I-se-kiat 第 7 章 - 巴克禮全羅

1

Iâ-hô-hoa ê ōe koh lîm-kàu góa kóng,

2

Jîn-chú ah, Chú Iâ-hô-hoa tùi Í-sek-lia̍t tōe án-ni kóng, Kiat-kio̍k kàu lah! chit ê tōe ê sì-kéng, kiat-kio̍k kàu lah.

3

Taⁿ lí ê kiat-kio̍k í-keng kàu lah, Góa beh hō͘ Góa ê siū-khì kàu tī lí, ia̍h beh chiàu lí ê só͘-kiâⁿ sím-phòaⁿ lí; chiàu lí it-chhè khó-ò͘ⁿ ê sū pò-èng lí;

4

Góa ê ba̍k-chiu bô beh pó-sioh lí, Góa ia̍h bô beh khó-lîn lí; sī beh chiàu lí ê só͘-kiâⁿ pò-èng lí, lí khó-ò͘ⁿ ê sū beh kui tī lí tiong-kan; lín chiū chai Góa sī Iâ-hô-hoa.

5

Chú Iâ-hô-hoa án-ni kóng: Ū chai-ē, hui-siông ê chai-ē; khòaⁿ ah, beh kàu lah.

6

Kiat-kio̍k kàu lah, kiat-kio̍k kàu lah, khí-lâi kong-kek lí; khòaⁿ ah, kàu lah.

7

Kéng-lāi khiā-khí ê peh-sìⁿ ah, só͘ tiāⁿ-tio̍h ê chai-ē beh lîm-kàu lí; sî-kî kàu lah, jı̍t-chí kūn lah, chiū-sī hōa-hōa-jióng, m̄-sī soaⁿ-téng hoaⁿ-hí ê siaⁿ ê jı̍t.

8

Góa beh kín-kín piàⁿ-chhut Góa ê tōa siū-khì tī lí; koh it-chīn chiâⁿ Góa ê siū-khì tī lí, chiàu lí ê só͘-kiâⁿ sím-phòaⁿ lí, chiàu lí it-chhè khó-ò͘ⁿ ê sū pò-èng lí.

9

Góa ê ba̍k-chiu bô beh pó-sioh lí, Góa ia̍h bô beh khó-lîn lí, beh chiàu lí ê só͘ kiâⁿ pò-èng lí, lí khó-ò͘ⁿ ê sū beh kui tī lí tiong-kan; lín chiū chai phah-lín--ê sī Góa Iâ-hô-hoa.

10

Khòaⁿ ah, khòaⁿ ah, jı̍t-chí í-keng kàu lah; só͘ tiāⁿ-tio̍h ê chai-ē í-keng hoat-chhut; kóaiⁿ-á í-keng khui-hoe, kiau-ngō͘ í-keng puh-gê.

11

Kiông-pō heng-khí, chiâⁿ-chòe hêng-ho̍at pháiⁿ ê kóaiⁿ-á; in bô--khì, in chèng-lâng ia̍h bô--khì, in ê châi-pó iā bô--khì; in tiong-kan bô lâng tit-tio̍h chun-kùi.

12

Sî-kî kàu lah, jı̍t-chí kūn lah; bóe ê lâng bo̍h-tit hoaⁿ-hí, bōe ê lâng bo̍h-tit hôan-ló; in-ūi tōa siū-khì í-keng kàu tī in chèng-lâng.

13

Bōe--ê in sui-jiân iáu o̍ah--teh, iā bōe tò-tńg kàu i só͘ bōe--ê; in-ūi chit ê īⁿ-siōng koan-hē in chèng-lâng, lóng bōe tò-tńg-lâi; ia̍h bô lâng ōe tùi i ê pháiⁿ só͘-kiâⁿ lâi kian-kò͘ i ê o̍ah-miā.

14

In í-keng pûn sàu-kak, pī-pān chiâu-pī; chóng-sī bô lâng chhut-khì kau-chiàn; in-ūi Góa ê tōa siū-khì lîm-kàu in chèng-lâng.

15

Tī gōa-bīn ū to-kiàm, tī lāi-bīn ū un-e̍k, ū ki-hng; tī chhân-iá--ê beh tùi to-kiàm lâi sí, tī siâⁿ-lāi--ê, ki-hng kap un-e̍k beh thun-bia̍t--i.

16

Kî-tiong thoat-lī--ê beh thoat-lī; ta̍k-lâng in-ūi i ê chōe-kòa, tī soaⁿ--nih chhut pi-ai ê siaⁿ, chhin-chhiūⁿ soaⁿ-kok-tiong ê ka-chui.

17

Chhiú lóng sng, kha-thâu-u nńg chhin-chhiūⁿ chúi.

18

Beh ēng môa-pò͘ hâ-io, kiaⁿ-hiâⁿ beh jia-khàm i, ta̍k-lâng bīn kiàn-siàu, thâu-khak bô pòaⁿ-ki mn̂g.

19

In beh hiat in ê gûn tī koe-lō͘, khòaⁿ kim chhin-chhiūⁿ ù-òe ê mı̍h; tng Iâ-hô-hoa siū-khì ê jı̍t, in ê kim-gûn bōe-ōe kiù in, bōe-ōe hō͘ in ê sim ti-chiok, ia̍h bōe-ōe hō͘ in ê pak-tó͘ pá; in-ūi che ū pòaⁿ-tó in tī chōe-ok tiong.

20

Lūn-kàu i chng-thāⁿ ê súi, sī I hō͘ i tit-tio̍h ui-hong; in chiū ēng--i lâi chng thang òan-hūn ê mı̍h, thang iàm-chiān ê ngó͘-siōng; só͘-í Góa hō͘ in khòaⁿ chhin-chhiūⁿ ù-òe ê mı̍h.

21

Góa beh chiong i kau tī gōa-pang lâng ê chhiú, chòe i só͘ chhiúⁿ ê mı̍h; kau-hù tōe-chiūⁿ ê pháiⁿ-lâng, chòe chha̍t-chng; in ia̍h beh phah lâ-sâm i.

22

Góa beh o̍at-tńg Góa ê bīn bô khòaⁿ--in; in beh phah lâ-sâm Góa ki-bı̍t ê só͘-chāi; kiông-béng ê chha̍t iā beh jı̍p-khì phah lâ-sâm.

23

Tio̍h chō thih-liān, in-ūi chit só͘-chāi móa-móa lâu-huih ê chōe, siâⁿ-lāi chhiong-móa kiông-pō ê sū.

24

Góa beh hō͘ gōa-pang tē-it pháiⁿ--ê lâi pà-chiàm in ê chhù-the̍h; Góa beh hō͘ kiông-pō ê lâng ê kiau-ngō͘ soah; in ê sèng-só͘ phah lâ-sâm.

25

Húi-bia̍t kūn lah; in beh kiû pêng-an, ia̍h bōe tit-tio̍h.

26

Beh ū chai-ē ke-thiⁿ chai-ē, hong-siaⁿ sòa-chiap hong-siaⁿ; in beh tùi sian-ti kiû īⁿ-siōng; chóng-sī chè-si ê lu̍t-hoat, tióng-ló ê kè-e̍k, lóng beh tōan-cho̍at.

27

Kok-ông beh pi-ai, ông-chhin beh léng-chēng, peh-sìⁿ ê chhiú ngia̍uh-ngia̍uh-chhoah. Góa beh chiàu in ê só͘-kiâⁿ khóan-thāi in, chiàu in eng-kai siū ê sím-phòaⁿ, lâi sím-phòaⁿ in; in chiū chai Góa sī Iâ-hô-hoa.