Chhòng-sè-kì 第 1 章 - 巴克禮全羅

1

Gôan-khí-thâu Siōng-tè chhòng-chō thiⁿ kap tōe.

2

Tōe sī khang-khang hūn-tūn; chhim-ian ê bīn-chiūⁿ o͘-àm; Siōng-tè ê Sîn ūn-tōng tī chúi-bīn.

3

Siōng-tè kóng, Tio̍h ū kng, chiū ū kng.

4

Siōng-tè khòaⁿ kng, sī hó; Siōng-tè chiong kng àm pun-khui.

5

Siōng-tè kiò hit ê kng chòe Jı̍t, kiò àm chòe Mî. Ū ê-hng ū chá-khí, sī thâu chı̍t-jı̍t.

6

Siōng-tè kóng, Chiah ê chúi ê tiong-kan tio̍h ū kiong-chhong, chiong chúi kap chúi pun-khui.

7

Siōng-tè chiū chō kiong-chhong, lâi hun-khui kiong-chhong-ē ê chúi kap kiong-chhong-téng ê chúi; chiū ū án-ni.

8

Siōng-tè kiò kiong-chhong chòe Thiⁿ. Ū ê-hng ū chá-khí, sī tē-jī jı̍t.

9

Siōng-tè kóng, Thiⁿ-ē chiah ê chúi tio̍h chū-chı̍p kàu chı̍t só͘-chāi, ta-tōe tio̍h chhut-hiān; chiū ū án-ni.

10

Siōng-tè kiò ta-tōe chòe Tōe; kiò chū-chı̍p ê chúi chòe Hái; Siōng-tè khòaⁿ-i sī hó.

11

Siōng-tè kóng, Tōe tio̍h hoat-chháu, í-kı̍p kiat-chí ê chhài-soe, kap chiàu-lūi siⁿ ké-chí ê chhiū, hit lāi-bīn ū i ê chí, tī tōe-chiūⁿ; chiū ū án-ni.

12

Tōe chiū hoat-chháu, kap chiàu-lūi kiat-chí ê chhài-soe, kap chiàu-lūi siⁿ ké-chí ê chhiū, lāi-bīn ū i ê chí; Siōng-tè khòaⁿ-i sī hó.

13

Ū ê-hng ū chá-khí, sī tē-saⁿ jı̍t.

14

Siōng-tè kóng, Thiⁿ-nı̍h ê kiong-chhong tio̍h ū hoat-kng ê thé, lâi hun-piat jı̍t-mî; iā thang chòe tiāu-thâu, sù-kùi, jı̍t, nî;

15

ia̍h hō͘ in chòe kng-thé tī thiⁿ ê kiong-chhong, chiò-kng tī tōe-chiūⁿ; chiū ū án-ni.

16

Siōng-tè chiū chō tōa ê kng-thé nn̄g-ê; tōa ê kng-thé lâi kóan jı̍t-sî, sòe ê kng-thé lâi kóan mî-sî; iā chō chhiⁿ-sîn.

17

Siōng-tè hē in tī thiⁿ-nı̍h ê kiong-chhong, hō͘ in chiò kng tī tōe-nı̍h;

18

iā beh kóan ū jı̍t mî, hun-piat kng àm. Siōng-tè khòaⁿ-i sī hó.

19

Ū ê-hng ū chá-khí, sī tē-sì jı̍t.

20

Siōng-tè kóng, Chúi tio̍h siⁿ-thòaⁿ chōe-chōe ū o̍ah-miā ê tōng-bu̍t; chiáu pe tī tōe ê téng-bīn, thiⁿ-nı̍h ê kiong-chhong.

21

Siōng-tè chiū chhòng-chō hái-nı̍h ê tōa-hî, í-kı̍p chúi só͘ siⁿ chōe-chōe ū o̍ah-miā ê tōng-bu̍t, kok chiàu i ê lūi, koh chhòng-chō ta̍k-iūⁿ ê pe-chiáu, chiàu i ê lūi; Siōng-tè khòaⁿ-i sī hó.

22

Siōng-tè sù-hok in, kóng, Tio̍h siⁿ-thòaⁿ ke-thiⁿ chin-chōe, chhiong-móa tī hái-nı̍h ê chúi, iā hō͘ chiáu-chiah siⁿ-thòaⁿ chōe-chōe tī tōe-nı̍h.

23

Ū ê-hng ū chá-khí, sī tē-gō͘ jı̍t.

24

Siōng-tè kóng, Tōe tio̍h siⁿ ū o̍ah-miā ê tōng-bu̍t, chiàu i ê lūi, cheng-siⁿ, thâng-thōa, tōe-chiūⁿ ê cháu-siù, chiàu i ê lūi; chiū ū án-ni.

25

Siōng-tè chiū chō tōe-chiūⁿ ê cháu-siù chiàu i ê lūi, cheng-siⁿ chiàu i ê lūi, tōe-chiūⁿ it-chhè ê thâng-thōa chiàu i ê lūi; Siōng-tè khòaⁿ-i sī hó.

26

Siōng-tè kóng, Lán tio̍h chō lâng chhin-chhiūⁿ lán ê siōng, chiàu lán ê khóan; hō͘ in kóan-lí hái-nı̍h ê hî, thiⁿ-nı̍h ê chiáu, kap cheng-siⁿ, kap chôan-tōe, í-kı̍p tōe-chiūⁿ teh sô ê thâng-thōa.

27

Siōng-tè chiū chhòng-chō lâng chhin-chhiūⁿ I ka-kī ê siōng, chiàu Siōng-tè ê siōng chhòng-chō i; chhòng-chō in lâm-ê lú-ê.

28

Siōng-tè sù-hok in; Siōng-tè koh tùi in kóng, Tio̍h siⁿ-thòaⁿ chin-chōe, chhiong-móa tī tōe-chiūⁿ, lâi khah-iâⁿ i; iā tio̍h tī-lí hái-nı̍h ê hî, thiⁿ-nı̍h ê chiáu, kap tōe-chiūⁿ it-chhè só͘ tín-tāng ê o̍ah-mı̍h.

29

Siōng-tè kóng, Góa ū hō͘ lín piàn tōe-chiūⁿ it-chhè kiat-chí ê chhài-soe, koh it-chhè ê chhiū, kî-tiong ū kiat-chí ê chhiū ê ké-chí; lóng hō͘ lín chòe chia̍h-mı̍h.

30

Lūn-kàu tōe-chiūⁿ it-chhè ê cháu-siù, thiⁿ-tiong it-chhè ê chiáu, kap tōe-chiūⁿ it-chhè ōe tín-tāng ū o̍ah-miā ê mı̍h, Góa chiong it-chhè chhiⁿ-chháu hō͘ in chòe chia̍h-mı̍h; chiū ū án-ni.

31

Siōng-tè khòaⁿ I it-chhè só͘ chō-ê, khòaⁿ ah, chin-hó. Ū ê-hng ū chá-khí, sī tē-la̍k jı̍t.