Chhòng-sè-kì 第 19 章 - 巴克禮全羅

1

Jı̍t-àm, hit nn̄g ê sù-chiá kàu Só͘-to-má; Lô-tek chē tī Só͘-to-má siâⁿ-mn̂g-nı̍h; Lô-tek khòaⁿ-kìⁿ in, chiū khí-lâi ngiâ-chih in; kiok-kiong bīn ǹg tōe,

2

kóng, Góa ê chú ah, chhiáⁿ oat lâi lô͘-po̍k ê chhù hioh-mî, sóe-kha; bîn-á-chá-khí khí-lâi, kiâⁿ lín ê lō͘. In kóng, M̄-bián; góan beh tī tōa koe-bīn kè-mî.

3

Lô-tek chhiat-chhiat chhiáⁿ in; in chiah o̍at-tńg-kha, oat-jı̍p i ê chhù; Lô-tek ūi in pī-pān iân-sia̍h, pek bû-kàⁿ-piáⁿ; in chiū chia̍h.

4

In iáu-bē khì khùn, siâⁿ-lāi ê lâng, chiū-sī Só͘-to-má lâng, tùi siàu-liân kàu lāu, sì-bīn lâi ûi i ê chhù;

5

kiò Lô-tek kóng, Kin-àm kàu lí chia ê lâng tī tah-lo̍h? hō͘ in chhut-lâi, chiàu góan só͘ ài chòe.

6

Lô-tek chhut-khì kàu mn̂g-gōa, chèng-lâng hia, chiū chiong mn̂g koaiⁿ-teh;

7

kóng, Hiaⁿ-tī ah, chhiáⁿ lín bo̍h-tit chòe chit-hō pháiⁿ;

8

lí khòaⁿ, góa ū nn̄g ê cha-bó͘-kiáⁿ, iáu sī chāi-sek-lú; iông-ún góa chhōa-chhut-lâi, chhut-chāi lín só͘ ài lâi kiâⁿ; to̍k-to̍k chit nn̄g-lâng, í-keng kàu góa ê chhù, m̄-thang tùi in chòe sím-mı̍h.

9

Chèng-lâng kóng, Lí thè-khì. Koh kóng, Chit-lâng kià-ku tī-chia, sòa beh kóan-hat góan mah? taⁿ góan beh hāi lí pí hāi in khah siong-tiōng. Chiū oe-khoeh Lô-tek, chìn-chêng beh kong-phòa i ê mn̂g.

10

Chóng-sī hit nn̄g-lâng chhun-chhiú, khan Lô-tek jı̍p chhù, chiong mn̂g koaiⁿ-khì.

11

Koh hō͘ mn̂g-gōa ê lâng, tùi sòe kàu tōa, ba̍k-chiu ian-n̄g, lóng bōe khòaⁿ-kìⁿ; chhē kàu siān chhē bô mn̂g.

12

Hit nn̄g-lâng tùi Lô-tek kóng, Lí tī-chia iáu ū sím-mı̍h lâng? he̍k-sī kiáⁿ-sài, he̍k-sī kiáⁿ, he̍k-sī cha-bó͘-kiáⁿ, í-kı̍p siâⁿ-lāi it-chhè sio̍k lí ê lâng; lí tio̍h hō͘ in lóng chhut chit só͘-chāi.

13

In-ūi góan beh châu-bia̍t chit ê só͘-chāi, sī ūi-tio̍h in hoah-hiàm ê siaⁿ tī Iâ-hô-hoa ê bīn-chêng chin-tōa; Iâ-hô-hoa chhe góan lâi beh châu-bia̍t-i.

14

Lô-tek chhut-khì, tùi chhōa i ê cha-bó͘-kiáⁿ ê kiáⁿ-sài kóng, Lín khí-lâi, lī-khui chia; in-ūi Iâ-hô-hoa beh bia̍t-bô chit ê siâⁿ; i ê kiáⁿ-sài lia̍h-chòe i sī kóng-chhiò.

15

Thiⁿ-kng sù-chiá chhui-pek Lô-tek kóng, Khí-lâi, chhōa lí ê bó͘, í-kı̍p lí tī-chia nn̄g ê cha-bó͘-kiáⁿ khì; kiaⁿ-liáu kap chit ê siâⁿ ê chōe-ok saⁿ-kap siū bia̍t-bô.

16

Lô-tek iân-chhiân; hit nn̄g-lâng, in-ūi Iâ-hô-hoa lîn-bín Lô-tek, chiū khan i ê chhiú, kap i ê bó͘ ê chhiú, kap i nn̄g ê cha-bó͘-kiáⁿ ê chhiú, chiong i chhōa-chhut, an-tì tī siâⁿ-gōa.

17

Chhōa in chhut-khì liáu, kóng, Lí tio̍h tô-miā, m̄-thang o̍at-thâu khòaⁿ, ia̍h m̄-thang tòa tī Pîⁿ-iûⁿ; tio̍h cháu-khì soaⁿ-nı̍h, kiaⁿ-liáu siū bia̍t-bô.

18

Lô-tek tùi in kóng, Góa ê chú ah, m̄-thang án-ni.

19

Lí khòaⁿ, lí ê lô͘-po̍k í-keng tit-tio̍h un-tián tī lí ê bīn-chêng, lí ia̍h tùi góa hián-chhut ke̍k-tōa ê jîn-chû, kiù góa ê sìⁿ-miā; góa bōe-ōe cháu kàu soaⁿ-nı̍h, kiaⁿ-liáu chit ê chai-ē kàu tī góa, góa chiū sí.

20

Lí khòaⁿ, chit ê siâⁿ kūn-kūn thang tô-cháu, ia̍h sī sòe; chhiáⁿ iông-ún góa tô-siám tī-hia, lâi pó-chôan góa ê o̍ah-miā; chit ê siâⁿ kiám m̄-sī sòe-ê mah?

21

I tùi i kóng, Chit ê tāi-chì, góa ia̍h ún-chún lí; lí só͘ kóng ê siâⁿ, góa bô beh chhia-tó.

22

Lí tio̍h kín-kín cháu-khì hia; in-ūi lí iáu-bē kàu hia, góa bōe-ōe chòe sím-mı̍h. In-ūi án-ni hit ê siâⁿ miâ-kiò Só-jíⁿ.

23

Lô-tek kàu Só-jíⁿ, jı̍t í-keng chhut.

24

Hit sî Iâ-hô-hoa chiong jiû-n̂g kap hé, tùi thiⁿ-téng, tùi Iâ-hô-hoa hia, kàng-lo̍h tī Só͘-to-má kap Gô-mô͘-la̍h.

25

Chiong hiah ê siâⁿ, í-kı̍p chôan pîⁿ-iûⁿ, kap siâⁿ-lāi só͘-ū ê peh-sìⁿ, liân tōe-bīn-chiūⁿ seng-tióng-ê, lóng húi-hōai.

26

Lô-tek ê bó͘ tī āu-bīn, chı̍t-ē o̍at-thâu khòaⁿ, chiū pìⁿ-chòe chı̍t ki iâm-thiāu.

27

A-pek-la̍h-hán thàu-chá khí-lâi, kàu i chêng-jı̍t khiā tī Iâ-hô-hoa bīn-chêng hit-ūi;

28

ǹg Só͘-to-má Gô-mô͘-la̍h, kap Pîⁿ-iûⁿ ê chôan-tōe lâi khòaⁿ; khòaⁿ-kìⁿ hit só͘-chāi hé-ian chhèng-kôaiⁿ, chhin-chhiūⁿ hé-lô͘ ê ian.

29

Tng Siōng-tè châu-bia̍t Pîⁿ-iûⁿ chiah ê siâⁿ ê sî, Siōng-tè siàu-liām A-pek-la̍h-hán; tú-tú tī chhia-tó Lô-tek só͘ khiā-khí ê siâⁿ ê sî, chiū kah Lô-tek tùi chhia-tó ê tiong-kan chhut-khì.

30

Lô-tek tiàm tī Só-jíⁿ kiaⁿ-hiâⁿ; chiū kap i nn̄g ê cha-bó͘-kiáⁿ tùi Só-jíⁿ chiūⁿ-khì tiàm tī soaⁿ-nı̍h; i kap nn̄g ê cha-bó͘-kiáⁿ tiàm tī chı̍t ê tōng-lāi.

31

Tōa cha-bó͘-kiáⁿ tùi sòe cha-bó͘-kiáⁿ kóng, Lán ê lāu-pē lāu-lah, tōe-chiūⁿ koh bô lâng kap lán chòe phit-phòe, lâi chiàu jîn-tō.

32

Lâi-lah, thang hō͘ lāu-pē lim chiú, kap i saⁿ-kap khùn; án-ni lán hó thang tùi i liû-chûn hō͘-è.

33

Hit-mî in hō͘ lāu-pē lim chiú; tōa cha-bó͘-kiáⁿ chiū jı̍p-khì kap lāu-pē saⁿ-kap khùn; i sím-mı̍h sî khì khùn, sím-mı̍h sî khí-lâi, lāu-pē lóng m̄-chai.

34

Kè-jı̍t tōa cha-bó͘-kiáⁿ kā sòe cha-bó͘-kiáⁿ kóng, Góa chā-mî kap lāu-pē saⁿ-kap khùn; kin-àm lán koh hō͘ i lim chiú, lí thang jı̍p-khì kap i saⁿ-kap khùn. Án-ni, lán hó thang tùi lāu-pē liû-chûn hō͘-è.

35

Hit-mî in koh hō͘ lāu-pē lim chiú, sòe cha-bó͘-kiáⁿ khí-lâi khì kap i khùn; i sím-mı̍h sî khì khùn, sím-mı̍h sî khí-lâi, lāu-pē ia̍h lóng m̄-chai.

36

Án-ni Lô-tek nn̄g ê cha-bó͘-kiáⁿ lóng tùi in lāu-pē lâi hôai-īn.

37

Tōa-ê siⁿ kiáⁿ, kiò i ê miâ Mô͘-ap, chiū-sī hiān-kim Mô͘-ap lâng ê chó͘.

38

Sòe-ê ia̍h siⁿ-kiáⁿ, kiò i ê miâ Piān-á-bí, chiū-sī hiān-kim A-bûn lâng ê chó͘.