I-se-kiat 第 35 章 - 巴克禮全羅

1

Iâ-hô-hoa ê ōe lîm-kàu góa kóng,

2

Jîn-chú ah, lí tio̍h bīn ǹg Se-jíⁿ soaⁿ, soan-thôan lâi kong-kek i.

3

Tùi i kóng, Chú Iâ-hô-hoa án-ni kóng, Khòaⁿ ah, Se-jíⁿ soaⁿ ah, Góa kap lí chòe tùi-te̍k, Góa beh chhun-chhiú kong-kek lí; hō͘ lí léng-chēng, thang hō͘ lâng gông-ngia̍h.

4

Góa beh hō͘ lí chiah ê siâⁿ pìⁿ-chòe pha-hng, hō͘ lí léng-chēng; lí chiū chai Góa sī Iâ-hô-hoa.

5

In-ūi lí khǹg éng-óan ê òan-hūn; tī Í-sek-lia̍t cho̍k tú-tio̍h chai-ē, chōe-kòa kiat-kio̍k ê sî, lí chiong in kau hō͘ to-kiàm ê sè-le̍k.

6

Só͘-í Chú Iâ-hô-hoa án-ni kóng, Góa chí Góa ê éng-o̍ah lâi chiù-chōa, Góa tek-khak hō͘ lí tú-tio̍h lâu-huih ê pò-èng; chōe tek-khak tui-kóaⁿ lí; lí í-keng bô òan-hūn thâi lâng lâu huih, só͘-í chit ê chōe tek-khak tui-jip lí.

7

Góa beh hō͘ Se-jíⁿ-soaⁿ pha-hng léng-chēng; tùi-hia óng-lâi ê lâng Góa beh chián-tû i.

8

Góa beh hō͘ i hiah ê soaⁿ, siū thâi ê lâng móa-móa; hō͘ to-kiàm thâi-sí--ê beh tó tī lí ê sió-soaⁿ, kap soaⁿ-kok, kap it-chhè ê khiⁿ-kau.

9

Góa beh hō͘ lí éng-óan pha-hng, lí chiah ê siâⁿ tek-khak bô lâng khiā-khí; chiū lín tek-khak chai Góa sī Iâ-hô-hoa.

10

In-ūi lín kóng, Chí nn̄g-kok nn̄g ê tōe-hng, lóng beh kui góa, góan beh tit-tio̍h; kî-sı̍t Iâ-hô-hoa tī-hia.

11

Só͘-í Chú Iâ-hô-hoa án-ni kóng, Góa kí Góa ê éng-o̍ah lâi chiù-chōa; Góa beh chiàu lí ê siū-khì, kap chiàu lí ūi-tio̍h òan-hūn lâi kiâⁿ tī in ê òan-tò͘, khóan-thāi lí; chiū Góa sím-phòaⁿ lí ê sî beh hián-bêng ka-kī tī in tiong-kan.

12

Lí chiū chai Góa Iâ-hô-hoa í-keng thiaⁿ-kìⁿ lí kong-kek Í-sek-lia̍t chiah ê soaⁿ só͘ kóng ê pòng-to̍k, sī kóng, Pha-hng lah, in í-keng kau tī góan, hō͘ góan thang thun i.

13

Koh lín ēng chhùi ǹg Góa lâi ka-kī khoa-kháu; ke-thiⁿ lín chiah ê ōe lâi kong-kek Góa; Góa thiaⁿ-kìⁿ lah.

14

Chú Iâ-hô-hoa án-ni kóng, Tng chôan-tōe hoaⁿ-hí ê sî, Góa beh hō͘ lí pha-hng.

15

Lí in-ūi Í-sek-lia̍t-ke ê ki-gia̍p pha-hng, lâi hoaⁿ-hí; Góa iā beh án-ni khóan-thāi lí; Se-jíⁿ soaⁿ ah, lí beh pha-hng, í-kı̍p Í-tong chôan-tōe iā án-ni; in chiū chai Góa sī Iâ-hô-hoa.