I-se-kiat 第 45 章 - 巴克禮全羅

1

Lín liam-khau pun tōe chòe-gia̍p, tio̍h hiàn chı̍t-hūn hō͘ Iâ-hô-hoa lâi chòe-sèng, tn̂g nn̄g-bān gō͘-chheng ko-chhioh, khoah chı̍t-bān ko-chhioh; i ê kài ê sì-ûi lóng chòe-sèng.

2

Kî-tiong hun-piat chı̍t-tōaⁿ chòe sèng-só͘, tn̂g gō͘-pah, khoah gō͘-pah, i ê khóan-sit sù-hong; sì-ûi koh gō͘-cha̍p tiú chòe kau-iá ê tōe.

3

Tī só͘ niû-ê ê tiong-kan lí tio̍h niû, tn̂g nn̄g-bān gō͘-chheng, khoah chı̍t-bān; hit tiong-kan ū sèng-só͘, chiū-sī chì-sèng--ê.

4

Che sī chôan-tōe chı̍t-hūn ê sèng-tōe; tio̍h kui tī chè-si, chiū-sī chòe sèng-só͘ ê chhe-ēng, kūn-óa lâi ho̍k-sāi Iâ-hô-hoa ê; chit ê tōe thang chòe in khí-chhù ê só͘-chāi, kap sèng-só͘ ê sèng-tōe.

5

Iū-koh chı̍t-hūn, tn̂g nn̄g-bān gō͘-chheng, khoah chı̍t-bān, tio̍h kui tī tiān-lāi chòe chhe-ēng ê Lī-bī lâng, chòe in ê gia̍p, jī-cha̍p keng pâng.

6

Lín tio̍h hun-phài chòe siâⁿ ê gia̍p, khoah gō͘-chheng, tn̂g nn̄g-bān gō͘-chheng, kap só͘ hiàn ê sèng-tōe saⁿ-pâi; che sī beh chòe Í-sek-lia̍t chôan-ke ê lō͘-ēng.

7

Kìⁿ-nā kui tī jîn-kun--ê sī tī só͘ hiàn ê sèng-tōe í-kı̍p siâⁿ ê gia̍p chit-pêng hit-pêng, tī só͘ hiàn sèng-tōe ê thâu-chêng kap siâⁿ ê gia̍p ê thâu-chêng, tùi sai-hng ǹg-sai, tùi tang-hng ǹg-tang; i ê tn̂g tio̍h kap in ê chı̍t chi-phài ê hūn-gia̍h saⁿ-tâng, tùi sai-kài kàu tang-kài.

8

Tī Í-sek-lia̍t ê kéng-lāi jîn-kun beh tit-tio̍h chit-ê chòe ki-gia̍p; āu-lâi Góa chiah ê jîn-kun bô koh khi-ap Góa ê peh-sìⁿ; beh ēng tōe hō͘ Í-sek-lia̍t-ke chiàu in ê chi-phài.

9

Chú Iâ-hô-hoa án-ni kóng: Í-sek-lia̍t chiah ê jîn-kun ah, lín taⁿ kàu-gia̍h--lah; tio̍h tû--khì kiông-pō kap chhiúⁿ-kiap ê sū, péng-kong kiâⁿ-gī; bô koh pà-chiàm peh-sìⁿ ê gia̍p; che sī Chú Iâ-hô-hoa kóng--ê.

10

Lín tio̍h ēng kong-tō ê thian-phêng, kong-tō ê i-hoat, kong-tō ê pà-tek.

11

I-hoat kap pà-tek tio̍h pîⁿ-tōa, hō͘ pà-tek thang tóe hō-mûi-ní cha̍p-hūn ê chı̍t-hūn, i-hoat iā thang tóe hō-mûi-ní cha̍p-hūn ê chı̍t-hūn; lóng ēng hō-mûi-ní chòe phiau-chún.

12

Sià-khek-le̍k tio̍h chòe jī-cha̍p kùi-la̍h; jī-cha̍p ê sià-khek-le̍k, jī-cha̍p-gō͘ ê sià-khek-le̍k, cha̍p-gō͘ ê sià-khek-le̍k sī chòe lín ê bí-ná.

13

Lín só͘ eng-kai hiàn ê lé-mı̍h tio̍h án-ni; sió-be̍h chı̍t hō-mûi-ní tio̍h hiàn i-hoat la̍k-hūn ê chı̍t-hūn, tōa-be̍h chı̍t hō-mûi-ní tio̍h hiàn i-hoat la̍k-hūn ê chı̍t-hūn;

14

lūn-kàu iû ê tēng-lē, tùi iû ê pà-tek, chiū-sī tùi chı̍t kho-ní, chiū-sī cha̍p ê pà-tek, koh sī chı̍t hō-mûi-ní, hiàn chı̍t pà-tek cha̍p-hūn ê chı̍t-hūn; in-ūi cha̍p pà-tek, chiū-sī chı̍t hō-mûi-ní;

15

tùi Í-sek-lia̍t pûi ê chháu-tiûⁿ tī iûⁿ-kûn-tiong múi nn̄g-pah chiah iûⁿ tio̍h hiàn chı̍t chiah iûⁿ-ko, chòe sò͘-chè, sio-chè, siā-un-chè, thòe in sio̍k-chōe; che chiū-sī Chú Iâ-hô-hoa kóng--ê.

16

Kéng-lāi ê chèng peh-sìⁿ lóng tio̍h ēng chit ê lé-mı̍h hiàn hō͘ Í-sek-lia̍t ê jîn-kun.

17

Jîn-kun ê pún-hūn tī choeh-kî, ta̍k-ge̍h ê chhoe-it, ta̍k-pái an-hioh-jı̍t kap Í-sek-lia̍t ke-tiong só͘ tiāⁿ-tio̍h ê choeh-kî tio̍h hiàn sio-chè, sò͘-chè, kòan-tiān-chè; i tio̍h pī-pān sio̍k-chōe-chè, sò͘-chè, sio-chè, kap pêng-an-chè, ūi-tio̍h Í-sek-lia̍t-ke sio̍k-chōe.

18

Chú Iâ-hô-hoa án-ni kóng, Tī chiaⁿ-ge̍h chhoe-it lín tio̍h chhú bô hâ-chhû ê gû-káng, lâi chheng-khì sèng-só͘.

19

Chè-si tio̍h chiong sio̍k-chōe-chè ê huih boah tī tiān ê mn̂g-khiā, kap tôaⁿ-khat ê sì-kak, kap lāi-īⁿ ê mn̂g-khiā.

20

Hit-ge̍h ê chhoe chhit iā tio̍h án-ni chòe ūi-tio̍h chhò-gō͘ hōan-chōe-ê, kap gû-gōng lâi hōan-tio̍h--ê, lâi ūi-tio̍h tiān sio̍k-chōe.

21

Chiaⁿ-ge̍h cha̍p-sì, lín tio̍h siú pôaⁿ-kè-choeh, siú chit ê choeh chhit-jı̍t; tio̍h chia̍h bô-kàⁿ ê piáⁿ.

22

Hit-jı̍t jîn-kun tio̍h ūi-tio̍h ka-kī kap kok-lāi ê chèng peh-sìⁿ pī-pān chı̍t chiah kang ê gû chòe sio̍k-chōe-chè.

23

Tng choeh-kî ê chhit-jı̍t i tio̍h pī-pān sio-chè hiàn hō͘ Iâ-hô-hoa, liân-liân chhit-jı̍t, ta̍k-jı̍t tio̍h ēng chhit-chiah gû-káng kap chhit chiah mî-iûⁿ-káng, lóng bô hâ-chhû--ê; ta̍k-jı̍t iā tio̍h pī-pān chı̍t chiah soaⁿ-iûⁿ-káng chòe sio̍k-chōe-chè.

24

I iā tio̍h pī-pān sò͘-chè, chı̍t chiah gû-káng chı̍t ê i-hoat, chı̍t chiah mî-iûⁿ-káng chı̍t ê i-hoat, múi i-hoat tio̍h iû chı̍t-him.

25

Chhit-ge̍h cha̍p-gō͘; siú choeh ê sî chhit-jı̍t kú i tio̍h án-ni chòe; chiàu sio̍k-chōe-chè, chiàu sio-chè, chiàu sò͘-chè, iā tio̍h chiàu iû.