Chhòng-sè-kì 第 2 章 - 巴克禮全羅

1

Thiⁿ tōe kap i it-chhè só͘-ū-ê í-keng chòe-ôan.

2

Tī tē-chhit jı̍t, Siōng-tè ôan I só͘ chō ê kang; chiū tī tē-chhit jı̍t hioh I it-chhè só͘ chō ê kang.

3

Siōng-tè sù-hok tī tē-chhit jı̍t, tēng chòe sèng-jı̍t; in-ūi tī chit-jı̍t Siōng-tè thêng I it-chhè chhòng-chō ê kang, chiū an-hioh.

4

Thiⁿ tōe chhòng-chō ê lâi-le̍k, tī Iâ-hô-hoa Siōng-tè chō tōe kap thiⁿ ê jı̍t, chhin-chhiūⁿ ē-tóe.

5

Soaⁿ-iá it-chhè ê chháu-ba̍k bē ū tī tōe-nı̍h; soaⁿ-iá it-chhè ê chhài-soe bē ū hoat; in-ūi Iâ-hô-hoa Siōng-tè bô lo̍h-hō͘ tī tōe-nı̍h, iā bô lâng thang chèng-choh hit ê thó͘-tōe.

6

Chóng-sī ū bū tùi tōe khí, lūn-te̍k piàn tōe-bīn.

7

Iâ-hô-hoa Siōng-tè ēng tōe-chiūⁿ ê thô͘-hún chhiau chòe lâng, pûn o̍ah ê khì jı̍p i ê phīⁿ-khang; lâng chiū chiâⁿ-chòe o̍ah ê lêng-hûn.

8

Iâ-hô-hoa Siōng-tè tī tang-hng, tī Ai-tiân, chèng chı̍t ê hn̂g; chiong só͘ chō ê lâng hē tī-hia.

9

Iâ-hô-hoa Siōng-tè hō͘ ta̍k-iūⁿ ê chhiū tùi tōe-nı̍h hoat-khí-lâi, hó-khòaⁿ iā hó-chia̍h; tī hn̂g ê tiong-kan koh ū o̍ah-miā ê chhiū, kap hun-piat hó-pháiⁿ ê chhiū.

10

Ai-tiân ū hô lâu-chhut lâi kòan-ak hit ê hn̂g; tùi-hia hun-khui chòe sì-tiâu.

11

Thâu-chı̍t-tiâu miâ-kiò Pí-sùn; chiū-sī se̍h-lâu tī Hap-hui-la̍h chôan-tōe-ê; tī-hia ū chhut kim;

12

hit-ūi ê kim sī chin-hó; ia̍h chhut chin-chu phek-ge̍k.

13

Tē-jī-tiâu miâ kiò Ki-hùn, chiū-sī se̍h-lâu tī Kó͘-sı̍t chôan-tōe-ê.

14

Tē-saⁿ-tiâu miâ-kiò Hi-tí-kiat, chiū-sī lâu tī A-su̍t ê tang-sì-ê. Tē-sì-tiâu chiū-sī Pek-lat.

15

Iâ-hô-hoa Siōng-tè chiong hit ê lâng hē tī Ai-tiân hn̂g, lâi chèng-choh kò͘-siú.

16

Iâ-hô-hoa Siōng-tè hoan-hù hit ê lâng kóng, Hn̂g-lāi ta̍k-hō chhiū ê ké-chí, thang sûi-ì lâi chia̍h.

17

Chóng-sī hun-piat hó-pháiⁿ ê chhiū, i ê ké-chí m̄-thang chia̍h; in-ūi chia̍h ê jı̍t lí tek-khak sí.

18

Iâ-hô-hoa Siōng-tè kóng, Lâng toaⁿ-sin ka-kī tòa m̄-hó; Góa beh kā i chō chı̍t ê pang-chān-ê, lâi phit-phòe i.

19

Iâ-hô-hoa Siōng-tè ēng thô͘ chòe soaⁿ-iá ta̍k-iūⁿ ê cháu-siù, í-kı̍p khong-tiong ta̍k-iūⁿ ê pe-chiáu; chhōa kàu hit-lâng ê bīn-chêng, khòaⁿ i beh chheng in sím-mı̍h miâ; kìⁿ-nā i só͘ chheng ta̍k-iūⁿ o̍ah-mı̍h-ê, chiū chòe hit ê mı̍h ê miâ.

20

Hit ê lâng chiū kā it-chhè ê cheng-siⁿ, kap khong-tiong ê pe-chiáu, kap soaⁿ-iá it-chhè ê cháu-siù lóng hō miâ; chóng-sī chhē bô chı̍t-ê thang chòe hit lâng ê pang-chān, lâi phit-phòe i.

21

Iâ-hô-hoa Siōng-tè hō͘ hit ê lâng khùn tāng-bîn, i chiū khùn; chiū the̍h i ê hia̍p-kut chı̍t-ki, pau-ba̍t i ê bah.

22

Iâ-hô-hoa Siōng-tè chiū chiong tùi hit-lâng só͘ the̍h-chhut ê hia̍p-kut, chō-chiâⁿ chı̍t ê cha-bó͘-lâng, chhōa lâi chiū-kūn hit-lâng.

23

Hit-lâng kóng, Taⁿ chit-ê sī góa kut-lāi ê kut, bah-lāi ê bah; beh chheng-chòe cha-bó͘-lâng, in-ūi i sī tùi ta-po͘-lâng the̍h-chhut.

24

Só͘-í lâng beh lī-khui i ê pē-bú, kiat-liân i ê bó͘, in chiū chiâⁿ-chòe chı̍t-thé.

25

Ang-bó͘ nn̄g-lâng pîⁿ-pîⁿ thǹg-pak-theh, iā bô kiàn-siàu.