I-se-kiat 第 37 章 - 巴克禮全羅

1

Iâ-hô-hoa ê chhiú hē tī góa ê sin-chiūⁿ, Iâ-hô-hoa ēng I ê sîn chhōa góa chhut-khì, hē góa tī soaⁿ-kok-tiong; hit ê soaⁿ-kok ū kut-thâu móa-móa.

2

I hō͘ góa tùi kut-thâu ê sì-ûi keng-kè; khòaⁿ ah, tī soaⁿ-kok ê bīn-chiūⁿ ū kut-thâu chin-chōe, khòaⁿ ah, in chin ko͘-tâ.

3

I tùi góa kóng, Jîn-chú ah, chiah ê kut ōe o̍ah bōe? Góa ìn kóng, Chú Iâ-hô-hoa ah, Lí chai--i.

4

I koh tùi góa kóng, Lí tio̍h tùi chiah ê kut soan-thôan, lâi kā in kóng, Lín ko͘-tâ ê kut ah, tio̍h thiaⁿ Iâ-hô-hoa ê ōe.

5

Chú Iâ-hô-hoa kā chiah ê kut án-ni kóng, Khòaⁿ ah, Góa beh hō͘ o̍ah-khì jı̍p lín ê lāi-bīn, lín chiū beh o̍ah.

6

Góa beh hō͘ lín ê téng-bīn ū kun, koh hō͘ lín ū bah, koh ēng phê kā lín pau, ēng o̍ah-khì jı̍p tī lín, lín chiū ōe o̍ah; lín chiū chai Góa sī Iâ-hô-hoa.

7

Tùi án-ni, góa thàn bēng-lēng lâi soan-thôan; tng góa teh soan-thôan ê sî, ū siaⁿ, hut-jiân tōe-tāng, chiah ê kut saⁿ liân-ha̍p, ta̍k-ki kui i ê pún-ūi.

8

Góa khòaⁿ i, khòaⁿ-kìⁿ kut ê téng-bīn ū kun, iā ū bah, koh ū phê pau tī i ê téng-bīn; chóng-sī lāi-bīn bô o̍ah-khì.

9

I chiū tùi góa kóng, Lí tio̍h ǹg hong lâi soan-thôan; jîn-chú ah, tio̍h soan-thôan, lâi tùi hong kóng, Chú Iâ-hô-hoa án-ni kóng, O̍ah-khì ah, tùi hiah ê hong lâi, pûn tī chiah ê siū-thâi--ê, hō͘ in ōe o̍ah.

10

Tùi án-ni, góa chiàu I só͘ bēng-lēng góa--ê lâi soan-thôan; o̍ah-khì chiū lâi, jı̍p tī in; in chiū o̍ah, khí--lâi khiā, chiâⁿ-chòe ke̍k-tōa ê kun-tūi.

11

I chiū kā góa kóng, Jîn-chú ah, chiah ê kut chiū-sī Í-sek-lia̍t ê chôan-ke; khòaⁿ ah, in kóng, Góan ê kut lóng ko͘-tâ, góan ê ǹg-bāng lóng sit-lo̍h; góan it-chīn châu-bia̍t.

12

Só͘-í lí tio̍h soan-thôan, lâi tùi in kóng, Chú Iâ-hô-hoa án-ni kóng, Góa ê peh-sìⁿ ah, khòaⁿ ah, Góa beh khui lín ê bōng, hō͘ lín tùi lín ê bōng khí--lâi, chhōa lín jı̍p Í-sek-lia̍t tōe.

13

Góa ê peh-sìⁿ ah, Góa khui lín ê bōng, hō͘ lín tùi lín ê bōng khí--lâi, lín chiū chai Góa sī Iâ-hô-hoa.

14

Góa beh chiong Góa ê sîn hē tī lín ê lāi-bīn, lín chiū beh o̍ah; Góa an-tì lín tī pún só͘-chāi, lín chiū chai Góa Iâ-hô-hoa án-ni kóng, iā án-ni chiâⁿ; che sī Iâ-hô-hoa kóng--ê.

15

Iâ-hô-hoa ê ōe koh lîm-kàu góa kóng,

16

Jîn-chú ah, lí tio̍h the̍h chı̍t-tè chhâ-pán, tī i ê téng-bīn siá, Ūi Iû-tāi kap i ê tâng-phōaⁿ Í-sek-lia̍t cho̍k; koh the̍h chı̍t tè chhâ-pán, tī i ê téng-bīn siá, Ūi-tio̍h Iok-sek, Í-hoat-liân, kap i ê tâng-phōaⁿ Í-sek-lia̍t chôan-ke ê chhâ-pán.

17

Lí tio̍h hō͘ in saⁿ-óa, liân chòe chı̍t-tè chhâ-pán; chiū tī lí ê chhiú-tiong beh chiâⁿ-chòe chı̍t-tè.

18

Siat-sú lí ê peh-sìⁿ mn̄g lí kóng, Lí chòe chit-ê sím-mı̍h ì-sù, lí m̄ chí-sī góan mah?

19

lí chiū tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh the̍h Í-hoat-liân ê chhiú só͘ kia̍h Iok-sek ê chhâ-pán, kap i ê tâng-phōaⁿ Í-sek-lia̍t chiah ê chi-phài; Góa beh hē--i óa tī Iû-tāi ê chhâ-pán, hō͘ i chiâⁿ-chòe chı̍t-tè ê chhâ-pán, chiū i beh chiâⁿ-chòe chı̍t-tè tī Góa ê chhiú.

20

Lí só͘ siá hí nn̄g tè chhâ-pán, tio̍h tī in ê ba̍k-chiu-chêng, kia̍h tī lí ê chhiú.

21

Lí tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh chhú Í-sek-lia̍t cho̍k tùi in só͘ kàu ê ta̍k-kok chhut--lâi; koh tùi sì-ûi chū-chı̍p in, chhōa in tò-lâi pún só͘-chāi.

22

Góa beh hō͘ in tī hit ê tōe, tī Í-sek-lia̍t ê soaⁿ, ha̍p-chòe chı̍t peh-sìⁿ; ū chı̍t ê ông chòe in chèng-lâng ê ông; in bô koh chòe nn̄g-pêng ê peh-sìⁿ, iā bô koh pun-chòe nn̄g-kok.

23

Iâ bô koh in-ūi ngó͘-siōng, kap khó-ò͘ⁿ ê mı̍h, í-kı̍p it-chhè ê chōe-kòa, phah lâ-sâm pún-sin; Góa beh kiù in chhut in it-chhè khiā-khí ê só͘-chāi, chiū-sī in hōan-chōe hia; Góa beh chheng-khì in; án-ni, in beh chòe Góa ê peh-sìⁿ; Góa beh chòe in ê Siōng-tè.

24

Góa ê lô͘-po̍k Tāi-pı̍t beh chòe in ê ông; in lóng beh kui tī chı̍t ê bo̍k-chiá; in beh sūn-thàn Góa ê hoat-tō͘, siú Góa ê lu̍t-lē lâi kiâⁿ.

25

In beh khiā-khí tī Góa siúⁿ-sù Góa ê lô͘-po̍k Ngá-kok ê tōe; chiū-sī lín ê lia̍t-chó͘ só͘ khiā-khí--ê; in kap in ê kiáⁿ-sun, í-kı̍p kiáⁿ-kiáⁿ sun-sun, lóng éng-óan khiā-khí tī-hia. Góa ê lô͘-po̍k Tāi-pı̍t beh chòe in ê jîn-kun, tı̍t-kàu éng-óan.

26

Koh Góa beh kap in lı̍p pêng-an ê iok, kap in chòe éng-óan ê iok; Góa iā beh kiàn-siat in, hō͘ in ê lâng-gia̍h ke-thiⁿ, koh tī in ê tiong-kan siat-lı̍p Góa ê sèng-só͘ tı̍t-kàu éng-óan.

27

Góa khiā-khí ê só͘-chāi beh tī in tiong-kan; Góa beh chòe in ê Siōng-tè, in beh chòe Góa ê peh-sìⁿ.

28

Góa ê sèng-só͘ tī in tiong-kan, tı̍t-kàu éng-óan; gōa-pang-lâng chiū beh chai Góa sī Iâ-hô-hoa, hō͘ Í-sek-lia̍t chiâⁿ-chòe sèng-ê.