Í-sū-la̍h 第 10 章 - 巴克禮全羅

1

Í-su-la̍h kî-tó, jīn-chōe, thî-khàu, phak tī Siōng-tè tiān-chêng ê sî, ū tùi Í-sek-lia̍t tiong lâi ê lâm-lú gín-ná chū-chı̍p i hia, chiâⁿ tōa-hōe. Peh-sìⁿ khàu kàu chin-chhám.

2

sio̍k Í-lân ê hō͘-è, Iâ-iat ê kiáⁿ, Sī-ka-nî, ìn Í-su-la̍h kóng, Góan tī chit ê só͘-chāi ê peh-sìⁿ tiong chhōa gōa-pang lâng ê cha-bó͘-kiáⁿ chòe-bó͘, kan-hōan lán ê Siōng-tè; chóng-sī Í-sek-lia̍t lâng tī chit ê sū iáu-kú ū thang ǹg-bāng.

3

Taⁿ tio̍h kap lán ê Siōng-tè lı̍p-iok, chiong chiah ê bó͘ kap in só͘-siⁿ-ê, lóng hō͘ in chhut-khì, chiàu góa ê chú kap hiah-ê in-ūi Siōng-tè ê bēng-lēng ngia̍uh-ngia̍uh-chhoah ê lâng só͘ gī-tiāⁿ-ê, chiàu lu̍t-hoat lâi kiâⁿ;

4

Lí khí-lâi, in-ūi chit ê sū sī lí só͘ eng-kai pān-ê; góan beh pang-chān lí, lí tio̍h hó-táⁿ lâi chòe i.

5

Í-su-la̍h chiū khí-lâi, hō͘ chè-si hiah ê thâu-lâng, kap Lī-bī lâng, kap Í-sek-lia̍t chèng-lâng chiù-chōa, beh chiàu chit ê ōe khì kiâⁿ; in chiū chiù-chōa.

6

Í-su-la̍h chiū tùi Siōng-tè ê tiān-chêng khí-lâi, jı̍p Í-lī-a-sı̍t ê kiáⁿ Iok-hap-lân ê chhù, kàu hia bô chia̍h piáⁿ, bô lim chúi; in-ūi i ūi-tio̍h siū-lia̍h tò-lâi ê lâng só͘ hōan ê chōe, lâi pi-siong.

7

In soan-pò͘ tī piàn Iû-tāi kap Iâ-lō͘-sat-léng siū-lia̍h tò-lâi ê lâng, kah in lóng chū-chı̍p tī Iâ-lō͘-sat-léng.

8

Kìⁿ-nā bô thàn hiah ê siú-léng kap tiúⁿ-ló só͘ gī-tiāⁿ, saⁿ-jı̍t-lāi bô-lâi--ê, chiū beh chhau i só͘ ū ê gia̍p, beh kek i chhut siū-lia̍h tò-lâi ê lâng ê hōe.

9

Tùi án-ni Iû-tāi kap Piān-ngá-bín chèng-lâng saⁿ-jı̍t-lāi lóng chū-chı̍p tī Iâ-lō͘-sat-léng; hit-jı̍t sī káu-ge̍h jī-cha̍p jı̍t; chèng-lâng lóng chē tī Siōng-tè tiān-chêng khoan-khoah ê só͘-chāi; in-ūi chit ê sū, koh in-ūi lo̍h tōa-hō͘, chiū ngia̍uh-ngia̍uh-chhoah.

10

Chè-si Í-su-la̍h khí-lâi, kā in kóng, Lín ū chōe, lín chhōa gōa-pang ê cha-bó͘-kiáⁿ chòe bó͘, ke-thiⁿ Í-sek-lia̍t lâng ê chōe.

11

Taⁿ tio̍h ǹg Iâ-hô-hoa, lín lia̍t-chó͘ ê Siōng-tè, jīn-chōe, kiâⁿ I só͘ hoaⁿ-hí-ê, ka-kī hun-piat lī-khui chiah ê kok ê peh-sìⁿ, kap gōa-pang ê cha-bó͘-kiáⁿ.

12

Hōe-chiòng lóng tōa-siaⁿ ìn kóng, Chiàu lí só͘ kóng koan-hē góan-ê, góan beh kiâⁿ i.

13

Chóng-sī peh-sìⁿ chin-chōe, koh tú-tio̍h tōa-hō͘ ê sî, góan bōe-ōe khiā tī gōa-bīn, che iā m̄-sī chı̍t-jı̍t nn̄g-jı̍t ê sū, in-ūi góan tī chit ê sū ū tōa-tōa hōan-chōe.

14

Taⁿ tio̍h ūi chôan-hōe siat-lı̍p lán ê siú-léng, kìⁿ-nā lán ê siâⁿ-tiong chhōa gōa-pang ê cha-bó͘-kiáⁿ--ê, tio̍h chiàu tiāⁿ-tio̍h ê kî lâi; hit ê siâⁿ ê tiúⁿ-ló sū-su tio̍h kap in lâi; tı̍t-kàu lán ê Siōng-tè ūi-tio̍h chit ê sū ê siū-khì siu tò-tńg.

15

to̍k-to̍k A-sat-hek ê kiáⁿ Iok-ná-tan, Te̍k-óa ê kiáⁿ Ngá-hap-siā, hóan-tùi chit ê sū; koh ū Bí-su-lân, kap Lī-bī lâng Sa-pí-thài chàn-sêng in.

16

Siū-lia̍h tò-lâi ê lâng án-ni kiâⁿ. Chè-si Í-su-la̍h kap cho̍k-tiúⁿ kúi-nā lâng, chiàu in ê chong-cho̍k, lóng chiàu in ê miâ siū-phài; tī cha̍p-ge̍h chhoe-it jı̍t in saⁿ-kap chē, cha-chhat chit ê sū.

17

Kàu chiaⁿ-ge̍h chhoe-it, kìⁿ-nā chhōa gōa-pang ê cha-bó͘-kiáⁿ--ê chiah bêng-pe̍k hit ê sū.

18

Tī chè-si kiáⁿ-sun-tiong chhâ-chhut chhōa gōa-pang ê cha-bó͘-kiáⁿ ê, chiū-sī Iok-sat-tap ê kiáⁿ Iâ-su-a ê ke, kap i ê hiaⁿ-tī Má-se-ngá, Í-lī-í-siā, Ngá-lı̍p, Ki-tāi-lī.

19

In chiū khan-chhiú kiat-bêng beh lî in ê bó͘, in-ūi hōan-chōe; chiū hiàn iûⁿ-kûn-tiong chı̍t chiah mî-iûⁿ-káng, lâi sio̍k-chōe.

20

Im-be̍k ê kiáⁿ-sun-tiong, ū Hap-ná-nî Se-pa-tē-ngá.

21

Hap-lîm ê kiáⁿ-sun-tiong, ū Má-se-ngá, Í-lī-ngá, Sī-má-ngá, Iâ-iat Ou-se-ngá.

22

Pa-si-hō͘-jíⁿ ê kiáⁿ-sun-tiong, ū Í-lī-iok-nái, Má-se-ngá, Í-sı̍t-má-lī, Ná-thán-gia̍p, Iok-sat-po̍at, Í-lī-a-sat.

23

Lī-bī lâng tiong, ū Iok-sat-po̍at, Sī-múi, Ki-la̍h-ngá, Ki-la̍h-ngá chiū-sī Ki-lī-tha; koh ū Pí-tha-hi-ngá, Iû-tāi, Í-lī-í-siā.

24

Chhiùⁿ-koa ê lâng ê tiong-kan, ū Í-lī-a-sı̍t. Kò͘-mn̂g ê lâng ê tiong-kan ū Sa-liông, Thê-liân, Ou-lī.

25

Í-sek-lia̍t lâng Pa-lio̍k ê kiáⁿ-sun tiong, ū La̍h-bí, Iâ-se-ngá, Má-ki-ngá, Bí-ngá-bîn, Í-lī-a-sat, Má-ki-ngá, Pí-ná-ngá.

26

Í-lân ê kiáⁿ-sun tiong, ū Má-tha-nî, Sat-ka-lī-a, Iâ-iat, Ap-tí, Iâ-lī-bo̍at, Í-lī-ngá.

27

Sat-thó͘ ê kiáⁿ-sun tiong, ū Í-lī-iok-nái, Í-lī-a-sı̍t, Má-tha-nî, Iâ-lī-bo̍at, Sat-po̍at, A-se-sat.

28

Bí-pài ê kiáⁿ-sun tiong, ū Iok-hap-lân, Hap-ná-nî-ngá, Sat-pài, A-le̍k.

29

Pa-nî ê kiáⁿ-sun tiong, ū Bí-su-lân, Má-lo̍k, A-tāi-ngá, Ngá-su̍t, Sī-ap, Iâ-lī-bo̍at.

30

Pa-hap-mô͘-ap ê kiáⁿ-sun tiong, ū A-tí-ná, Ki-la̍h, Pí-ná-ngá, Má-se-ngá, Má-tha-nî, Pí-sat-lia̍t, Pin-lōe, Má-ná-se.

31

Hap-lîm ê kiáⁿ-sun tiong, ū Í-lī-í-siā, I-si-ngá, Má-ki-ngá, Sī-má-ngá, Se-biān;

32

Piān-ngá-bín, Má-lo̍k, Sī-má-lī-ngá.

33

Hap-sūn ê kiáⁿ-sun tiong, ū Má-te̍k-nái, Má-ta̍t-tha, Sat-po̍at, Í-lī-hoat-lia̍t, Iâ-lī-mái, Má-ná-se, Sī-múi.

34

Pa-nî ê kiáⁿ-sun tiong, ū Má-tāi, Àm-lân, Ou-ek;

35

Pí-ná-ngá, Pí-tí-ngá, Ki-lo̍k;

36

Óa-nî-ngá, Bí-lī-bo̍at, Í-lī-a-sı̍t;

37

Má-tha-nî, Má-te̍k-nái, Ngá-sò;

38

Pa-nî, Pin-lōe, Sī-múi;

39

Sī-lī-bí-ngá, Ná-tan, A-tāi-ngá;

40

Má-ná-tí-pài, Sa-sài, Sa-nāi;

41

A-sat-lī, Sī-lī-bí-ngá, Sī-má-lī-ngá;

42

Sa-liông, A-má-lī-ngá, Iok-sek.

43

Nî-pho ê kiáⁿ-sun tiong, ū Iâ-lī, Má-tha-thê-ngá, Sat-po̍at, Se-pí-ná, Ngá-tāi, Iok-jíⁿ, Pí-ná-ngá.

44

Chiah ê lâng lóng chhōa gōa-pang lâng ê cha-bó͘-kiáⁿ chòe-bó͘; kî-tiong iā ū lâng tùi chiah ê cha-bó͘-kiáⁿ siⁿ kiáⁿ-jî.