I-se-kiat 第 42 章 - 巴克禮全羅

1

I chhōa góa chhut-lâi kàu gōa-īⁿ; koh chhōa góa jı̍p lēng-gōa keh-khui ê tōe saⁿ-tùi-bīn ê pâng; hit keng pâng ǹg-pak, tī chhù-the̍h ê tùi-bīn.

2

Tī chı̍t-pah tiú tn̂g, gō͘-cha̍p tiú khoah ê thâu-chêng, ū pak-mn̂g.

3

Sio̍k lāi-īⁿ jī-cha̍p tiú ê tùi-bīn, koh sio̍k gōa-īⁿ pho͘-chio̍h-tōe ê tùi-bīn, ū lâu ê lông tùi lâu ê lông, saⁿ-chàn.

4

Tī hiah ê pâng ê thâu-chêng ū chı̍t-tiâu lō͘, khoah cha̍p tiú, ǹg lāi-bīn chı̍t-pah tiú ê lō͘; in ê mn̂g lóng ǹg-pak.

5

Téng-chàn ê pâng khah o̍eh, in-ūi hō͘ lâu ê lông chiàm i ê tōe; pí tiong-chàn, ē-chàn, chiàm khah-chōe.

6

In-ūi i ū saⁿ-chàn, chóng-sī bô thiāu, chhin-chhiūⁿ hiah ê īⁿ ê thiāu; só͘-í i ê téng-chàn pí tōe-pîⁿ ê ē-chàn tiong-chàn khah o̍eh.

7

Koh tī gōa-bīn ê pâng ê piⁿ-thâu, ǹg hit ê pâng ê thâu-chêng ê gōa-īⁿ, tn̂g gō͘-cha̍p tiú.

8

In-ūi gōa-īⁿ chiah ê pâng, tn̂g gō͘-cha̍p tiú; khòaⁿ ah, tiān ê thâu-chêng ū chı̍t-pah tiú.

9

Tī pâng ê ē-bīn, tùi tang-pêng ū jı̍p-khì ê só͘-chāi; chiū-sī lâng tùi gōa-īⁿ ōe jı̍p-khì hia.

10

Ǹg-lâm tī īⁿ ê chhiûⁿ ê khoah, tī keh-khui ê só͘-chāi tùi-bīn, iā tī chhù-the̍h ê tùi-bīn, ū hiah ê pâng;

11

i ê thâu-chêng ū lō͘, in chhin-chhiūⁿ ǹg-pak ê pâng ê khóan-sit; tn̂g khoah lóng saⁿ-tâng; chhut-jı̍p ê só͘-chāi, lóng chiàu in ê khóan-sit, iā chiàu in ê mn̂g.

12

Chiàu ǹg-lâm hiah ê pâng ê mn̂g, tī lō͘ ê thâu ū mn̂g, chiū-sī tang--sì ê chhiûⁿ bīn-chêng ê lō͘, tī jı̍p-khì ê só͘-chāi.

13

I kā góa kóng, Keh-khui ê só͘-chāi ê thâu-chêng, chiah ê pak--sì ê pâng, lâm--sì ê pâng, lóng sī sèng ê pâng; chhin-kūn Iâ-hô-hoa ê chè-si beh tī-hia chia̍h chì-sèng ê mı̍h; iā ēng chì-sèng ê mı̍h, chiū-sī sò͘-chè, sio̍k-chōe-chè, pó͘-kè-sit ê chè, hē tī hit só͘-chāi, in-ūi chit só͘-chāi sī sèng.

14

Chè-si jı̍p-khì ê sî, chiū m̄-thang tùi sèng-só͘ chhut-lâi kàu gōa-īⁿ; tio̍h tī-hia pàng-hē in kiâⁿ chit-hūn ê sî só͘ chhēng ê saⁿ; in-ūi he sī sèng; tio̍h ōaⁿ in ê saⁿ, chiah thang kàu sio̍k tī peh-sìⁿ--ê.

15

I niû lāi-chhù bêng-pe̍k, chiū chhōa góa chhut ǹg-tang ê mn̂g, niû i ê sì-ûi.

16

I ēng ko-chhioh niû tang-hng, chiū-sī ēng ko-chhioh niû i ê sì-ûi, gō͘-pah ko-chhioh.

17

I ēng ko-chhioh niû pak-hng, niû i ê sì-ûi, gō͘-pah ko-chhioh.

18

I ēng ko-chhioh niû lâm-hng gō͘-pah ko-chhioh.

19

I o̍at kàu sai-hng ēng ko-chhioh niû--i, gō͘-pah ko-chhioh.

20

I niû i ê sì-hng, sì-ûi ū chhiûⁿ, tn̂g gō͘-pah, khoah gō͘-pah, lâi hun-piat sèng--ê kap pêng-siông--ê.