I-se-kiat 第 43 章 - 巴克禮全羅

1

Āu-lâi i chhōa góa kàu chı̍t ê mn̂g, chiū-sī ǹg-tang ê mn̂g.

2

Khòaⁿ ah, Í-sek-lia̍t Siōng-tè ê êng-kng tùi tang--sì lâi; I ê siaⁿ chhin-chhiūⁿ chōe-chōe chúi ê siaⁿ; tōe chiū in-ūi I ê êng-iāu lâi hoat-chhut kng.

3

I ê khóan-sit sī chhin-chhiūⁿ góa só͘ khòaⁿ-kìⁿ ê khóan-sit, chiū-sī góa chêng lâi beh bia̍t siâⁿ ê sî só͘ khòaⁿ-kìⁿ ê khóan-sit; hit ê īⁿ-siōng iā chhin-chhiūⁿ góa tī Ka-pa-ló͘ hô-piⁿ só͘ khoaⁿ-kìⁿ ê īⁿ-siōng; góa chiū phak-lo̍h tōe.

4

Iâ-hô-hoa ê êng-kng tùi ǹg-tang ê mn̂g jı̍p tī tiān-lāi.

5

Tùi án-ni sîn chiū kú-khí góa, tòa góa jı̍p lāi-īⁿ; khòaⁿ ah, Iâ-hô-hoa ê êng-kng chhiong-móa tiān-lāi.

6

Góa thiaⁿ-kìⁿ ū chı̍t-ūi tùi tiān-lāi ǹg góa kóng-ōe; ū chı̍t-lâng khiā tī góa ê sin-piⁿ.

7

I tùi góa kóng, Jîn-chú ah, che sī Góa pó-chō ê só͘-chāi, sī Góa kha-chiúⁿ só͘ ta̍h ê tōe, Góa beh tī-chia tiàm tī Í-sek-lia̍t lâng ê tiong-kan kàu éng-óan. Í-sek-lia̍t-ke kap in ê kun-ông bô beh koh ēng in ê îm-hēng í-kı̍p in ê kun-ông ê sin-si tī kôaiⁿ ê só͘-chāi lâi phah lâ-sâm Góa ê sèng-miâ;

8

in hē in ê mn̂g-tēng kūn-óa Góa ê mn̂g-tēng, in ê mn̂g-khiā kūn-óa Góa ê mn̂g-khiā; in kap Góa ê tiong-kan put-kò keh chı̍t-chōa chhiûⁿ; koh ēng in só͘ kiâⁿ khó-ò͘ⁿ ê sū phah lâ-sâm Góa ê sèng-miâ; só͘-í Góa siū-khì lâi bia̍t in.

9

Taⁿ in tio̍h tùi Góa ê bīn-chêng tû--khì in ê îm-hēng kap kun-ông ê sin-si lī-khui hn̄g-hn̄g, Góa chiū tiàm tī in ê tiong-kan kàu éng-óan.

10

Jîn-chú ah, lí tio̍h chiong chit ê tiān chí-sī Í-sek-lia̍t-ke, hō͘ in in-ūi ka-kī ê chōe-kòa lâi kiàn-siàu; in iā tio̍h niû tiān ê kui-bô͘.

11

In nā ūi-tio̍h ka-kī it-chhè só͘-kiâⁿ ê sū lâi kiàn-siàu, lí tio̍h chí-sī in chit ê tiān ê bô͘ kap i ê khóan-sit, i chhut ê só͘-chāi, i jı̍p ê só͘-chāi, kap i it-chhè ê kui-bô͘, i it-chhè ê lé-gî, i it-chhè ê kui-bô͘, i it-chhè ê hoat-tō͘, lóng siá tī in ê ba̍k-chiu-chêng; hō͘ in siú it-chhè ê kui-bô͘, it-chhè ê lé-gî lâi kiâⁿ i.

12

Tiān ê hoat-tō͘ chiū-sī án-ni, tī soaⁿ-téng sì-ûi ê kài-lāi lóng chòe chì-sèng. Khòaⁿ ah, che chiū-sī tiān ê hoat-tō͘.

13

Í-hā sī tôaⁿ ê niû-sò͘, sī ēng tiú niû i; (chı̍t ê tiú sī chı̍t tiú koh ke chı̍t pa-chiúⁿ); tôaⁿ-tóe chı̍t-tiú, khoah chı̍t-tiú, sì-ûi ê kîⁿ ū iān, kôaiⁿ chı̍t pa-chiúⁿ; che chiū-sī tôaⁿ ê chō.

14

Tùi óa thô͘-kha ê tóe-chō kàu ē-chàn ê khat, kôaiⁿ nn̄g tiú, khoah chı̍t tiú, tùi sòe-khat kàu tōa-khat kôaiⁿ sì tiú, khoah chı̍t-tiú.

15

Téng-bīn ê tôaⁿ ū sì tiú; tôaⁿ ê téng-bīn ū thóng sì ki kak.

16

Tôaⁿ tn̂g cha̍p-jī tiú, khoah cha̍p-jī tiú, khóan-sit sù-hong.

17

Sì-bīn ê khat, tn̂g cha̍p-sì tiú, khoah cha̍p-sì tiú; sì-ûi ê iān ū pòaⁿ-tiú; i ê tóe-chō sì-ûi chı̍t-tiú; i ê kiā-chàn ǹg tang.

18

I tùi góa kóng, Jîn-chú ah, Chú Iâ-hô-hoa án-ni kóng: Khí-chō chè-tôaⁿ ūi-tio̍h beh tī hí téng-bīn hiàn sio-chè, hiù-huih; kàu chō-chiâⁿ ê sî i ê lē chhin-chhiūⁿ ē-tóe.

19

Chú Iâ-hô-hoa kóng, Lí tio̍h chiong chı̍t chiah kang ê gû-á, chòe sio̍k-chōe ê chè, kau hō͘ chè-si Lī-bī-lâng, Sat-tok ê hō͘-è, chiū-sī hiah ê chhin-kūn Góa ho̍k-sāi Góa ê.

20

Lí tio̍h chhú gû-á ê huih, boah tī tôaⁿ ê sì-kak, kap khat-á ê sì-kak; kap sì-ûi ê iān; án-ni lâi hō͘ i chheng-khì, koh ūi-tio̍h i sio̍k-chōe.

21

Lí iā tio̍h chiong hit chiah chòe sio̍k-chōe-chè ê gû-á, sio tī sèng-só͘ ê gōa-bīn, chhù-lāi tiāⁿ-tio̍h ê só͘-chāi.

22

Tē-jī-jı̍t tio̍h chiong bô hâ-chhû ê soaⁿ-iûⁿ-kóng hiàn chòe sio̍k-chōe ê chè; in beh chheng-khì hit ê tôaⁿ chhin-chhiūⁿ bat ēng kang ê gû-á chheng-khì i chı̍t-iūⁿ.

23

Lí í-keng chheng-khì i, tio̍h hiàn chı̍t-chiah bô hâ-chhû kang ê gû kap iûⁿ-kûn tiong chı̍t-chiah bô hâ-chhû kang ê mî-iûⁿ.

24

Lí tio̍h chiong chiah ê mı̍h hiàn tī Iâ-hô-hoa ê bīn-chêng, chè-si tio̍h ēng iâm sám tī in téng-bīn, hiàn hō͘ Iâ-hô-hoa chòe sio-chè.

25

Chhit-jı̍t-lāi múi-jı̍t lí tio̍h pī-pān chı̍t-chiah kang ê soaⁿ-iûⁿ chòe sio̍k-chōe ê chè; in iā tio̍h pī-pān chı̍t-chiah kang ê gû-á kap iûⁿ-kūn-tiong chı̍t-chiah kang ê mî-iûⁿ, lóng bô hâ-chhû--ê.

26

Le̍k-kè chhit-jı̍t in beh ūi tôaⁿ sio̍k-chōe, hō͘ i chheng-khì; án-ni hun-piat i chòe sèng.

27

Hiah ê jı̍t í-keng móa, tùi tē poeh-jı̍t í-āu chè-si beh tī tôaⁿ-téng hiàn lín ê sio-chè kap pêng-an ê chè; Góa beh chiap-la̍p lín; che sī Chú Iâ-hô-hoa kóng--ê.