I-se-kiat 第 33 章 - 巴克禮全羅

1

Iâ-hô-hoa ê ōe lîm-kàu góa kóng,

2

Jîn-chú ah, lí tio̍h tùi pún-kok ê peh-sìⁿ kóng-ōe, kā in kóng, Góa hō͘ to-kiàm lîm-kàu chı̍t-kok ê sî, hí chı̍t-kok ê peh-sìⁿ tùi in tiong-kan kéng chı̍t-lâng, siat-lı̍p i chòe siú-bāng ê;

3

i khòaⁿ-kìⁿ to-kiàm lîm-kàu hit só͘-chāi, nā pûn sàu-kak kéng-kài chèng peh-sìⁿ;

4

kìⁿ-nā thiaⁿ-kìⁿ sàu-kak ê siaⁿ, bô siū kéng-kài--ê, to-kiàm nā lâi châu-bia̍t i, i ê chōe beh kui tī i ê thâu-khak-téng.

5

I thiaⁿ-kìⁿ sàu-kak ê siaⁿ, bô siū kéng-kài, i ê chōe beh kui tī i pún-sin; i nā siū kéng-kài, chiū ōe kiù ka-kī ê sìⁿ-miā.

6

Siat-sú siú-bāng ê lâng khòaⁿ-kìⁿ to-kiàm kàu, bô pûn sàu-kak, tì-kàu peh-sìⁿ bô siū kéng-kài, to-kiàm lâi thâi-sí in tiong-kan ê chı̍t-lâng, hit ê lâng sui-jiân sí tī i ê chōe, chóng-sī Góa beh tùi siú-bāng ê lâng thó i sit-lo̍h sìⁿ-miā ê chōe.

7

Jîn-chú ah, Góa án-ni siat-lı̍p lí chòe Í-sek-lia̍t-ke siú-bāng ê lâng, só͘-í lí tio̍h thiaⁿ Góa chhùi-lāi só͘ kóng ê ōe, thòe Góa kéng-kài in.

8

Góa tùi pháiⁿ-lâng kóng, Pháiⁿ-lâng ah, lí tek-khak ōe sí; lí nā bô khui-chhùi kéng-kài pháiⁿ-lâng, hō͘ i lī-khui só͘ kiâⁿ ê lō͘; chit ê pháiⁿ-lâng beh sí tī i ê chōe, chóng-sī Góa beh tùi lí thó i sit-lo̍h sìⁿ-miā ê chōe.

9

Siat-sú lí kéng-kài pháiⁿ-lâng o̍at-tńg lī-khui só͘ kiâⁿ ê lō͘; i iû-gôan m̄ o̍at-tńg lī-khui, i beh sí tī i ê chōe, lí chiū ōe kiù lí ê o̍ah-miā.

10

Jîn-chú ah, lí tio̍h tùi Í-sek-lia̍t-ke kóng, Lín siông-siông án-ni kóng, Góan ê kè-sit góan ê chōe-ok, tī góan ê sin-chiūⁿ; góan sī in-ūi án-ni chiām-chiām siau-bô, thái-thó ōe o̍ah ah?

11

Lí tio̍h tùi in kóng, Chú Iâ-hô-hoa kóng, Góa kí Góa ê éng-o̍ah lâi chiù-chōa, Góa tòan-tòan bô hoaⁿ-hí pháiⁿ-lâng sí-bô, to̍k-to̍k hoaⁿ-hí pháiⁿ-lâng o̍at-tńg lī-khui só͘ kiâⁿ ê lō͘ lâi o̍ah; Í-sek-lia̍t-ke ah, lín tio̍h o̍at-tò-tńg, lī-khui pháiⁿ-lō͘, lín siáⁿ-sū beh chhú-sí ah?

12

Jîn-chú ah, lí tio̍h tùi lí ê peh-sìⁿ kóng, Gī-lâng ê gī, tī i hōan-chōe ê jı̍t bōe-ōe kiù i; lūn-kàu pháiⁿ-lâng ê pháiⁿ, tī i o̍at-tńg lī-khui i ê pháiⁿ só͘ kiâⁿ ê jı̍t, ia̍h bōe-ōe hō͘ i po̍ah-tó; gī-lâng tī hōan-chōe ê jı̍t, iā bōe-ōe in-ūi i ê gī lâi tit-tio̍h o̍ah.

13

Góa tùi gī-lâng kóng, i tek-khak o̍ah; i nā óa-khò i ê gī lâi kiâⁿ-pháiⁿ, chiū i só͘-kiâⁿ ê gī, lóng bô tit-tio̍h kì-liām; i beh in-ūi só͘ kiâⁿ ê pháiⁿ lâi sí.

14

Koh, Góa tùi pháiⁿ-lâng kóng, Lí tek-khak sí, i nā o̍at-tńg lī-khui i ê chōe, kiâⁿ chèng-tı̍t kap ha̍p-lí ê sū;

15

koh hêng lâng ê tǹg-thâu kap só͘ chhiúⁿ lâng ê mı̍h, chun-thàn o̍ah-miā ê lu̍t-lē, bô koh chòe pháiⁿ, i tek-khak o̍ah, bô tì-kàu sí.

16

I só͘ hōan it-chhè ê chōe, bô koh kā i kì-tit; i kiâⁿ chèng-tı̍t kap ha̍p-lí ê sū, tek-khak ōe o̍ah.

17

Lí ê peh-sìⁿ iáu teh kóng, Chú ê lō͘ bô kong-pêng, kî-sı̍t sī in ê lō͘ bô kong-pêng.

18

Gī-lâng o̍at-tńg lī-khui i ê gī, lâi kiâⁿ-pháiⁿ; chiū beh in-ūi án-ni lâi sí.

19

Pháiⁿ-lâng o̍at-tńg lī-khui i ê pháiⁿ, kiâⁿ chèng-tı̍t kap ha̍p-lí ê sū; chiū beh in-ūi án-ni lâi o̍ah.

20

Lín iáu teh kóng, Chú ê lō͘ bô kong-pêng; Í-sek-lia̍t-ke ah, Góa beh chiàu lín ta̍k-lâng só͘-kiâⁿ--ê, sím-phòaⁿ lín.

21

Góan siū lia̍h ê liáu-āu cha̍p-jī-nî, cha̍p-ge̍h chhoe-gō͘, ū chı̍t-lâng tùi Iâ-lō͘-sat-léng tô-cháu kàu góa chia; kóng, Siâⁿ í-keng kong-phòa.

22

Tô-cháu ê lâng iáu-bē kàu, chêng chı̍t-jı̍t ê ê-hng, Iâ-hô-hoa ê chhiú hē tī góa ê sin-chiūⁿ; khui góa ê chhùi; kàu keh chá-khí, hit lâng lâi kàu góa chia; góa ê chhùi chiū khui, bô koh é-káu.

23

Iâ-hô-hoa ê ōe lîm-kàu góa kóng,

24

Jîn-chú ah, tiàm tī Í-sek-lia̍t hong-hòe ê tōe ê lâng teh kóng, A-pek-la̍h-hán to̍k-to̍k chı̍t-lâng, ū tit-tio̍h chit ê tōe chòe-gia̍p; lán lâng-gia̍h chin-chōe, chit ê tōe sī hō͘ lán chòe-gia̍p--ê.

25

Só͘-í lí tio̍h kā in kóng, Chú Iâ-hô-hoa án-ni kóng, Lín chia̍h iáu ū huih ê bah, koh kia̍h-khí lín ê ba̍k-chiu, gióng-bōng lín ê ngó͘-siōng; koh thâi-lâng lâu-huih, lín iáu ōe tit-tio̍h chit ê tōe chòe-gia̍p mah?

26

Lín óa-khò lín ê to-kiàm, kiâⁿ khó-ò͘ⁿ ê sū; lâng-lâng phah lâ-sâm chhù-piⁿ ê bó͘; lín iáu ōe tit-tio̍h chit ê tōe chòe-gia̍p mah?

27

Lí tio̍h tùi in án-ni kóng, Chú Iâ-hô-hoa án-ni kóng, Góa kí Góa ê éng-o̍ah lâi chiù-chōa; tī pha-hng ê só͘-chāi--ê, beh tó tī to-ē, tī chhân-iá ê tiong-kan--ê, Góa beh kau in hō͘ iá-siù thun-chia̍h; tī ōe-só͘ kap tōng-lāi--ê, beh sí tī un-e̍k.

28

Góa beh hō͘ chit ê tōe léng-chēng, hō͘ lâng gông-ngia̍h; i in-ūi sè-le̍k ê kiau-ngō͘ iā beh soah; Í-sek-lia̍t chiah ê soaⁿ lóng beh léng-chēng, bô lâng keng-kè.

29

Góa in-ūi in só͘ kiâⁿ it-chhè khó-ò͘ⁿ ê sū, hō͘ tōe pha-hng; tì-kàu lâng gông-ngia̍h; hit-sî in chiū chai Góa sī Iâ-hô-hoa.

30

Jîn-chú ah, Lí ê peh-sìⁿ tī chhù-piⁿ, tī chhù mn̂g-kháu, tâm-lūn lí; hiaⁿ-tī tùi hiaⁿ-tī saⁿ-kap kóng, Lâi ah, lâi thiaⁿ, thiaⁿ-khòaⁿ Iâ-hô-hoa ê ōe sī kóng sím-mı̍h.

31

In lâi lí chia, chhin-chhiūⁿ peh-sìⁿ lâi chū-hōe; chē tī lí ê bīn-chêng, chhin-chhiūⁿ sī Góa ê peh-sìⁿ; in thiaⁿ lí ê ōe, ia̍h bô khì-kiâⁿ; in-ūi in ê chhùi hián-chhut chōe-chōe chhin-ài, chóng-sī sim sī teh jı̍p chîⁿ.

32

Khòaⁿ ah, in khòaⁿ lí chhin-chhiūⁿ gâu chok-ga̍k, hó siaⁿ-im ê lâng só͘ chhiùⁿ ê ngá-ko; in thiaⁿ lí ê ōe iā bô khì kiâⁿ.

33

Khòaⁿ ah, só͘ kóng ê ōe kín-kín beh chiâⁿ; kàu chiâⁿ ê sî, in chiū chai bat ū sian-ti tī in tiong-kan.