I-se-kiat 第 36 章 - 巴克禮全羅

1

Jîn-chú ah, lí tio̍h tùi Í-sek-lia̍t chiah ê soaⁿ lâi soan-thôan, kóng, Í-sek-lia̍t chiah ê soaⁿ ah, tio̍h thiaⁿ Iâ-hô-hoa ê ōe.

2

Chú Iâ-hô-hoa án-ni kóng, In-ūi tùi-te̍k kong-kek lí kóng, Hō͘--chāi, kó͘-chá kôaiⁿ ê só͘-chāi lóng hō͘ góan chòe-gia̍p lah.

3

Só͘-í lí tio̍h soan-thôan kóng, Chú Iâ-hô-hoa án-ni kóng, In-ūi in hō͘ lí pha-hng, tī sì-ûi thun-kā lí; beh hō͘ lí kui tī só͘ chhun ê gōa-pang-lâng chòe gia̍p; iā hō͘ kāu-kháu-sia̍t ê lâng gī-lūn lí, hō͘ chèng peh-sìⁿ húi-pòng lí;

4

só͘-í Í-sek-lia̍t chiah ê soaⁿ ah, tio̍h thiaⁿ Chú Iâ-hô-hoa ê ōe: Chú Iâ-hô-hoa tùi chiah ê soaⁿ, chiah ê niá, chiah ê khiⁿ-kau, chiah ê soaⁿ-kok, chiah ê pha-hng ê só͘-chāi, siū khì-sak ê siâⁿ, hō͘ sì-ûi só͘ chhun ê gōa-pang-lâng chhiúⁿ-kiap ki-chhì--ê, án-ni kóng;

5

só͘-í Chú Iâ-hô-hoa án-ni kóng, Góa sı̍t-chāi tī jia̍t-jia̍t ê òan-tò͘, ēng ōe chek-pī lia̍t-pang só͘ chhun--ê í-kı̍p Í-tong ê chôan-tōe; in-ūi in hun-phài Góa ê tōe chòe ka-kī ê gia̍p; móa-sim hoaⁿ-hí, sîn-hûn biáu-sī; ài kóaⁿ-tio̍k i ê peh-sìⁿ, lâi chhiúⁿ-kiap--i.

6

Só͘-í lí tio̍h lūn Í-sek-lia̍t tōe lâi soan-thôan; tùi i chiah ê soaⁿ, chiah ê niá, chiah ê khiⁿ-kau, chiah ê soaⁿ-kok kóng, Chú Iâ-hô-hoa án-ni kóng, Khòaⁿ ah, Góa tī góa ê òan-tò͘, kap Góa ê tōa siū-khì lâi kóng, in-ūi lí í-keng siū īⁿ-pang lâng ê lêng-jio̍k;

7

só͘-í Chú Iâ-hô-hoa án-ni kóng, Góa kú-khí Góa ê chhiú, kóng, Tī lín sì-ûi ê īⁿ-pang lâng, in sı̍t-chāi beh siū in ê lêng-jio̍k.

8

To̍k-to̍k lín Í-sek-lia̍t chiah ê soaⁿ ah, lín tek-khak hoat-chhut lín ê ki-ōaiⁿ, koh beh kiat ké-chí hō͘ Góa ê peh-sìⁿ Í-sek-lia̍t; in-ūi in kūn-kūn beh kàu lah.

9

Khòaⁿ ah, Góa sī ūi lín ê, góa beh o̍at-tńg ǹg lín, chiū lín beh hō͘ lâng chèng-choh.

10

Góa koh beh ke-thiⁿ lâng tī lín ê téng-bīn, chiū-sī Í-sek-lia̍t ke-ke hō͘-hō͘, it-chhè lóng án-ni; chiū i chiah ê siâⁿ beh ū lâng khiā-khí; pha-hng ê só͘-chāi tit-tio̍h khí-chō.

11

Góa iā beh ke-thiⁿ lâng kap cheng-siⁿ tī lín ê téng-bīn; in beh siⁿ-thòaⁿ chin-chōe; Góa beh hō͘ lín chiàu-kū ū lâng khiā-khí; koh beh hó khóan-thāi lín, iâⁿ-kè khí-thâu ê sî; lín chiū chai Góa sī Iâ-hô-hoa.

12

Góa beh hō͘ lâng kiâⁿ tī lín ê téng-bīn, chiū-sī Góa ê peh-sìⁿ Í-sek-lia̍t; in beh tit-tio̍h lí, lí beh chòe in ê gia̍p; lí iā bô koh hō͘ in cho̍at-sû.

13

Chú Iâ-hô-hoa án-ni kóng, In-ūi lâng tùi lín kóng, Lí sī thun-chia̍h lâng--ê, koh hō͘ peh-sìⁿ cho̍at-sû;

14

só͘-í Chú Iâ-hô-hoa án-ni kóng, Lí bô beh koh thun-chia̍h lâng, ia̍h bô beh koh hō͘ lí ê kok-bîn cho̍at-sû.

15

Góa bô beh hō͘ lí koh thiaⁿ-kìⁿ gōa-pang lâng ê lêng-jio̍k, lí iā bô koh siū bān peh-sìⁿ ê húi-pòng, lí iā bô koh hō͘ lí ê kok-bîn tio̍h-tak; che sī Chú Iâ-hô-hoa kóng--ê.

16

Iâ-hô-hoa ê ōe koh lîm-kàu góa kóng,

17

Jîn-chú ah, Í-sek-lia̍t-ke, khiā-khí tī pún só͘-chāi ê sî, ēng in ê só͘-kiâⁿ só͘-chòe, phah lâ-sâm--i; in ê só͘-kiâⁿ tī Góa ê bīn-chêng sī chhin-chhiūⁿ hū-jîn-lâng keng-kî kàu ê lâ-sâm.

18

In-ūi in tī hit ê só͘-chāi lâu lâng ê huih, koh in-ūi in ēng ngó͘-siōng phah lâ-sâm--i; só͘-í Góa piàⁿ-chhut Góa ê siū-khì tī i ê téng-bīn.

19

Góa hun-sòaⁿ in tī lia̍t-kok, in chiū sì-sòaⁿ tī lia̍t-pang-tiong; Góa chiū chiàu in ê só͘-kiâⁿ, in ê só͘-chòe lâi sím-phòaⁿ--in.

20

In khì kàu in só͘ kàu ê gōa-pang lâng hia, siat-to̍k Góa ê sèng-miâ; in-ūi lâng chí in lâi kóng, Che sī Iâ-hô-hoa ê peh-sìⁿ, tùi I ê tōe chhut-lâi--ê.

21

Chóng-sī Góa pó-sioh Góa ê sèng-miâ; chiū-sī Í-sek-lia̍t-ke, tī in só͘ kàu ê lia̍t-kok-tiong, só͘ siat-to̍k--ê.

22

Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Í-sek-lia̍t-ke ah, Góa kiâⁿ chit-ê, m̄-sī ūi-tio̍h lín ê iân-kò͘, chiū-sī ūi-tio̍h Góa ê sèng-miâ ê iân-kò͘; chiū-sī lín kiâⁿ-kàu ê lia̍t-kok-tiong só͘ siat-to̍k--ê.

23

Góa ê tōa-miâ siū siat-to̍k tī īⁿ-pang-tiong, chiū-sī lín só͘ siat-to̍k tī in tiong-kan--ê; Góa beh hō͘ i chòe-sèng; koh Góa tùi lín hián-bêng ka-kī chòe-sèng tī in ê ba̍k-chiu-chêng; chiū īⁿ-pang-lâng beh chai Góa sī Iâ-hô-hoa; che sī Chú Iâ-hô-hoa só͘ kóng--ê.

24

Góa beh tòa lín chhut lia̍t-pang, tùi lia̍t-kok-tiong chū-chı̍p lín, chhōa lín jı̍p lín ê pún só͘-chāi.

25

Góa iā beh ēng chheng ê chúi hiù lín, lín chiū chheng-khì; Góa beh sóe-chheng lín, tû-khì lín it-chhè ê lâ-sâm, kap lín it-chhè ê ngó͘-siōng.

26

Góa beh ēng sin ê sim siúⁿ-sù lín; iā beh ēng sin ê sîn hē tī lín ê lāi-bīn; koh beh tùi lín ê jio̍k-thé-tiong tû-khì chhin-chhiūⁿ chio̍h ê sim, siúⁿ-sù lín chhin-chhiūⁿ bah ê sim.

27

Góa beh chiong Góa ê sîn hē tī lín ê lāi-bīn, hō͘ lín sūn-thàn Góa ê lu̍t-lē, siú Góa ê hoat-tō͘ lâi kiâⁿ--i.

28

Lín beh khiā-khí tī Góa só͘ siúⁿ-sù lín ê lia̍t-chó͘ ê tōe; lín beh chòe Góa ê peh-sìⁿ, Góa beh chòe lín ê Siōng-tè.

29

Góa beh kiù lín thoat-lī lín it-chhè ê ù-òe; iā beh kiò ngó͘-kok hō͘ i hong-sēng, bô hō͘ lín tú-tio̍h ki-hng.

30

Góa beh ke-thiⁿ chhiū-ba̍k ê ké-chí, í-kı̍p chhân-hn̂g ê thó͘-sán; hō͘ lín bô koh in-ūi ki-hng siū gōa-pang-lâng ê lêng-jio̍k.

31

Hit-sî lín beh kì-tit lín ê pháiⁿ só͘-kiâⁿ, kap lín m̄-hó ê só͘-chòe; chiū in-ūi lín ê chōe-kòa, kap khó-ò͘ⁿ ê sū, tī ka-kī ê bīn-chêng lâi iàm-chiān ka-kī.

32

Chú Iâ-hô-hoa kóng, Lín tio̍h chai Góa án-ni kiâⁿ m̄-sī ūi-tio̍h lín ê iân-kò͘; Í-sek-lia̍t-ke ah, lín tio̍h ūi ka-kī ê só͘-kiâⁿ, lâi làu-khùi kiàn-siàu.

33

Chú Iâ-hô-hoa án-ni kóng, Góa sóe-chheng lín, tû-khì lín it-chhè chōe-kòa ê jı̍t, beh hō͘ lín ê siâⁿ ū lâng khiā-khí, pha-hng ê só͘-chāi tit-tio̍h khí-chō.

34

Chêng kè-lō͘ ê lâng khòaⁿ-chòe hong-hòe ê tōe, taⁿ chit ê hong-hòe ê tōe koh ū lâng chèng-choh.

35

Lâng beh kóng, Chêng chòe hong-hòe ê tōe, taⁿ chhin-chhiūⁿ Ai-tiân ê hn̂g; chit ê hong-hòe, léng-chēng, húi-hōai ê siâⁿ, taⁿ khí chin kian-kò͘, ū lâng khiā-khí.

36

Hit-sî tī lín sì-ûi só͘ chhun ê gōa-pang-lâng, beh chai Góa Iâ-hô-hoa khí-chō hiah ê tó-hōai ê só͘-chāi, chai-pôe hong-hòe ê tōe; Góa Iâ-hô-hoa í-keng kóng--i, tek-khak chiâⁿ--i.

37

Chú Iâ-hô-hoa án-ni kóng, Góa beh hō͘ Í-sek-lia̍t-ke ūi-tio̍h chit ê sū kiû Góa, tì-kàu Góa kā in chiâⁿ; Góa beh ke-thiⁿ in ê lâng-gia̍h, chhin-chhiūⁿ iûⁿ-kûn.

38

Chhin-chhiūⁿ hiàn-chè ê iûⁿ-kûn, chiū-sī chhin-chhiūⁿ Iâ-lō͘-sat-léng siú-choeh ê sî ê iûⁿ-kûn; án-ni, chiah ê pha-hng ê siâⁿ, tek-khak ū kui-kûn lâng móa-móa; in chiū chai Góa sī Iâ-hô-hoa.