì-sak ba̍k-chiu só͘ hoaⁿ-hí hiah ê khó-ò͘ⁿ ê tāi; m̄-thang in-ūi Ai-kı̍p ê ngó͘-siōng phah lâ-sâm ka-kī; Góa sī Iâ-hô-hoa, lín ê Siōng-tè.

8

Chóng-sī in pōe-ge̍k Góa, m̄-khéng thiaⁿ Góa, m̄ pàng-sak in ta̍k-lâng ba̍k-chiu só͘ hoaⁿ-hí hiah ê khó-ò͘ⁿ ê tāi, m̄ lī-khui Ai-kı̍p ê ngó͘-siōng; Góa chiū kóng, Góa beh chiong Góa ê tōa siū-khì piàⁿ tī in ê téng-bīn, tī Ai-kı̍p tōe tùi in it-chīn chiâⁿ Góa ê siū-khì.

9

To̍k-to̍k Góa in-ūi Góa ê miâ ê iân-kò͘ kiâⁿ tāi-chì, bián-tit Góa ê miâ tī in só͘ khiā-khí lia̍t-pang-tiong ê bīn-chêng siū siat-to̍k; Góa chhōa in chhut Ai-kı̍p tōe, tī lia̍t-pang-tiong ê ba̍k-chiu-chêng hō͘ in bat Góa.

10

Án-ni, Góa chiū hō͘ in chhut Ai-kı̍p tōe, chhōa in kàu khòng-iá.

11

Chiong Góa ê lu̍t-lē siúⁿ-sù in, chiong Góa ê hoat-tō͘ chí-sī in; chiū-sī lâng nā kiâⁿ--i beh tùi i lâi tit-tio̍h o̍ah--ê.

12

Koh Góa ēng Góa ê an-hioh-jı̍t siúⁿ-sù in, thang tī Góa kap in ê tiong-kan chòe chèng-kù; hō͘ in chai Góa Iâ-hô-hoa sī hō͘ in chiâⁿ-chòe sèng--ê.

13

Chóng-sī Í-sek-lia̍t-ke tī khòng-iá pōe-ge̍k Góa, bô sūn-thàn Góa ê lu̍t-lē, khì-sak Góa ê hoat-tō͘, (chiū-sī lâng nā kiâⁿ--i, beh tùi i lâi tit-tio̍h o̍ah--ê), tōa-tōa hōan-tio̍h Góa ê an-hioh-jı̍t: Góa chiū kóng, beh tī khòng-iá chiong Góa ê tōa siū-khì piàⁿ tī in ê téng-bīn, bia̍t-bô in.

14

To̍k-to̍k Góa in-ūi Góa ê miâ ê iân-kò͘ kiâⁿ tāi-chì, bián-tit Góa ê miâ siū siat-to̍k tī lia̍t-pang lâng ê ba̍k-chiu-chêng, chiū-sī hiah ê khòaⁿ-kìⁿ Góa chhōa in chhut Ai-kı̍p ê lia̍t-pang.

15

Koh Góa tī khòng-iá tùi in kia̍h-khí Góa ê chhiú, kóng, Góa bô beh chhōa in jı̍p Góa só͘ siúⁿ-sù in lâu ni kap bı̍t ê tōe, hit ê tōe tī bān-kok-tiong khah ū êng-kng--ê.

16

In-ūi in iàm-chiān Góa ê hoat-tō͘, bô sūn-thàn Góa ê lu̍t-lē, hōan-tio̍h Góa ê an-hioh-jı̍t, in ê sim ì-hiòng in ê ngó͘-siōng.

17

Sui-jiân án-ni, Góa ê ba̍k-chiū iáu-kú sī sioh in, bô húi-bia̍t in, bô tī khòng-iá kā in bia̍t liáu-liáu.

18

Góa tī khòng-iá tùi in ê kiáⁿ-jî kóng, Bo̍h-tit thàn lín lāu-pē ê lu̍t-lē, bo̍h-tit siú in ê hoat-tō͘, ia̍h bo̍h-tit in-ūi in ê ngó͘-siōng phah lâ-sām ka-kī.

19

Góa sī Iâ-hô-hoa lín ê Siōng-tè, lín tio̍h sūn-thàn Góa ê lu̍t-lē, siú Góa ê hoat-tō͘ lâi kiâⁿ--i.

20

Koh ēng Góa chiah ê an-hioh-jı̍t chòe-sèng; chiah ê jı̍t tī Góa kap lín ê tiong-kan chòe chèng-kù, hō͘ lín chai Góa sī Iâ-hô-hoa lín ê Siōng-tè.

21

To̍k-to̍k in ê kiáⁿ-jî pōe-ge̍k Góa, bô sūn-thàn Góa ê lu̍t-lē, ia̍h bô siú Góa ê hoat-tō͘ lâi kiâⁿ--i, (chiū-sī lâng nā kiâⁿ--i, beh tùi i lâi tit-tio̍h o̍ah--ê); in hōan-tio̍h Góa ê an-hioh-jı̍t; Góa chiū kóng, Góa beh chiong Góa ê tōa siū-khì piàⁿ tī in ê téng-bīn, tī khòng-iá it-chīn chiâⁿ Góa ê siū-khì kong-kek i.

22

Sui-jiân án-ni, Góa iáu-kú kiu Góa ê chhiú, ūi-tio̍h Góa ê miâ ê iân-kò͘ kiâⁿ tāi-chì, bián-tit Góa ê miâ siū siat-to̍k tī lia̍t-pang lâng ê ba̍k-chiu-chêng, chiū-sī hiah ê khòaⁿ-kìⁿ Góa chhōa in chhut Ai-kı̍p ê lia̍t-pang.

23

Koh Góa tī khòan-iá, tùi in kia̍h-khí Góa ê chhiú, kóng beh hun-sòaⁿ in tī lia̍t-kok, sì-sòaⁿ in tī lia̍t-pang.

24

In-ūi in bô thàn Góa ê hoat-tō͘, iàm-chiān Góa ê lu̍t-lē, hōan-tio̍h Góa ê an-hioh-jı̍t, ba̍k-chiu ì-hiòng in lāu-pē ê ngó͘-siōng.

25

Koh Góa ēng m̄-hó ê lu̍t-lē, kap bōe-ōe tùi i lâi tit-tio̍h o̍ah ê hoat-tō͘, hō͘--in.

26

In ēng it-chhè ê thâu-chiūⁿ-kiáⁿ keng-kè hé; Góa chiū tī in ê chè-sū kā in phah lâ-sâm, hō͘ in hong-hòe; hō͘ in chai Góa sī Iâ-hô-hoa.

27

Jîn-chú ah, lí tio̍h tùi Í-sek-lia̍t-ke kóng ōe, kā in kóng, Chú Iâ-hô-hoa án-ni kóng, Lín ê lia̍t-chó͘ tek-chōe Góa, ēng án-ni siat-to̍k Góa.

28

In-ūi Góa chhōa in kàu Góa kia̍h-khí chhiú beh siúⁿ-sù in ê tōe; in khòaⁿ-kìⁿ ta̍k ê kôaiⁿ-soaⁿ, ta̍k-châng ām ê chhiū; chiū tī-hia hiàn in hiah ê chè-sū, hiàn kek Góa siū-khì ê lé-mı̍h, ia̍h tī-hia sio phang-phang ê seng-lé, kap kòan-tiān.

29

Góa chiū tùi in kóng, Lín só͘ chiūⁿ hit ê kôaiⁿ-ūi sī sím-mı̍h? i ê miâ kiò-chòe Pa-bâ, tı̍t-kàu kin-á-jı̍t.

30

Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Lín iû-gôan chiàu lín lia̍t-chó͘ só͘ kiâⁿ-ê, phah lâ-sâm ka-kī mah? iû-gôan thàn in khó-ò͘ⁿ ê sū kiâⁿ-îm mah?

31

Lín hiàn lé-mı̍h, hō͘ lín ê kiáⁿ keng-kè hé ê sî, iû-gôan chiong it-chhè ê ngó͘-siōng phah lâ-sâm ka-kī, kàu kin-á-jı̍t mah? Í-sek-lia̍t-ke ah, Góa kiám beh hō͘ lín mn̄g mah? Chú Iâ-hô-hoa kóng, Góa kí Góa ê éng-o̍ah lâi chiù-chōa, Góa tek-khak m̄ hō͘ lí mn̄g.

32

Lín kóng, Góan beh chhin-chhiūⁿ gōa-pang lâng, chhin-chhiūⁿ lia̍t-kok ê chong-cho̍k, khì ho̍k-sāi chhâ-ê, chio̍h-ê; lín hoat-khí chit-hō sim-ì, tòan-tòan bōe chiâⁿ.

33

Chú Iâ-hô-hoa kóng, Góa kí Góa ê éng-o̍ah lâi chiù-chōa, Góa beh ēng tōa kôan-lêng ê chhiú, kap chhun-chhut ê chhiú-kut, kap piàⁿ-chhut ê tōa siū-khì chòe lín ê ông.

34

Góa beh ēng tōa kôan-lêng ê chhiú, kap chhun-chhut ê chhiú-kut, kap piàⁿ-chhut ê tōa siū-khì tùi lia̍t-pang-tiong chhōa lín chhut, ia̍h tùi lín sì-sòaⁿ-khì hiah ê kok chū-chı̍p lín.

35

Góa beh chhōa lín kàu gōa-pang lâng ê khòng-iá, tī-hia tng-bīn sím-mn̄g lín.

36

Góa àn-cháiⁿ-iūⁿ tī Ai-kı̍p tōe ê khòng-iá sím-mn̄g lín ê lia̍t-chó͘, ia̍h beh án-ni sím-mn̄g lín; che sī Chú Iâ-hô-hoa kóng--ê.

37

Góa beh hō͘ lín keng-kè kóaiⁿ-á-ē, ia̍h beh hō͘ lín siū iok ê khu-sok.

38

Góa beh tùi lín tiong-kan it-chīn tû hiah ê pōe-ge̍k kap tek-chōe Góa ê lâng; chhōa in chhut in kià-kha ê tōe-hng, chóng-sī in bōe-tit jı̍p Í-sek-lia̍t tōe; lín chiū chai Góa sī Iâ-hô-hoa.

39

Í-sek-lia̍t-ke ah, lūn-kàu lín, Chú Iâ-hô-hoa án-ni kóng, Khì ah, ta̍k-lâng ho̍k-sāi i ê ngó͘-siōng, to̍k-to̍k āu-lâi tek-khak beh thiaⁿ Góa, bô koh ēng lé-mı̍h kap ngó͘-siōng siat-to̍k Góa ê sèng-miâ.

40

Chú Iâ-hô-hoa kóng, Tī Góa ê sèng-soaⁿ, chiū-sī Í-sek-lia̍t kôaiⁿ ê soaⁿ, tī-hia Í-sek-lia̍t chôan-ke ê chèng-lâng, beh tī hit ê tōe ho̍k-sāi Góa, tī-hia Góa beh chiap-la̍p lín, tī-hia Góa beh kā lín thó lé-mı̍h, kap lín khí-thâu-se̍k ê thó͘-sán, í-kı̍p lín it-chhè ê sèng-mı̍h.

41

Góa tùi chiah ê peh-sìⁿ-tiong chhōa lín chhut, tùi lín sì-sòaⁿ--khì ê lia̍t-kok-tiong chū-chı̍p lín; hit-sî Góa beh chiap-la̍p lín chhin-chhiūⁿ phang-hiuⁿ; Góa beh tī lín tit-tio̍h hián-bêng chòe-sèng, hō͘ gōa-pang lâng khòaⁿ-kìⁿ.

42

Góa chhōa lín jı̍p Í-sek-lia̍t tōe, chiū-sī Góa kia̍h-khí Góa ê chhiú, kóng beh siúⁿ-sù lín lia̍t-chó͘ ê tōe, hit-sî lín chiū chai Góa sī Iâ-hô-hoa.

43

Tī-hia lín beh kì-tit lín ê só͘-kiâⁿ só͘ chòe, chiū-sī lín tùi hiah-ê lâi phah lâ-sâm lín ka-kī--ê; koh beh in-ūi lín só͘ kiâⁿ it-chhè ê pháiⁿ, lâi ka-kī iàm-ò͘ⁿ.

44

Chú Iâ-hô-hoa kóng, Í-sek-lia̍t-ke ah, Góa ūi-tio̍h Góa ê miâ ê iân-kò͘, bô chiàu lín ê pháiⁿ só͘-kiâⁿ, kap lín ê hú-pāi ê só͘-chòe khóan-thāi lín; lín chiū chai Góa sī Iâ-hô-hoa.

45

Iâ-hô-hoa ê ōe lîm-kàu Góa kóng,

46

Jîn-chú ah, lí ê bīn tio̍h ǹg lâm-hng, ǹg lâm-hng piàⁿ-chhut ōe, kong-kek lâm-hng chhân-iá ê chhiū-nâ lâi soan-thôan.

47

Tùi lâm-hng ê chhiū-nâ kóng, Tio̍h thiaⁿ Iâ-hô-hoa ê ōe; Chú Iâ-hô-hoa án-ni kóng, Khòaⁿ ah, Góa beh tī lí tiong kan khí hé, sio lí tiong-kan it-chhè chhiⁿ-chhùi ê chhiū, kap ko͘-tâ ê chhiū; béng-lia̍t ê hé-iām, tek-khak bô sit; tùi lâm kàu pak, ta̍k-bīn lóng siū sio.

48

Hōan-nā ū hiat-khì--ê, lóng beh chai khí-hé--ê, sī Góa Iâ-hô-hoa.

49

Tùi án-ni góa kóng, Hāiⁿ ah, Chú Iâ-hô-hoa ah, lâng lóng gī-lūn góa kóng, I kiám m̄-sī teh kóng phì-jū?