I-se-kiat 第 8 章 - 巴克禮全羅

1

Tē la̍k-nî la̍k-ge̍h chhoe-gō͘, góa chē tī góa ê chhù-lāi, Iû-tāi chiah ê tióng-ló chē tī góa ê bīn-chêng; tī-hia Chú Iâ-hô-hoa ê chhiú kàu tī góa ê sin-chiūⁿ.

2

Góa koan-khòaⁿ, khòaⁿ-kìⁿ ū hêng-siōng chhin-chhiūⁿ hé ê khóan-sit; tùi i ê io í-ē ê khóan-sit ū hé, tùi i ê io í-chiūⁿ ê kng-kng ê khóan-sit, chhin-chhiūⁿ hó͘-phek ê sek-tì.

3

I chhun chhut chhin-chhiūⁿ chı̍t ki chhiú ê khóan, khiú-tiâu góa chı̍t-kó͘ ê thâu-mn̂g; sîn chiū chiong góa kú-khí kàu thiⁿ kap tōe ê tiong-kan, tī Siōng-tè ê īⁿ-siōng-tiong tòa góa kàu Iâ-lō͘-sat-léng, ǹg pak lāi-īⁿ ê mn̂g-kháu; tī-hia ū tò͘-khī ê ngó͘-siōng ê chō-ūi, chiū-sī kek-tōng tò͘-khī-ê.

4

Khòaⁿ ah, tī-hia ū Í-sek-lia̍t Siōng-tè ê êng-kng, khóan-sit kap góa tī pîⁿ-iûⁿ só͘ khòaⁿ-kìⁿ--ê chı̍t-iūⁿ.

5

I tùi góa kóng, Jîn-chú ah, lí kia̍h-ba̍k ǹg pak-hng ê lō͘ koan-khòaⁿ; góa chiū kia̍h-ba̍k ǹg pak-hng ê lō͘ koan-khòaⁿ; khòaⁿ ah, tī chè-tôaⁿ mn̂g ê pak--sì, tī mn̂g-kháu ū chı̍t-ê kek-tōng tò͘-khī ê ngó͘-siōng.

6

I koh tùi góa kóng, Jîn-chú ah, lí khòaⁿ-kìⁿ in só͘ chòe--ê mah? chiū-sī Í-sek-lia̍t ke tī-chia só͘ kiâⁿ tōa khó-ò͘ⁿ ê sū, hō͘ Góa lī-khui Góa ê sèng-só͘ hn̄g-hn̄g? chóng-sī lí beh koh khòaⁿ, iáu ū koh-khah tōa khó-ò͘ⁿ ê sū.

7

I chhōa góa kàu īⁿ ê mn̂g; góa koan-khòaⁿ, khòaⁿ-kìⁿ chhiûⁿ-piah ū chı̍t-khang.

8

I tùi góa kóng, Jîn-chú ah, lí tio̍h iah chhiûⁿ; góa chı̍t-ē iah chhiûⁿ, khòaⁿ-kìⁿ ū chı̍t ê mn̂g.

9

I kā góa kóng, Lí jı̍p-khì, khòaⁿ in tī chí lāi-bīn só͘ kiâⁿ khó-ò͘ⁿ ê pháiⁿ-tāi.

10

Góa chiū jı̍p-khì khòaⁿ; khòaⁿ ah, tī sì-bīn ê chhiûⁿ-piah, ūi ta̍k-hō ōe sô ê mı̍h, kap khó-ò͘ⁿ ê cháu-siù, kap Í-sek-lia̍t ke it-chhè ê ngó͘-siōng.

11

Tī chiah ê siōng ê bīn-chêng, ū Í-sek-lia̍t ke chhit-cha̍p ê tióng-ló khiā-teh, Sa-hoan ê kiáⁿ Ngá-sat-nî-a iā khiā tī in tiong-kan; ta̍k-lâng chhiú the̍h hiuⁿ-lô͘, hiuⁿ-ian ê phang-bī chhèng chiūⁿ-kôaiⁿ.

12

I tùi góa kóng, Jîn-chú ah, Í-sek-lia̍t ke ê tióng-ló, tī àm-tiong, tī in ta̍k-lâng ūi-siōng ê pâng-á-lāi só͘ kiâⁿ--ê, lí khòaⁿ-kìⁿ bô? in-ūi in kóng, Iâ-hô-hoa bô khòaⁿ-kìⁿ góan, Iâ-hô-hoa í-keng lī-khui chit ê tōe.

13

I koh tùi góa kóng, Lí beh koh khòaⁿ-kìⁿ in só͘ kiâⁿ, iáu ū koh-khah tōa khó-ò͘ⁿ ê sū.

14

I chhōa góa kàu Iâ-hô-hoa ê chhù, ǹg pak ê mn̂g-kháu; khòaⁿ ah, tī-hia ū hū-lú chē--teh, ūi-tio̍h Tah-bô͘-su thî-khàu.

15

I tùi góa kóng, Jîn-chú ah, lí khòaⁿ-kìⁿ bô? lí iáu beh khòaⁿ-kìⁿ pí che koh-khah khó-ò͘ⁿ ê sū.

16

I koh chhōa góa kàu Iâ-hô-hoa chhù ê lāi-īⁿ; khòaⁿ ah, tī Iâ-hô-hoa ê tiān-mn̂g, léng-lông kap chè-tôaⁿ ê tiong-kan, iok-lio̍k ū jī-cha̍p-gō͘ lâng, ka-chiah ǹg Iâ-hô-hoa ê tiān, bīn ǹg-tang; in iā ǹg-tang pài jı̍t-thâu.

17

I tùi góa kóng, Jîn-chú ah, lí ū khòaⁿ-kìⁿ bô? Iû-tāi ke tī-chia kiâⁿ chit ê khó-ò͘ⁿ ê sū, iáu sǹg-chòe sió-khóa mah? in tī chit ê só͘-chāi piàn-kiâⁿ kiông-pō, chài-saⁿ kek Góa ê siū-khì; khòaⁿ ah, in kia̍h chhiū-ki hē tī i ê phīⁿ-chêng.

18

In-ūi án-ni, Góa ia̍h beh kiâⁿ Góa ê tōa siū-khì; Góa ê ba̍k-chiu bô beh thiàⁿ-sioh in, Góa iā bô beh khó-lîn in; in sui-jiân ǹg Góa ê hī-khang-tiong tōa-siaⁿ kiû-kiò, Góa iû-gôan m̄-thiaⁿ.