Chhòng-sè-kì 第 16 章 - 巴克禮全羅

1

A-pek-lân ê bó͘ Sat-lāi bô kā i siⁿ-kiáⁿ; i ū chı̍t ê lú-pī miâ Hā-kah; sī Ai-kı̍p lâng.

2

Sat-lāi kā A-pek-lân kóng, Iâ-hô-hoa kìm góa siⁿ-kiáⁿ; chhiáⁿ lí kap góa ê lú-pī tâng-pâng; kiám-chhái góa thang tùi i tit-tio̍h gín-á. A-pek-lân thiaⁿ-thàn Sat-lāi ê ōe.

3

Tùi hit-tia̍p A-pek-lân ê bó͘ Sat-lāi chiong i ê lú-pī Ai-kı̍p lâng Hā-kah hō͘ i tiōng-hu A-pek-lân chòe-bó͘; hit-sî A-pek-lân í-keng tòa Ka-lâm cha̍p nî.

4

I kap Hā-kah tâng-pâng, Hā-kah chiū hôai-īn; i chai ka-kī ū-sin, chiū khòaⁿ-khin chú-bú.

5

Sat-lāi kā A-pek-lân kóng, Góa ê oan-óng kui tī lí; góa chiong góa ê lú-pī hē tī lí ê sim-hôai-tiong; i khòaⁿ ka-kī ū-sin, chiū khòaⁿ-khin góa; gōan Iâ-hô-hoa tī lí góa ê tiong-kan phòaⁿ-tòan.

6

A-pek-lân tùi Sat-lāi kóng, Lí ê lú-pī tī lí ê chhiú, lí thang sûi-ì khóan-thāi i. Sat-lāi khó͘-chhó͘ i, i chiū tùi Sat-lāi ê bīn-chêng tô-cháu.

7

Iâ-hô-hoa ê sù-chiá tú-tio̍h i tī khòng-iá ê chúi-chôaⁿ-piⁿ; hit ê chúi-chôaⁿ tī Su-jíⁿ ê lō͘-chiūⁿ.

8

Tùi i kóng, Sat-lāi ê lú-pī Hā-kah, lí tùi tah-lo̍h lâi? beh tah-lo̍h khì? I kóng, Góa tùi góa ê chú-bú Sat-lāi ê bīn-chêng cháu-chhut-lâi.

9

Iâ-hô-hoa ê sù-chiá tùi i kóng, Lí tò-khì lí ê chú-bú hia, hâng-ho̍k tī i ê chhiú-ē.

10

Iâ-hô-hoa ê sù-chiá koh tùi i kóng, Góa beh hō͘ lí ê hō͘-è ke̍k-kî chōe, sīm-chì bōe-sǹg-tit.

11

Iâ-hô-hoa ê sù-chiá koh tùi i kóng, Lí taⁿ hôai-īn, beh siⁿ chı̍t ê kiáⁿ, tio̍h kā i hō miâ Í-sı̍t-má-lī, in-ūi Iâ-hô-hoa thiaⁿ-kìⁿ lí ê khó͘-chêng.

12

I chòe lâng beh chhin-chhiūⁿ iá-lû, i ê chhiú beh kong-kek chèng-lâng, chèng-lâng ê chhiú beh kong-kek i; i beh khiā-khí tī chèng hiaⁿ-tī ê thâu-chêng.

13

Hā-kah chiū chheng hit ê tùi i kóng ōe ê Iâ-hô-hoa ê miâ kóng, Lí sī khòaⁿ-kìⁿ ta̍k-hāng ê Siōng-tè; in-ūi kóng, Liân tī-chia góa ia̍h khòaⁿ-kìⁿ hit ê khòaⁿ-kìⁿ góa ê mah?

14

Só͘-í chit ê chíⁿ miâ-kiò Pí-jíⁿ-la̍h-hái-lâi, chiū-sī Ka-te-su kap Pa-lia̍t ê tiong-kan.

15

Āu-lâi Hā-kah kā A-pek-lân siⁿ chı̍t ê kiáⁿ; A-pek-lân kā i ê kiáⁿ hō miâ kiò Í-sı̍t-má-lī, chiū-sī Hā-kah só͘ siⁿ-ê.

16

Hā-kah kā A-pek-lân siⁿ Í-sı̍t-má-lī ê sî, A-pek-lân poeh-cha̍p-la̍k hè.