Chhòng-sè-kì 第 18 章 - 巴克禮全羅

1

Iâ-hô-hoa tī Bān-lī ê siōng-chhiū hia, tùi A-pek-la̍h-hán chhut-hiān; hit-sî jı̍t tng jo̍ah; A-pek-la̍h-hán chē tī pò͘-pîⁿ mn̂g-kháu;

2

kia̍h-ba̍k khí-lâi khòaⁿ, khòaⁿ-kìⁿ saⁿ lâng tī tùi-bīn teh khiā; i chı̍t-ē khòaⁿ-kìⁿ, chiū tùi pò͘-pîⁿ mn̂g-kháu, cháu khì ngiâ-chih in,

3

phak tī tōe-nı̍h, kóng, góa ê chú, góa nā tī lí ê bīn-chêng tit-tio̍h un-tián, kiû lí m̄-thang lī-khui lô͘-po̍k chòe lí khì;

4

iông-ún the̍h tām-po̍h chúi, hō͘ lín sóe-kha; chhiáⁿ hioh-khùn tī chhiū-kha;

5

góa koh the̍h tām-po̍h piáⁿ, hō͘ lín tiám-sim; jiân-āu chìn-chêng khì; in-ūi lín sī ūi-tio̍h án-ni, chiah kàu lín ê lô͘-po̍k chia. In kóng, Thang chiàu lí ê ōe khì kiâⁿ.

6

A-pek-la̍h-hán kóaⁿ-kín jı̍p pò͘-pîⁿ, kìⁿ Sat-la̍h kóng, Lí kín-kín ēng saⁿ sè-a ê mī-hún, nóa chòe piáⁿ.

7

A-pek-la̍h-hán koh cháu kàu gû-kûn ê só͘-chāi, khan chı̍t chiah chíⁿ koh hó ê gû-á lâi; kau hō͘ lô͘-po̍k, i chiū kóaⁿ-kín khì pī-pān.

8

A-pek-la̍h-hán koh the̍h lin-iû kap lin, kap só͘ pī-pān ê gû-á lâi, pâi tī in ê bīn-chêng; ka-kī tī chhiū-kha khiā tī in ê sin-piⁿ; in chiū chia̍h.

9

In kā i kóng, Lí ê bó͘ Sat-la̍h tī tah-lo̍h? I kóng, Tī pò͘-pîⁿ-lāi.

10

In tiong-kan chı̍t-ê kóng, Kàu-kî Góa tek-khak beh koh lâi lí chia; lí ê bó͘ Sat-la̍h beh siⁿ chı̍t ê kiáⁿ. Sat-la̍h tī āu-bīn, pò͘-pîⁿ mn̂g-kháu, teh thiaⁿ.

11

A-pek-la̍h-hán kap Sat-la̍h nî-hè í-keng lāu; Sat-la̍h ê ge̍h-keng í-keng cho̍at.

12

Sat-la̍h sim-lāi chhiò kóng, Góa í-keng soe-lám, góa ê chú ia̍h lāu-lah; kiám iáu ū chit-hō ê hoaⁿ-hí?

13

Iâ-hô-hoa tùi A-pek-la̍h-hán kóng, Sat-la̍h ūi siáⁿ-sū chhiò, kóng, Góa í-keng lāu, kó-chin ōe siⁿ-kiáⁿ mah?

14

Kiám Iâ-hô-hoa ū chòe-bōe-lâi ê sū mah? Kàu-kî, mê-nî chit-sî, Góa beh koh lâi lí chia, Sat-la̍h beh siⁿ chı̍t ê kiáⁿ.

15

Sat-la̍h kiaⁿ, m̄-jīn, kóng, Góa bô chhiò. Hit-lâng kóng, Bô-iáⁿ; lí sı̍t-chāi ū chhiò.

16

Hiah ê lâng chiū tùi hia khí-lâi, ǹg Só͘-to-má khì; A-pek-la̍h-hán iā kap in saⁿ-kap kiâⁿ, beh sàng in chı̍t-chām.

17

Iâ-hô-hoa kóng, Góa só͘ beh chòe ê sū, kiám thang tùi A-pek-la̍h-hán ún-khǹg mah?

18

In-ūi A-pek-la̍h-hán tek-khak beh chiâⁿ-chòe kiông-tōa ê kok, tōe-chiūⁿ bān-kok beh in-ūi i lâi tit-tio̍h hok-khì.

19

Góa bat i, sī beh hō͘ i bēng-lēng i ê kiáⁿ kap i ê ke-kòan; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê ōe, lóng kui hō͘ i.

20

Iâ-hô-hoa kóng, Só͘-to-má, Gô-mô͘-la̍h hoah-hiàm ê siaⁿ chin-tōa, in ê chōe-ok sı̍t-chāi tāng.

21

Góa taⁿ beh lo̍h-khì, khòaⁿ in só͘ kiâⁿ-ê, kó-jiân it-chīn chiàu Góa só͘ thiaⁿ ê siaⁿ á bô; nā bô án-ni, Góa ia̍h ōe chai.

22

Hiah ê lâng tùi-hia o̍at-tńg-sin, ǹg Só͘-to-má khì; A-pek-la̍h-hán iáu khiā tī Iâ-hô-hoa ê bīn-chêng.

23

A-pek-la̍h-hán kūn-chêng lâi kóng, Hó-lâng kap pháiⁿ-lâng, Lí lóng beh châu-bia̍t mah?

24

Siat-sú siâⁿ-lāi ū gō͘-cha̍p ê hó-lâng, Lí iû-gôan beh châu-bia̍t hit só͘-chāi mah? bô-beh ūi-tio̍h siâⁿ-lāi chí gō͘-cha̍p ê hó-lâng, lâi sià-bián in mah?

25

Gōan Lí koat-tòan bô án-ni kiâⁿ, chiong hó-lâng kap pháiⁿ-lâng chòe-chı̍t-ē hāi-sí; tì-kàu hó-lâng kap pháiⁿ-lâng saⁿ-tâng; gōan Lí koat-tòan bô án-ni kiâⁿ; sím-phòaⁿ chôan-tōe ê Chú kiám bô kiâⁿ kong-gī mah?

26

Iâ-hô-hoa kóng, Góa nā tī Só͘-to-má siâⁿ-lāi tú-tio̍h ū gō͘-cha̍p ê hó-lâng, Góa chiū ūi-tio̍h in ê iân-kò͘ khoan-iông hit só͘-chāi.

27

A-pek-la̍h-hán ìn kóng, Góa sui-jiân sī hé-hu thô͘-hún, iáu-kú káⁿ tùi Chú kóng-ōe;

28

siat-sú chiah ê gō͘-cha̍p ê hó-lâng khiàm gō͘-ê; Lí chiū in-ūi khiàm gō͘-ê, châu-bia̍t chôan-siâⁿ mah? I kóng, Góa tī-hia nā tú-tio̍h ū sì-cha̍p-gō͘ ê, ia̍h bô beh châu-bia̍t.

29

A-pek-la̍h-hán koh tùi I kóng, Siat-sú tī-hia tú-tio̍h sì-cha̍p-ê nih? I kóng, Ūi-tio̍h chiah ê sì-cha̍p-ê ê iân-kò͘, Góa ia̍h bô beh chòe chit ê sū.

30

I koh kóng, Kiû Chú bo̍h-tit siū-khì, góa beh koh kóng; siat-sú tī-hia nā tú-tio̍h saⁿ-cha̍p-ê nih? I kóng, Góa tī-hia nā tú-tio̍h ū saⁿ-cha̍p-ê, Góa ia̍h bô beh chòe chit ê sū.

31

I kóng, Góa iáu-kú káⁿ tùi Chú kóng; siat-sú tī-hia tú-tio̍h ū jī-cha̍p-ê nih? I kóng, Ūi-tio̍h chiah ê jī-cha̍p-ê ê iân-kò͘, Góa ia̍h bô beh châu-bia̍t.

32

I kóng, Kiû Chú bo̍h-tit siū-khì, góa koh kóng chit chı̍t-pái; siat-sú tī-hia tú-tio̍h ū cha̍p-ê nih? I kóng, Ūi-tio̍h chiah ê cha̍p-ê ê iân-kò͘, Góa ia̍h bô beh châu-bia̍t.

33

Iâ-hô-hoa kap A-pek-la̍h-hán kóng bêng-pe̍k, chiū chiūⁿ-khì. A-pek-la̍h-hán ia̍h tò-khì i ê só͘-chāi.