I-se-kiat 第 31 章 - 巴克禮全羅

1

Cha̍p-it--nî, saⁿ-ge̍h chhoe-it, Iâ-hô-hoa ê ōe lîm-kàu góa kóng:

2

Jîn-chú ah, lí tio̍h tùi Ai-kı̍p ông Hoat-ló, í-kı̍p i ê chèng-lâng kóng, Lí hiah tōa-tè, sī chhin-chhiūⁿ chī-chūi?

3

Khòaⁿ ah, A-su̍t bat chòe Lī-pa-lùn ê pek-hiuⁿ-chhiū, ki-ōaiⁿ chin súi, ìm-ńg chhin-chhiūⁿ chhiū-nâ, chhiū-sin kôaiⁿ-tōa, ki-bé chhun jı̍p hûn-tiong.

4

Hiah ê chúi iúⁿ i tōa-châng, chhim-ian hō͘ i hoat chin-kôaiⁿ, i hiah ê kang-hô se̍h-lâu tī chai-chèng i ê só͘-chāi; thiah-chhe ê chúi, lâu kàu chhân-hn̂g ê chhiū-ba̍k.

5

Só͘-í i kôaiⁿ-tōa pôaⁿ-kè chhân--nih ê chèng-chhiū; i ê ki chin-ām; i ê ōaiⁿ chin-tn̂g; in-ūi tī i hoat-siⁿ ê sî ū chúi chōe-chōe.

6

Khong-tiong ê pe-chiáu, lóng tī ki-téng choh-siū; chhân-iá ê cháu-siù lóng tī ki-ē siⁿ-kiáⁿ; chōe-chōe tōa-kok lóng tiàm tī i ê ìm-ē.

7

Chhiū tōa, ki tn̂g, chiâⁿ-chòe chin súi; in-ūi kun soan tī tōa chúi-piⁿ.

8

Siōng-tè hn̂g-lāi ê pek-hiuⁿ-chhiū jia i bōe-tio̍h; chhêng-chhiū put-kı̍p i ê ki, png-chhiū put-kı̍p i ê ōaiⁿ, Siōng-tè hn̂g-lāi chiah ê chhiū lóng bōe pí-tit i ê súi.

9

Góa hō͘ i ê ki-ōaiⁿ bō͘-sēng, chiâⁿ-chòe súi; tì-kàu Siōng-tè hn̂g-lāi Ai-tiân it-chhè ê chhiū, lóng òan-tò͘ i.

10

Só͘-í Chú Iâ-hô-hoa án-ni kóng, In-ūi lí kôaiⁿ-tōa, ki-bé chhun jı̍p hûn-tiong, i ê sim in-ūi i ê kôaiⁿ-tōa lâi chū-ko,

11

án-ni, Góa beh chiong i kau tī lia̍t-kok tiong ū tōa sè-le̍k--ê; i tek-khak beh pān--i, in-ūi i ê chōe-ok, Góa kóaⁿ-tio̍k i.

12

Gōa-pang-lâng, chiū-sī lia̍t-pang-tiong kiông-pō--ê, chiong i chhò-tn̄g, hiat-ka̍k, i ê ōaiⁿ ka-la̍uh tī soaⁿ--nih kap it-chhè ê soaⁿ-kok-tiong; i ê ki chı̍h tī hit só͘-chāi ê hô-piⁿ; tōe-chiūⁿ ê chèng peh-sìⁿ í-keng lo̍h-khì, lī-khui i ê ìm-ńg.

13

Khong-tiong ê pe-chiáu, lóng beh hioh tī chit ê soe-pāi ê chhiū-téng; chhân-iá ê cháu-siù lóng beh tòa tī i ê chhiū-ki;

14

thang hō͘ chúi-piⁿ chiah ê chhiū, bô in-ūi kôaiⁿ tōa lâi chū-ko; ia̍h bô chiong ki-bé chhun-jı̍p hûn-tiong; koh hiah ê tit-tio̍h chúi lūn-te̍k ū sè-le̍k ê, ia̍h bōe tit-tio̍h kôaiⁿ-tōa lâi khiā--khí-lâi; in-ūi in tī sè-kan lâng ê tiong-kan, kap lo̍h im-kan ê lâng, lóng kau hō͘ sí-bô, kàu chhim-chhim ê tōe-ē.

15

Chú Iâ-hô-hoa án-ni kóng, I lo̍h im-kan ê hit-jı̍t, Góa hō͘ lâng pi-ai; Góa ūi-tio̍h i jia-khàm chhim-ian, iok-sok kang-hô, hō͘ tōa-chúi thêng-lâu; Góa ia̍h hō͘ Lī-pa-lùn ūi-tio̍h i chhiⁿ-chhám; chhân-iá chiah ê chhiū lóng in-ūi i hūn-khì.

16

Góa chiong i hiat-lo̍h im-kan, kap lo̍h-khiⁿ ê lâng saⁿ-kap lo̍h--khì; hit-sî lia̍t-kok thiaⁿ-kìⁿ i tūi-lo̍h ê siaⁿ, chiū lóng tín-tāng; Ai-tiân it-chhè ê chhiū, Lī-pa-lùn tit-tio̍h chúi lūn-te̍k, tē-it hó tē-it súi ê, lóng tī tōe-ē chhim ê só͘-chāi, siū an-ùi.

17

In ia̍h kap i saⁿ-kap lo̍h im-kan, kàu siū to thâi ê lâng hia; in bat chòe i ê chhiú-kut, tī lia̍t-kok-tiong khiā-khí i ê ìm-ńg-ē.

18

Tī chiah-ê êng-kng kôaiⁿ-tōa, tī Ai-tiân chiah ê chhiū-tiong, lí chhin-chhiūⁿ chī-chūi? chóng-sī lí beh kap Ai-tiân chiah ê chhiū saⁿ-kap lo̍h-khì tōe-ē chhim ê só͘-chāi; lí beh kap siū to thâi ê lâng, tó tī bô siū kat-lé ê lâng ê tiong-kan. Che chiū-sī Hoat-ló kap i ê chèng peh-sìⁿ; che sī Chú Iâ-hô-hoa kóng--ê.