Í-sū-la̍h 第 9 章 - 巴克禮全羅

1

Chiah ê tāi-chì í-keng chòe bêng-pe̍k, chiah ê siú-léng lâi kìⁿ góa, kóng, Í-sek-lia̍t peh-sìⁿ kap chè-si, kap Lī-bī lâng, bô ka-kī hun-piat lī-khui chiah ê só͘-chāi ê peh-sìⁿ, thàn in khó-ò͘ⁿ ê sū, chiū-sī thàn Ka-lâm lâng, Hek-lâng, Pí-lī-sé lâng, Iâ-pò͘-su lâng, A-bûn lâng, Mô͘-ap lâng, Ai-kı̍p lâng, A-mô͘-lī lâng ê sū.

2

In-ūi in ūi ka-kī kap in ê kiáⁿ, chhōa in ê cha-bó͘-kiáⁿ chòe bó͘, tì-kàu sèng ê hō͘-è kap hit só͘-chāi ê peh-sìⁿ chham-chhap; koh siú-léng kap in ê koaⁿ-tiúⁿ chòe in ê chōe-khoe.

3

Góa chı̍t-ē thiaⁿ-kìⁿ chit ê sū, chiū thiah-lı̍h góa ê saⁿ kap phàu, chhoah góa ê thâu-mn̂g kap chhùi-chhiu, gông-ngia̍h teh chē.

4

Kìⁿ-nā ūi Í-sek-lia̍t Siōng-tè ê ōe lâi ngia̍uh-ngia̍uh-chhoah--ê, lóng chū-chı̍p kàu góa chia, in-ūi siū-lia̍h tò-lâi ê lâng só͘ hōan ê chōe; góa chiū gông-ngia̍h teh chē, kàu hiàn ê-hng-chè ê sî.

5

Hiàn ê-hng-chè ê sî, góa tùi góa ê ut-būn khí-lâi, saⁿ phàu thiah-lı̍h, siang-kha kūi--lo̍h-khì, ǹg Iâ-hô-hoa góa ê Siōng-tè kia̍h-khí chhiú, kóng,

6

Góa ê Siōng-tè ah, góa kiàn-siàu làu-khùi, m̄-káⁿ kia̍h-thâu ǹg góa ê Siōng-tè Lí, in-ūi góan ê chōe im-kè thâu-khak, góan ê chōe-ok tú-thiⁿ.

7

Tùi góan lia̍t-chó͘ ê jı̍t kàu kin-á-jı̍t, góan ê chōe-ok chin-tāng; ūi-tio̍h góan ê chōe-kòa, góan kap góan ê lia̍t-ông, chè-si, lóng kau tī gōa-pang lia̍t-ông ê chhiú, siū to-kiàm, siū ló͘-lia̍h. siū chhiúⁿ-kiap, bīn kiàn-siàu, chhin-chhiūⁿ kin-á-jı̍t ê khóan.

8

Taⁿ tit-tio̍h Iâ-hô-hoa góan ê Siōng-tè chiām-chhiáⁿ si-un hō͘ góan, kā góan lâu chiah ê tô-thoat ê lâng, hō͘ góan chhin-chhiūⁿ tit-tio̍h thih-teng tèng tī I sèng ê só͘-chāi, hō͘ góan ê Siōng-tè thang chiò-kng góan ê ba̍k-chiu, hō͘ góan tī lô͘-lē-tiong lî-á koh-o̍ah.

9

In-ūi góan sī lô͘-lē, chóng-sī tī lô͘-lē tiong, góan ê Siōng-tè bô khì-sak góan; koh hō͘ góan tī Pho-su lia̍t-ông ê bīn-chêng tit-tio̍h un-tián, hō͘ góan koh-o̍ah, ōe koh khí góan Siōng-tè ê tiān, siu-lí hiah ê húi-hōai ê só͘-chāi, hō͘ góan tī Iû-tāi kap Iâ-lō͘-sat-léng tit-tio̍h ū chhiûⁿ-piah.

10

Góan ê Siōng-tè ah, kì-jiân án-ni, góan iáu ū sím-mı̍h ōe thang kóng ah? In-ūi góan í-keng khì-sak Lí ê bēng-lēng,

11

chiū-sī Lí thok Lí ê lô͘-po̍k chiah ê sian-ti só͘ bēng-lēng-ê kóng, Lín só͘ khì beh sêng-chiap chòe-gia̍p ê tōe sī ù-òe ê tōe, ūi-tio̍h hiah ê kok ê peh-sìⁿ ê ù-òe, kap in khó-ò͘ⁿ ê sū; in-ūi in hō͘ chôan-tōe tùi chit-piⁿ kàu hit-piⁿ, móa-móa lâ-sâm.

12

Só͘-í m̄-thang chiong lín ê cha-bó͘-kiáⁿ kè in ê kiáⁿ, iā m̄-thang kā lín ê kiáⁿ chhōa in ê cha-bó͘-kiáⁿ, éng-éng m̄-thang kā in tô͘-bô͘ pêng-an, kap in ê lī-ek; án-ni lín chiū thang kiông-sēng, chia̍h chit só͘-chāi ê hó-mı̍h, sòa lâu hō͘ lín ê kiáⁿ-sun éng-óan chòe-gia̍p.

13

Góan in-ūi góan ê pháiⁿ só͘-kiâⁿ, kap góan ê tāng-chōe, í-keng tú-tio̍h che it-chhè ê sū, góan ê Siōng-tè ah, Lí hêng-ho̍at góan, khah-khin góan ê chōe só͘ eng-kai tit-tio̍h--ê; koh kā góan lâu chiah ê thoat-lī ê lâng;

14

góan kiám thang koh pōe-ge̍k Lí ê bēng-lēng, kap kiâⁿ khó-ò͘ⁿ ê sū ê peh-sìⁿ kiat-chhin mah? nā án-ni, Lí kiám bô beh siū-khì góan, kàu bia̍t-bô góan, tì-kàu bô chı̍t-ê lâu-teh, bô chı̍t-ê tô-thoat mah?

15

Iâ-hô-hoa Í-sek-lia̍t ê Siōng-tè ah, Lí sī kong-gī, góan chiah ê lâu-teh ê lâng chiah tit-tio̍h tô-thoat, chhin-chhiūⁿ kin-á-jı̍t. Khòaⁿ ah, góan tī Lí ê bīn-chêng ū chōe-ok; in-ūi án-ni bô lâng tī Lí ê bīn-chêng khiā ōe tiâu.