Chhòng-sè-kì 第 12 章 - 巴克禮全羅

1

Iâ-hô-hoa tùi A-pek-lân kóng, Lí tio̍h lī-khui pún-tōe, pún-cho̍k, lāu-pē ê ke, khì Góa só͘ beh chí-sī lí ê tōe.

2

Góa beh hō͘ lí chiâⁿ-chòe tōa-kok, Góa beh sù-hok lí, hō͘ lí ê miâ chòe tōa, lí ia̍h beh hō͘ lâng tit-tio̍h hok-khì;

3

chiok-hok lí-ê, Góa beh sù-hok hō͘ in; chiù-chó͘ lí-ê, Góa beh chek-ho̍at i; tōe-chiūⁿ bān-cho̍k beh in-ūi lí tit-tio̍h hok-khì.

4

A-pek-lân chiàu Iâ-hô-hoa hoan-hù ê ōe, chiū khì; Lô-tek ia̍h kap i khì. A-pek-lân chhut Hap-lân ê sî chhit-cha̍p-gō͘ hè.

5

A-pek-lân tòa i ê bó͘ Sat-lāi, kap i ê tı̍t-á Lô-tek; í-kı̍p in tī Hap-lân só͘ chek-chū ê châi-bu̍t, só͘ tit-tio̍h ê lâng-gia̍h; in chiū chhut-khì, beh khì Ka-lâm tōe; in chiū kàu Ka-lâm tōe.

6

A-pek-lân keng-kè hit ê tōe, kàu tī Sī-kiàm ê só͘-chāi, kàu Mô͘-lí ê siōng-chhiū; hit-sî Ka-lâm cho̍k iáu teh tòa.

7

Iâ-hô-hoa tùi A-pek-lân chhut-hiān kóng, Góa beh chiong chit ê tōe-hng siúⁿ-sù lí ê hō͘-è; i chiū tī-hia ūi-tio̍h tùi i chhut-hiān ê Iâ-hô-hoa khí chı̍t chō tôaⁿ.

8

Tùi hia i sóa kàu Pek-te̍k-lī tang-sì ê soaⁿ, tah pò͘-pîⁿ; sai-sì sī Pek-te̍k-lī, tang-sì sī Ai; tī-hia ūi-tio̍h Iâ-hô-hoa khí chı̍t chō tôaⁿ, kiû-kiò Iâ-hô-hoa ê miâ.

9

A-pek-lân chiām-chiām sóa-khì lâm-sì ê tōe.

10

Hit ê tōe tú-tio̍h ki-hng, A-pek-lân lo̍h-khì Ai-kı̍p, beh tī-hia chiām-sî khiā-khí; in-ūi hit ê tōe ki-hng chin tōa.

11

Chiong-kūn jı̍p Ai-kı̍p, chiū tùi i ê bó͘ Sat-lāi kóng, Góa chai lí sī bīn-māu hó-khòaⁿ ê hū-jîn-lâng;

12

Ai-kı̍p lâng khòaⁿ-kìⁿ lí ê sî beh kóng, Chit-ê sī i ê bó͘, in beh thâi-sí góa, lâi lâu lí o̍ah-teh.

13

Kiû lí tio̍h kóng, lí sī góa ê sió-bē, hō͘ góa in-ūi lí tit-tio̍h pêng-an; góa ê sìⁿ-miā ia̍h tùi lí lâi tit-tio̍h o̍ah.

14

A-pek-lân kàu Ai-kı̍p ê sî, Ai-kı̍p lâng khòaⁿ-kìⁿ hit ê hū-jîn-lâng ke̍k-kî súi.

15

Hoat-ló ê jîn-sîn khòaⁿ-kìⁿ i, chiū tùi Hoat-ló o-ló i; hit ê hū-jîn-lâng chiū hō͘ lâng tòa i jı̍p Hoat-ló ê ông-kiong.

16

Hoat-ló in-ūi chit ê hū-jîn-lâng chiū hó khóan-thāi A-pek-lân; A-pek-lân chiū tit-tio̍h iûⁿ, gû, kang ê lû, lô͘-po̍k, lú-pī, bú ê lû, í-kı̍p lo̍k-tô.

17

Iâ-hô-hoa in-ūi A-pek-lân ê bó͘ Sat-lāi ê iân-kò͘, kàng tōa chai-ē tī Hoat-ló kap i chôan-ke.

18

Hoat-ló chiū kiò A-pek-lân lâi kóng, Lí tùi góa só͘-chòe-ê sī sím-mı̍h sū? siáⁿ-sū bô kā góa kóng i sī lí ê bó͘?

19

Siáⁿ-sū chheng i chòe sió-bē? tì-kàu góa chiong i chhōa lâi chòe góa ê bó͘; taⁿ lí ê bó͘ tī-chia, thang chhōa i, chòe lí khí.

20

Tùi hit-tia̍p Hoat-ló ūi-tio̍h i lâi hoan-hù lâng; in chiū chiong i kap i ê bó͘ kap i só͘-ū-ê, lóng sàng i khì.