Chhòng-sè-kì 第 17 章 - 巴克禮全羅

1

A-pek-lân káu-cha̍p-káu hè ê sî, Iâ-hô-hoa tùi A-pek-lân hián-hiān, kā i kóng, Góa sī chôan-lêng ê Siōng-tè, lí tī Góa ê bīn-chêng kiâⁿ-chòe tio̍h ôan-chôan.

2

Góa beh kap lí lı̍p Góa ê iok, hō͘ lí ê hō͘-è ke̍k-kî chōe.

3

A-pek-lân chiū phak-lo̍h tī tōe-nı̍h; Siōng-tè koh kap i kóng-ōe, kóng,

4

Góa kap lí lı̍p Góa ê iok, lí beh chòe chōe-chōe kok ê pē.

5

Tùi taⁿ í-āu, lí ê miâ bô koh kiò-chòe A-pek-lân, sī beh kiò-chòe A-pek-la̍h-hán, in-ūi Góa í-keng lı̍p lí chòe chōe-chōe kok ê pē.

6

Góa beh hō͘ lí ê hō͘-è ke̍k-kî chōe, kok-tō͘ tùi lí lâi lı̍p, kun-ông tùi lí lâi chhut.

7

Góa beh kap lí, í-kı̍p lí le̍k-tāi ê hō͘-è, siat-lı̍p Góa ê iok chòe éng-óan ê iok; sī beh chòe lí kap lí ê hō͘-è ê Siōng-tè.

8

Góa beh chiong lí hiān-chāi chhut-gōa ê tōe, chiū-sī Ka-lâm chôan-tōe, siúⁿ-sù lí kap lí ê hō͘-è, chòe éng-óan ê gia̍p; Góa ia̍h beh chòe in ê Siōng-tè.

9

Siōng-tè koh tùi A-pek-la̍h-hán kóng, Lí kap lí ê hō͘-è tio̍h le̍k-tāi chun-siú Góa ê iok.

10

Lín tiong-kan só͘ ū ê ta-po͘-ê, lóng tio̍h siū kat-lé; che chiū-sī Góa kap lí í-kı̍p lí ê hō͘-è só͘ lı̍p ê iok, sī lín só͘ tio̍h chun-siú-ê.

11

Lín tio̍h koah lín iông-bu̍t ê phê; che sī beh chòe Góa kap lín só͘ lı̍p ê iok ê kì-hō.

12

Lín le̍k-tāi ê ta-po͘-ê, bô-lūn ke-lāi siⁿ-ê, á-sī lí ê hō͘-è í-gōa, ēng gûn tùi gōa-bīn lâng bóe-ê, í-keng chhut-sì poeh-jı̍t, lóng tio̍h siū kat-lé.

13

Lí ke-lāi siⁿ-ê, kap lí ēng gûn bóe-ê, lóng tek-khak tio̍h siū kat-lé; án-ni Góa ê iok beh hē tī lín ê sin-chiūⁿ, chòe éng-óan ê iok.

14

Bô siū kat-lé ê ta-po͘-ê, i sin-khu kì-jiân bô siū kat-lé, sī pōe Góa ê iok; tek-khak tùi peh-sìⁿ ê tiong-kan tû-khì.

15

Siōng-tè koh tùi A-pek-la̍h-hán kóng, Lí ê bó͘ Sat-lāi, m̄-thang koh kiò i ê miâ Sat-lāi; i ê miâ beh kiò-chòe Sat-la̍h.

16

Góa beh sù-hok i, Góa ia̍h beh hō͘ lí tùi i tit-tio̍h chı̍t ê kiáⁿ; Góa beh sù-hok i, i ia̍h beh chòe lia̍t-kok ê lāu-bú; beh ū pang-kok ê ông tùi i chhut.

17

A-pek-la̍h-hán chiū phak-teh chhiò, sim-lāi kóng, Chı̍t-pah hè ê lâng iáu ōe siⁿ-kiáⁿ mah? Sat-la̍h í-keng káu-cha̍p hè, iáu ōe seng-ióng mah?

18

A-pek-la̍h-hán tùi Siōng-tè kóng, Tān gōan Í-sı̍t-má-lī o̍ah tī Lí ê bīn-chêng.

19

Siōng-tè kóng, M̄-sī lah, lí ê bó͘ Sat-la̍h beh kā lí siⁿ chı̍t ê kiáⁿ, lí beh kā i hō-miâ kiò Í-sat; Góa beh kap i siat-lı̍p Góa ê iok, chòe i ê hō͘-è éng-óan ê iok.

20

Lūn-kàu Í-sı̍t-má-lī, Góa ia̍h thiaⁿ lí kiû; lí khòaⁿ, Góa í-keng sù-hok i, beh hō͘ i heng-ōng, ke-thiⁿ ke̍k-kî chōe. I beh siⁿ cha̍p-jī ê cho̍k-tiúⁿ, Góa ia̍h beh hō͘ i chiâⁿ-chòe tōa-kok.

21

Kàu mê-nî chit-sî, Sat-la̍h beh kā lí siⁿ Í-sat; Góa beh kap i siat-lı̍p Góa ê iok.

22

Siōng-tè kap A-pek-la̍h-hán kóng soah, chiū lī-khui i chiūⁿ-khì.

23

Tú-tú hit-jı̍t, A-pek-la̍h-hán chiàu Siōng-tè só͘ kā i kóng-ê, kā i ê kiáⁿ Í-sı̍t-má-lī, kap A-pek-la̍h-hán ke-lāi it-chhè ê ta-po͘-lâng, bô-lūn tī ke-nı̍h siⁿ-ê, á-sī ēng i ê gûn bóe-ê, lóng kiâⁿ kat-lé.

24

A-pek-la̍h-hán siū kat-lé ê sî káu-cha̍p-káu hè;

25

i ê kiáⁿ Í-sı̍t-má-lī siū kat-lé ê sî cha̍p-saⁿ hè.

26

Tú-tú hit jı̍t A-pek-la̍h-hán kap i ê kiáⁿ Í-sı̍t-má-lī tâng siū kat-lé.

27

Ke-lāi só͘-ū ê lâng, bô-lūn tī ke-nı̍h siⁿ-ê, á-sī ēng gûn tùi gōa-bīn lâng bóe-ê, lóng kap i tâng siū kat-lé.