I-se-kiat 第 34 章 - 巴克禮全羅

1

Iâ-hô-hoa ê ōe lîm-kàu góa kóng,

2

Jîn-chú ah, lí tio̍h soan-thôan kong-kek Í-sek-lia̍t chiah ê bo̍k-chiá; lí tio̍h soan-thâon lâi tùi in kóng, Chú Iâ-hô-hoa tùi chiah ê bo̍k-chiá án-ni kóng, Chai-ē ah, Í-sek-lia̍t chiah ê bo̍k-chiá, in-ūi in iúⁿ-chhī ka-kī; bo̍k-chiá kiám m̄ eng-kai iúⁿ-chhī iûⁿ-kûn mah?

3

Lín chia̍h i ê iû, chhēng i ê mn̂g, thâi i ê pûi--ê, iā bô iúⁿ-chhī iûⁿ-kûn.

4

Lóan-jio̍k--ê, lín bô kò͘ hō͘ i ióng; phòa-pīⁿ--ê, lín bô kā i i-tī; siū-siong--ê, lín bô kā i pau; siū kóaⁿ-tio̍k--ê, lín bô chhōa i tò--lâi, sit-lo̍h--ê, lín bô chhē--i; to̍k-to̍k ēng kiông-pō, giâm-giâm ê kóan-hat.

5

In-ūi bô bo̍k-chiá, iûⁿ chiū sì-sòaⁿ; í-keng sì-sòaⁿ, chiū chòe it-chhè iá-siù ê chia̍h-mı̍h.

6

Góa ê iûⁿ sì-kòe kiâⁿ tī chiah ê soaⁿ--nih, tī ta̍k-ê kôaiⁿ ê soaⁿ-téng, sì-sòaⁿ tī chôan-tōe, bô lâng khì tui, bô lâng khì chhē.

7

Só͘-í lín chiah ê bo̍k-chiá tio̍h thiaⁿ Iâ-hô-hoa ê ōe.

8

Chú Iâ-hô-hoa kóng, Góa kí Góa ê éng-o̍ah lâi chiù-chōa, Góa ê iûⁿ in-ūi bô bo̍k-chiá, chiū chiâⁿ-chòe siū-chhiúⁿ ê mı̍h, iûⁿ iā chòe it-chhè iá-siù ê chia̍h-mı̍h; iā Góa ê bo̍k-chiá bô chhē Góa ê iûⁿ; chiah ê bo̍k-chiá in-ūi in iúⁿ-chhī ka-kī, bô iúⁿ-chhī Góa ê iûⁿ;

9

só͘-í lín chiah ê bo̍k-chiá tio̍h thiaⁿ Iâ-hô-hoa ê ōe;

10

Chú Iâ-hô-hoa án-ni kóng, Góa kap bo̍k-chiá chòe tùi-te̍k, beh tùi in ê chhiú tui-thó Góa ê iûⁿ, hō͘ in bô koh iúⁿ-chhī iûⁿ-kûn; bo̍k-chiá iā bô koh iúⁿ-chhī ka-kī; Góa beh kiù Góa ê iûⁿ thoat-lī in ê chhùi, bô koh chòe in ê chia̍h-mı̍h.

11

In-ūi Chú Iâ-hô-hoa án-ni kóng, Khòaⁿ ah, Góa, Góa beh pún-sin chhē Góa ê iûⁿ, lâi chhē-tio̍h--i.

12

Bo̍k-chiá tī iûⁿ-kûn sì-sòaⁿ ê jı̍t, cháiⁿ-iūⁿ chhē i ê iûⁿ, Góa iā beh chhin-chhiūⁿ án-ni chhē Góa ê iûⁿ; chiah ê iûⁿ tī ba̍t-hûn o͘-àm ê jı̍t, sì-sòaⁿ kàu ta̍k só͘-chāi, Góa beh tùi-hia kiù in tò--lâi.

13

Góa beh tùi lia̍t-kok-tiong chhōa in chhut, tùi ta̍k-kok ê lāi-bīn chū-chı̍p in, chhōa in tò-lâi in ê pún só͘-chāi; iā beh tī Í-sek-lia̍t soaⁿ chiah ê khoe-piⁿ, kéng-lāi it-chhè thang khiā-khí ê só͘-chāi, lâi iúⁿ-chhī in.

14

Góa beh tī hó-hó ê chháu-tiûⁿ iúⁿ-chhī in, in ê iûⁿ-tiâu beh tī Í-sek-lia̍t kôaiⁿ-ūi ê soaⁿ; in beh tī hó-hó ê iûⁿ-tiâu-lāi tó-teh-khùn, iā tī Í-sek-lia̍t soaⁿ pûi-súi ê chháu-tiûⁿ chia̍h-chháu.

15

Chú Iâ-hô-hoa kóng, Góa beh pún-sin iúⁿ-chhī Góa ê iûⁿ, hō͘ in tó-teh-khùn.

16

Sit-lo̍h--ê Góa beh chhē i; siū kóaⁿ-tio̍k--ê, Góa beh chhōa i tò-lâi; siū-siong--ê Góa beh pau--i; phòa-pīⁿ--ê, Góa beh i-tī i; to̍k-to̍k pûi--ê, ióng--ê, Góa beh tû-biat--i, iā beh péng-kong iúⁿ-chhī in.

17

Góa ê iûⁿ-kûn ah, lūn-kàu lín, Chú Iâ-hô-hoa án-ni kóng, Góa beh tī iûⁿ kap iûⁿ ê tiong-kan, kang ê mî-iûⁿ kap kang ê soaⁿ-iûⁿ ê tiong-kan, kiâⁿ phòaⁿ-tòan.

18

Lí tī hó-hó ê chháu-tiûⁿ chia̍h-chháu, iáu lia̍h-chòe sió-khóa sū mah? chhun ê chháu lín kéng-jiân ēng kha thún-ta̍h--i? lín lim chheng ê chúi; chhun--ê lín kéng-jiân ēng kha phah-lô--i?

19

Lūn-kàu Góa ê iûⁿ sī chia̍h lín ēng kha ta̍h--ê, lim lín ēng kha phah-lô--ê.

20

Só͘-í Chú Iâ-hô-hoa tùi in án-ni kóng, Khòaⁿ ah, Góa pún-sin tī pûi ê iûⁿ kap sán ê iûⁿ ê tiong-kan, kiâⁿ phòaⁿ-tòan.

21

In-ūi lín ēng sin-khu, ēng keng-thâu khoeh--in, ēng lín ê kak tak phòa-pīⁿ--ê, tì-kàu hō͘ in sì-sòaⁿ tī gōa-bīn.

22

Só͘-í Góa beh chín-kiù Góa ê iûⁿ-kûn, bô koh chòe siū chhiúⁿ ê mı̍h; Góa ia̍h beh tī iûⁿ kap iûⁿ ê tiong-kan kiâⁿ phòaⁿ-tòan.

23

Góa beh siat-lı̍p chı̍t ê bo̍k-chiá, chiàu-kò͘ in, i beh iúⁿ-chhī in; chiū-sī Góa ê lô͘-po̍k Tāi-pı̍t; i beh iúⁿ-chhī in, chòe in ê bo̍k-chiá.

24

Góa Iâ-hô-hoa beh chòe in ê Siōng-tè; Góa ê lô͘-po̍k Tāi-pı̍t beh tī in ê tiong-kan chòe siú-léng; che sī Góa Iâ-hô-hoa kóng--ê.

25

Góa beh kap in lı̍p pêng-an ê iok, hō͘ ok-siù tùi kéng-lāi tōan-cho̍at; in chiū beh an-jiân khiā-khí tī khòng-iá, khùn tī chhiū-nâ-lāi.

26

Góa beh hō͘ in kap Góa ê soaⁿ sì-ûi ê só͘-chāi chiâⁿ-chòe hok-khì ê gôan-thâu; Góa ia̍h beh chiàu-sî lo̍h-hō͘, beh ū si hok-khì ê tōa-hō͘.

27

Chhân-iá ê chhiū beh kiat ké-chí; tōe iā beh chhut-sán; in beh an-jiân khiā-khí tī pún só͘-chāi; Góa at-chı̍h in só͘ pē ê taⁿ, kiù in thoat-lī hit ê lia̍h in chòe lô͘-châi ê lâng ê chhiú; hit-sî in chiū chai Góa sī Iâ-hô-hoa.

28

In bô koh chòe gōa-pang lâng só͘ chhiúⁿ ê mı̍h, tōe-chiūⁿ ê iá-siù iā bô koh thun-chia̍h in; sī beh an-jiân khiā-khí, bô lâng hō͘ in kiaⁿ-hiâⁿ.

29

Góa beh kā in heng-khí chı̍t ê chhut-miâ chai-chèng ê só͘-chāi; in tī kéng-lāi, bô koh hō͘ ki-hng só͘ bia̍t; iā bô koh siū-tio̍h gōa-pang-lâng ê lêng-jio̍k.

30

In beh chai Góa Iâ-hô-hoa in ê Siōng-tè, sī kap in tī-teh; iā chai in Í-sek-lia̍t-ke sī Góa ê peh-sìⁿ; che sī Chú Iâ-hô-hoa kóng--ê.

31

Lín sī Góa ê iûⁿ, sī Góa chháu-tiûⁿ ê iûⁿ; lín sī lâng; Góa iā sī lín ê Siōng-tè; che sī Chú Iâ-hô-hoa kóng--ê.