I-se-kiat 第 32 章 - 巴克禮全羅

1

Cha̍p-jī--nî, cha̍p-jī-ge̍h, chhoe-it, Iâ-hô-hoa ê ōe lîm-kàu góa kóng,

2

Jîn-chú ah, lí tio̍h ūi Ai-kı̍p ông Hoat-ló chòe ai-ko, kā i kóng, Chiông-chêng lí tī lia̍t-kok-tiong, chhin-chhiūⁿ ióng ê sai; taⁿ lí sī chhin-chhiūⁿ hái-tiong ê go̍k-hî; lí chông-chhut lí ê kang-hô, ēng kha tín-tāng chiah ê chúi, tì-kàu kang-hô ê chúi pìⁿ-lô.

3

Chú Iâ-hô-hoa án-ni kóng, Góa beh ēng chōe-chōe kok ê peh-sìⁿ, chiong Góa ê bāng pha tī lí ê téng-bīn, in beh ēng Góa ê bāng, kā lí thoa--chhut-lâi.

4

Góa beh hiat lí tī tōe--nih, pàng-hē tī chhân-iá, hō͘ khong-tiong ê pe-chiáu lóng hioh tī lí ê téng-bīn; hō͘ piàn-tōe ê iá-siù chia̍h lí kàu pá.

5

Góa beh chiong lí ê bah hiat tī soaⁿ-nih, ēng lí kôaiⁿ-tōa ê sin-si thūn-móa soaⁿ-kok.

6

Góa koh beh ēng lí ê huih, kòan-ak lí só͘ siû ê tōe; im-kàu chiah ê soaⁿ; hô-kau beh tùi lí lâi chhiong-móa.

7

Góa phah-bia̍t lí ê sî, beh jia-khàm chiah ê thiⁿ, hō͘ chèng chhiⁿ o͘-àm; ēng bat-hûn jia-iám jı̍t-thâu, ge̍h ia̍h bô hoat-chhut kng.

8

Góa beh hō͘ thiⁿ ê kng tī lí ê téng-bīn lóng o͘-àm; koh hō͘ lí ê tōe o͘-àm; che sī Chú Iâ-hô-hoa kóng--ê.

9

Góa hō͘ lí pāi-bô ê hong-siaⁿ kàu lí só͘ m̄-bat ê ta̍k-kok, hit-sî Góa beh hō͘ chōe-chōe peh-sìⁿ ê sim hôan-ló.

10

Góa tī in ê bīn-chêng bú Góa ê kiàm ê sî, Góa beh hō͘ chōe-chōe kok ê peh-sìⁿ ūi-tio̍h lí gông-ngia̍h, kun-ông ia̍h beh ūi-tio̍h lí tōa kiaⁿ-hiâⁿ; tī lí tó--lo̍h-khì ê jı̍t, in ta̍k-lâng ūi ka-kī ê sìⁿ-miā ngia̍uh-ngia̍uh-chhoah.

11

In-ūi Chú Iâ-hô-hoa án-ni kóng, Pa-pí-lûn ông ê to beh lîm-kàu lí.

12

Góa beh ēng ióng-sū ê to hō͘ lí ê chōe-chōe lâng tó--lo̍h-khì. Chiah ê ióng-sū lóng sī lia̍t-kok-tiong kiông-pō--ê; in beh hō͘ Ai-kı̍p ê kiau-ngō͘ kui tī bô, Ai-kı̍p ê chèng peh-sìⁿ beh siū châu-bia̍t.

13

Góa beh tùi Ai-kı̍p chōe-chōe chúi-piⁿ tû-bia̍t só͘ ū ê cháu-siù, lâng ê kha bô koh phah-lô chit ê chúi, siù ê tôe ia̍h bô koh ta̍h--i.

14

Hit-sî Góa beh hō͘ in ê chúi chē-chheng, hō͘ in ê hô lâu chhin-chhiūⁿ iû; che sī Chú Iâ-hô-hoa kóng--ê.

15

Góa hō͘ Ai-kı̍p tōe hong-hòe léng-chēng, chit ê tōe cho̍at-bô chiông-chêng só͘ chhiong-móa--ê; koh Góa kong-kek kî-tiong it-chhè khiā-khí ê peh-sìⁿ; hit-sî in chiū chai Góa sī Iâ-hô-hoa.

16

Chit-ê sī ai-ko, lâng beh ēng chit-ê lâi ai-khàu; lia̍t-kok chiah ê cha-bó͘-gín-á beh ēng án-ni lâi ai-khàu; in ūi-tio̍h Ai-kı̍p kap i ê chèng peh-sìⁿ, ia̍h beh ēng chit-ê lâi ai-khàu; che sī Chú Iâ-hô-hoa kóng--ê.

17

Cha̍p-jī--nî, cha̍p-jī ge̍h cha̍p-gō͘, Iâ-hô-hoa ê ōe lîm-kàu góa kóng,

18

Jîn-chú ah, lí tio̍h in-ūi Ai-kı̍p ê chèng-lâng ai-khàu; koh tio̍h chiong Ai-kı̍p kap ū miâ-siaⁿ ê kok chiah ê cha-bó͘-gín-á, kap lo̍h-khiⁿ ê lâng, chòe chı̍t-ē hiat-lo̍h tōe-ē chhim ê só͘-chāi.

19

Lí ê súi iâⁿ-kè chī-chūi ah? lí tio̍h lo̍h-khì, kap bô siū kat-lé ê lâng saⁿ-kap tó--teh.

20

In beh tó tī hō͘ to thâi ê lâng ê tiong-kan, i siū kau-hù tī to-kiàm, tio̍h chiong i kap i ê chèng-lâng thoa--khì.

21

Kiông-béng ê ióng-sū beh tī im-kan tùi i kap pang-chān i--ê kóng-ōe; in sī bô siū kat-lé, siū to thâi ê lâng; í-keng lo̍h--khì, tó-teh bô tín-tāng.

22

A-su̍t kap i ê chèng peh-sìⁿ, lóng tī-hia; i ê bōng tī i ê sì-ûi; in lóng sī siū-thâi, tó tī to-ē--ê.

23

In ê bōng tī khiⁿ-tiong ke̍k-chhim ê só͘-chāi, i ê chèng peh-sìⁿ tī i ê bōng ê sì-chiu-ûi, lóng sī siū-thâi tó tī to-ē--ê; in bat tī o̍ah-lâng ê tōe hō͘ lâng kiaⁿ-hiâⁿ.

24

Í-lân ia̍h tī-hia, i ê chèng peh-sìⁿ tī i ê bōng ê sì-ûi, lóng-sī siū-thâi, tó tī to-ē, bô siū kat-lé lo̍h-khì tōe-ē chhim ê só͘-chāi--ê; in bat tī o̍ah-lâng ê tōe hō͘ lâng kiaⁿ-hiâⁿ, koh kap lo̍h-khiⁿ ê lâng saⁿ-kap tam-tng lêng-jio̍k.

25

In kā i kap i ê chèng peh-sìⁿ, tī siū-thâi ê lâng ê tiong-kan, an bîn-chhn̂g; in ê bōng tī i ê sì-chiu-ûi; in lóng sī bô siū kat-lé, siū to thâi--ê; in bat tī o̍ah-lâng ê tōe hō͘ lâng kiaⁿ-hiâⁿ, koh kap lo̍h-khiⁿ ê lâng saⁿ-kap tam-tng lêng-jio̍k; i í-keng hē tī siū-thâi ê lâng ê tiong-kan.

26

Bí-siat, Thó͘-pa, kap i ê chèng peh-sìⁿ, lóng tī-hia; i ê bōng lóng tī i ê sì-ûi, in lóng sī bô siū kat-lé, hō͘ to thâi--ê; in bat tī o̍ah-lâng ê tōe, hō͘ lâng kiaⁿ-hiâⁿ.

27

In bōe tit-tio̍h kap hiah ê bô siū kat-lé tó-teh ê ióng-sū, saⁿ-kap tó-teh; chiah ê ióng-sū tòa ke-si lo̍h im-kan; thâu-khak khùn tī to-kiàm, kut-thâu-téng ū in ê chōe-ok; in bat tī o̍ah-lâng ê tōe hō͘ ióng-sū kiaⁿ-hiâⁿ.

28

Lí beh pāi-hōai tī bô siū kat-lé ê lâng ê tiong-kan, kap hiah-ê siū to thâi ê lâng saⁿ-kap tó-teh.

29

Í-tong ia̍h tī-hia, i hiah ê kok-ông kap it-chhè ê siú-léng, sui-jiân ū sè-le̍k, iû-gôan hē tī siū-thâi ê lâng ê tiong-kan; in beh kap bô siū kat-lé--ê, í-kı̍p lo̍h-khiⁿ ê lâng saⁿ-kap tó-teh.

30

Tī-hia ū pak-hng chèng-ông ê kiáⁿ, kap it-chhè Se-tùn lâng, lóng kap siū-thâi ê lâng lo̍h-khì; in sui-jiân ū sè-le̍k, hō͘ lâng kiaⁿ-hiâⁿ, iû-gôan siū kiàn-siàu; in bô siū kat-lé, kap siū to thâi--ê saⁿ-kap tó-teh, kap lo̍h-khiⁿ ê lâng saⁿ-kap tam-tng lêng-jio̍k.

31

Hoat-ló kap i ê kun-peng lóng hō͘ to thâi--sí; Hoat-ló khòaⁿ-kìⁿ, ūi-tio̍h i hiah ê chèng-lâng chiū siū an-ùi; che sī Chú Iâ-hô-hoa kóng--ê.

32

Góa hō͘ i tī o̍ah-lâng ê tōe, chòe thang kiaⁿ-hiâⁿ; Hoat-ló kap i ê chèng-lâng, beh kap siū to thâi ê lâng saⁿ-kap hē tī bô siū kat-lé ê lâng ê tiong-kan; che sī Chú Iâ-hô-hoa kóng--ê.