I-se-kiat 第 46 章 - 巴克禮全羅

1

Chú Iâ-hô-hoa án-ni kóng: Lāi-īⁿ ǹg-tang ê mn̂g tī chòe-kang ê la̍k-jı̍t-lāi tek-khak tio̍h koaiⁿ; to̍k-to̍k tī an-hioh-jı̍t tio̍h khui, ge̍h ê chhoe-it iā tio̍h khui.

2

Jîn-kun tio̍h tùi chit ê mn̂g ê lông tùi gōa-bīn jı̍p, khiā tī mn̂g-khiā-piⁿ; chè-si tio̍h pī-pān i ê sio-chè kap i ê siā-un-chè, i tio̍h tī mn̂g-tēng hit tah kèng-pài; jiân-āu chhut-khì, chit ê mn̂g kàu ê-hng-sî m̄-thang koaiⁿ.

3

Tī chiah ê an-hioh-jı̍t, kap ge̍h ê chhoe-it, kok-lāi ê peh-sìⁿ tio̍h tī chit ê mn̂g-kháu kèng-pài tī Iâ-hô-hoa ê bīn-chêng.

4

Jîn-kun tī an-hioh-jı̍t só͘ tio̍h hiàn hō͘ Iâ-hô-hoa ê sio-chè, tio̍h bô hâ-chhû ê iûⁿ-ko la̍k-chiah, bô hâ-chhû ê mî-iûⁿ-káng chı̍t-chiah;

5

i ê sò͘-chè ūi-tio̍h hit chiah mî-iûⁿ-káng tio̍h chı̍t ê i-hoat, ūi-tio̍h hiah ê iûⁿ-ko ê sò͘-chè sī chiàu i ê le̍k-liōng chı̍t ê i-hoat phòe iû chı̍t him.

6

Tng ge̍h ê chhoe-it tio̍h hiàn bô hâ-chhû ê gû-káng chı̍t-chiah, iûⁿ-ko la̍k-chiah, mî-iûⁿ-káng chı̍t-chiah; lóng tio̍h bô hâ-chhû--ê.

7

I iā tio̍h pī-pān sò͘-chè, ūi-tio̍h gû-káng hiàn chı̍t ê i-hoat, ūi-tio̍h mî-iûⁿ-káng hiàn chı̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng chı̍t ê i-hoat phòe iû chı̍t-him.

8

Jîn-kun jı̍p-lâi ê sî, tio̍h tùi chit ê mn̂g ê lông jı̍p, iā tio̍h tùi chit ê lō͘ chhut.

9

Tī ta̍k ê choeh-kî, kok-lāi ê peh-sìⁿ tiâu-kìⁿ Iâ-hô-hoa ê sî, tùi pak-mn̂g jı̍p-lâi kèng-pài-ê tio̍h tùi lâm-mn̂g chhut-khì; tùi lâm-mn̂g jı̍p-lâi-ê tio̍h tùi pak-mn̂g chhut-khì; m̄-thang tùi só͘ jı̍p ê mn̂g o̍at-tò-tńg, tio̍h tı̍t-tı̍t chìn-chêng chhut-khì.

10

Peh-sìⁿ jı̍p-khì ê sî, jîn-kun iā tio̍h tī in ê tiong-kan jı̍p-khì; peh-sìⁿ chhut-khì, jîn-kun iā tio̍h kap in chhut-khì.

11

Tī choeh-kî kap tāi-hōe ê sî, sò͘-chè tio̍h ūi-tio̍h chı̍t-chiah gû-káng hiàn chı̍t ê i-hoat, ūi-tio̍h chı̍t-chiah mî-iûⁿ-káng hiàn chı̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng, chı̍t ê i-hoat phòe iû chı̍t-him.

12

Jîn-kun nā pī-pān kam-sim ê chè, sio-chè á-sī siā-un-chè chòe kam-sim ê chè, hiàn hō͘ Iâ-hô-hoa, tio̍h ū lâng kā i khui ǹg-tang ê mn̂g, i tio̍h pī-pān i ê sio-chè kap i ê siā-un-chè chhin-chhiūⁿ tī an-hioh-jı̍t só͘ chòe chı̍t-iūⁿ; jiân-āu i tio̍h chhut-khì; chhut-khì-liáu tio̍h ū lâng kā i koaiⁿ-mn̂g.

13

Ta̍k-jı̍t lí tio̍h pī-pān bô hâ-chhû, bē móa-nî ê iûⁿ-ko chı̍t-chiah, chòe sio-chè hiàn hō͘ Iâ-hô-hoa; ta̍k chá-khí tio̍h pī-pān i.

14

Ta̍k chá-khí iā tio̍h pī-pān saⁿ-kap hiàn ê sò͘-chè, chı̍t i-hoat la̍k-hūn ê chı̍t-hūn, kap chı̍t him iû saⁿ-hūn ê chı̍t-hūn chhiau-hô mī-hún; chit ê sò͘-chè tio̍h siông-siông hiàn hō͘ Iâ-hô-hoa, chòe éng-óan tiāⁿ-tio̍h ê lē.

15

Ta̍k chá-khí in tio̍h án-ni pī-pān iûⁿ-ko, sò͘-chè, kap iû, chòe siông-siông hiàn ê sio-chè.

16

Chú Iâ-hô-hoa án-ni kóng: Jîn-kun nā chiong sán-gia̍p hō͘ i ê kiáⁿ ê chı̍t-ê, chiū-sī chòe i ê gia̍p, kui tī i hiah ê kiáⁿ, sī in sêng-chiap chòe gia̍p--ê.

17

Chóng-sī i nā chiong i ê sán-gia̍p ê chı̍t-hūn hō͘ i ê jîn-sîn ê chı̍t-ê, sī chòe jîn-sîn-ê kàu chū-iû ê nî, hit-sî iû-gôan kui tī jîn-kun; lūn-kàu i ê sán-gia̍p tio̍h lâu hō͘ i hiah ê kiáⁿ.

18

Jîn-kun m̄-thang chhiúⁿ-to̍at peh-sìⁿ ê sán-gia̍p, lâi kóaⁿ in lī-khui in só͘ sêng-chiap-ê; i tio̍h tùi ka-kī ê gia̍p-tiong chiong sán-gia̍p hō͘ i ê kiáⁿ; bián-tit Góa ê peh-sìⁿ sì-sòaⁿ, ta̍k-lâng lī-khui i só͘ sêng-chiap--ê.

19

I chiū chhōa góa tùi mn̂g-piⁿ ê lō͘ jı̍p-lâi kàu chè-si ǹg pak hiah ê sèng ê pâng-keng; khòaⁿ ah, āu-bīn sai-sì ū chı̍t só͘-chāi.

20

I chiū kā góa kóng, Che sī chè-si chú pó͘-kè-sit-chè kap sio̍k-chōe-chè, í-kı̍p pek sò͘-chè ê só͘-chāi; bián-tit tòa-kàu gōa-īⁿ, hō͘ peh-sìⁿ chiâⁿ-chòe sèng.

21

I koh chhōa góa chhut-khì kàu gōa-īⁿ, hō͘ góa keng-kè īⁿ sì ê kak-thâu; khòaⁿ ah, tī hit ê īⁿ ta̍k ê kak-thâu kok ū chı̍t ê īⁿ.

22

Tī īⁿ ê sì kak-thâu ū īⁿ, sì-bīn ū chhiûⁿ ûi-teh; ta̍k ê īⁿ, tn̂g sì-cha̍p tiú, khoah saⁿ-cha̍p; sì ê kak-thâu ê īⁿ, in ê chhùn-chhioh lóng chı̍t-iūⁿ.

23

Sì ê īⁿ ê chiu-ûi ū khí chı̍t-lia̍t, i ê ē-bīn lóng ū chú-mı̍h ê só͘-chāi.

24

I kā góa kóng, Chiah-ê chiū-sī chú-mı̍h ê chàu-kha; tiān-lāi chiah-ê chòe chhe-ēng--ê tī-chia chú peh-sìⁿ ê chè-sū.