Í-sū-la̍h 第 8 章 - 巴克禮全羅

1

A-ta̍t-siat-se ông chē-ūi ê sî, kap góa tùi Pa-pí-lûn chiūⁿ-lâi ê lâng, in ê cho̍k-tiúⁿ, kap in ê sè-hē, kì tī ē-bīn.

2

Sio̍k Hui-nî-hap ê hō͘-è ū Kek-sūn, sio̍k Í-tha-má ê hō͘-è ū Tān-í-lí, sio̍k Tāi-pı̍t ê hō͘-è ū Hap-tu̍t.

3

Sio̍k pa-lio̍k ê hō͘-è, chiū-sī Sī-ka-nî ê hō͘-è, ū Sat-ka-lī-a; kap i ê, chiàu sè-hē lâi sǹg, ū ta-po͘-teng chı̍t-pah gō͘-cha̍p lâng.

4

Sio̍k Pa-hap-mô͘-ap ê hō͘-è ū Se-la̍h-hi-ngá ê kiáⁿ Í-lī-iok-nái; kap i ê, ū ta-po͘-teng nn̄g-pah lâng.

5

Sio̍k Sī-ka-nî ê hō͘-è ū Ngá-hap-sek ê kiáⁿ; kap i ê, ū ta-po͘-teng saⁿ-pah lâng.

6

Sio̍k A-teng ê hō͘-è, ū Iok-ná-tan ê kiáⁿ Í-pia̍t; kap i ê, ū ta-po͘-teng gō͘-cha̍p lâng.

7

Sio̍k Í-lân ê hō͘-è, ū A-tha-lī-ngá ê kiáⁿ, Iâ-su-a; kap i ê, ū ta-po͘-teng chhit-cha̍p lâng.

8

Sio̍k Sī-hoat-thê-ngá ê hō͘-è, ū Bí-ka-le̍k ê kiáⁿ Se-pa-tē-ngá; kap i ê, ū ta-po͘-teng poeh-cha̍p lâng.

9

Sio̍k Iok-ap ê hō͘-è, ū Iâ-iat ê kiáⁿ Gô-pa-tí-a; kap i ê, ū ta-po͘-teng nn̄g-pah it-cha̍p-poeh lâng.

10

Sio̍k Sī-lô-bı̍t ê hō͘-è, ū Iok-sè-húi ê kiáⁿ; kap i ê, ū ta-po͘-teng chı̍t-pah la̍k-cha̍p lâng.

11

Sio̍k Pí-pài ê hō͘-è, ū Pí-pài ê kiáⁿ Sat-ka-lī-a; kap i ê, ū ta-po͘-teng jī-cha̍p-poeh lâng.

12

Sio̍k Ap-kah ê hō͘-è, ū Hap-ka-thán ê kiáⁿ, Iok-hap-lân; kap i ê, ū ta-po͘-teng chı̍t-pah it-cha̍p lâng.

13

Sio̍k A-to-nî-kan ê hō͘-è, chiū-sī lō͘-bé-ê, in ê miâ sī Í-lī-hoat-lia̍t, Iâ-lī, Sī-má-ngá; kap in ê, ū ta-po͘-teng la̍k-cha̍p lâng.

14

Sio̍k Pí-kek-óa-i ê hō͘-è, ū Ou-thài, kap Sat-pò͘; kap in ê, ū ta-po͘-teng chhit-cha̍p lâng.

15

Góa chio-chı̍p chiah ê lâng tī lâu-jı̍p A-hap-óa ê hô-piⁿ; góan tī-hia tòa tī pò͘-pîⁿ saⁿ-jı̍t; góa chhâ-khòaⁿ peh-sìⁿ kap chè-si, khòaⁿ bô Lī-bī lâng tī-hia.

16

Góa chhe lâng tiàu hiah ê thâu-lâng, chiū-sī Í-lī-í-siā, A-lia̍t, Sī-má-ngá, Í-lī-ná-tan, Ngá-lı̍p, Í-lī-ná-tan, Ná-tan, Sat-ka-lī-a, Bí-su-lân; koh tiàu kàu-ôan Iok-ngá-lı̍p kap Í-lī-ná-tan.

17

Góa chhe in khì Ka-se-húi-ngá ê só͘-chāi, kìⁿ hit ê thâu-lâng E̍k-to, koh kā in kóng, in tī ka-se-húi-ngá ê só͘-chāi tio̍h tùi E̍k-to kap i ê hiaⁿ-tī Nî-thê-lêng kóng sím-mı̍h ōe, kah in ūi lán Siōng-tè ê tiān tòa chhe-ēng ê lâng lâi.

18

Tit-tio̍h lán ê Siōng-tè si-un ê chhiú pang-chān góan, in tī Í-sek-lia̍t ê cheng-sun, Lī-bī ê sun, Bo̍at-lī ê hō͘-è tiong, tòa chı̍t-ê thong-ta̍t ê lâng lâi; koh ū Sī-lī-pí kap i hiah ê kiáⁿ, kap i ê hiaⁿ-tī, kiōng cha̍p-poeh lâng.

19

Koh ū Hap-sa-pí-ngá; kap i ê, ū Bí-la̍h-lī ê hō͘-è, Iâ-su-a, kap i ê hiaⁿ-tī, kap in ê kiáⁿ, kiōng jī-cha̍p lâng.

20

Koh tòa Nî-thê-lêng lâng lâi, chiū-sī chêng Tāi-pı̍t kap chiah ê siú-léng só͘ phài-chòe Lī-bī lâng ê chhe-ēng-ê, kiōng nn̄g-pah jī-cha̍p ê Nî-thê-lêng; in ê miâ lóng ū teng-kì.

21

Hit-sî góan tī A-hap-óa ê hô-piⁿ soan-pò͘ kìm-chia̍h, thang hō͘ góan tī lán ê Siōng-tè ê bīn-chêng ka-kī khiam-pi, kiû I hō͘ góan kap góan ê gín-ná, kap it-chhè só͘-ū-ê, lóng tit-tio̍h pîⁿ-tháⁿ ê lō͘.

22

In-ūi kiû ông poah chı̍t-tūi pō͘-peng bé-peng, pang-chān góan tī lō͘--nih tí-tng tùi-te̍k, góa lia̍h-chòe kiàn-siàu; in-ūi góan bat tùi ông kóng, Góan ê Siōng-tè ê chhiú pó-hō͘ it-chhè kiû I ê lâng; to̍k-to̍k I ê lêng-le̍k kap siū-khì, kong-kek it-chhè khì-sak I ê lâng.

23

Só͘-í góan ūi-tio̍h án-ni kìm-chia̍h, kiû góan ê Siōng-tè; I chiū thiaⁿ góan.

24

Tùi án-ni góa hun-phài chè-si ê thâu-lâng cha̍p-jī-ê, chiū-sī Sī-lī-pí, Hap-sa-pí-ngá, kap in ê hiaⁿ-tī cha̍p-lâng.

25

Góa chiū chiong lán Siōng-tè tiān ê lé-mı̍h , chiū-sī kim gûn kap hiah ê khì-kū, sī ông kap i ê bô͘-sū, i ê siú-léng, kap tī-hia ê Í-sek-lia̍t chèng-lâng só͘ hiàn-ê, lóng phêng lâi kau-hù in.

26

Góa chiū phêng lâi kau tī in ê chhiú, ū gûn la̍k-pah tha-liân-tek, gûn-khì tāng chı̍t-pah tha-liân-tek; kim chı̍t-pah tha-liân-tek;

27

kim-óaⁿ jī-cha̍p tè, tāng chı̍t-chheng ta̍t-lī-khek; kim-nà-nà hó ê tâng-khì nn̄g-tè, pó-kùi chhin-chhiūⁿ kim.

28

Góa tùi in kóng, Lín chòe-sèng kui Iâ-hô-hoa, chiah ê khì-kū iā sī sèng, hiah ê kim-gûn sī kam-sim hiàn hō͘ Iâ-hô-hoa lín lia̍t-chó͘ ê Siōng-tè--ê.

29

Lín tio̍h kín-sīn kò͘-siú, tı̍t-kàu lín tī Iâ-lō͘-sat-léng Iâ-hô-hoa tiān ê pâng-lāi, tī chè-si ê thâu-lâng kap Lī-bī lâng, í-kı̍p Í-sek-lia̍t hiah ê cho̍k-tiúⁿ ê bīn-chêng phêng i.

30

Tùi án-ni chè-si Lī-bī lâng siu kim-gûn kap khì-kū, chiàu in ê khin-tāng, beh tòa kàu Iâ-lō͘-sat-léng lán Siōng-tè ê tiān.

31

Chiaⁿ ge̍h cha̍p-jī jı̍t, góan lī-khui A-hap-óa ê hô-piⁿ, beh khì Iâ-lō͘-sat-léng; lán ê Siōng-tè ê chhiú pó-hō͘ góan, kiù góan thoat-lī tùi-te̍k, kap bâi-ho̍k tī lō͘--nih ê lâng ê chhiú.

32

Góan kàu Iâ-lō͘-sat-léng, tiàm hia saⁿ-jı̍t.

33

Kàu tē-sì jı̍t, tī lán Siōng-tè ê tiān, phêng hiah ê kim gûn kap khì-kū, kau tī chè-si Ou-lī-a ê kiáⁿ Bí-lī-bo̍at ê chhiú; kap i ê, ū Hui-nî-hap ê kiáⁿ Í-lī-a-sat; koh kap in ê, ū Lī-bī lâng Iâ-su-a ê kiáⁿ Iok-sat-po̍at, kap Pin-lōe ê kiáⁿ Lô-a-tí.

34

It-chhè chiàu in ê siàu-gia̍h, chiàu in ê khin-tāng kau i; tng-sî iā kì in ê khin-tāng.

35

Siū-lia̍h ê lâng tùi siū-lia̍h ê tiong-kan tò-lâi ê, hiàn sio-chè hō͘ Í-sek-lia̍t ê Siōng-tè, chiū-sī ūi Í-sek-lia̍t chèng-lâng hiàn gû-káng cha̍p-jī chiah, mî-iûⁿ-káng káu-cha̍p-la̍k chiah, mî-iûⁿ-á chhit-cha̍p-chhit chiah; koh hiàn soaⁿ-iûⁿ-káng cha̍p-jī chiah chòe sio̍k-chōe ê chè. Chiah-ê lóng sī chòe sio-chè hiàn-hō͘ Iâ-hô-hoa ê.

36

In chiong ông ê jū-chí kau hō͘ ông ê jîn-sîn, kap tī Hô-gōa hiah ê chóng-tok; in chiū pang-chān peh-sìⁿ kap Siōng-tè ê tiān.