Chhòng-sè-kì 第 29 章 - 巴克禮全羅

1

Ngá-kok khí-sin, kàu tang-hng ê lâng ê tōe;

2

khòaⁿ-kìⁿ chhân-nı̍h ū chı̍t kháu chíⁿ, ū saⁿ tīn iûⁿ tó tī chíⁿ-piⁿ, in-ūi lâng hō͘ iûⁿ-kûn lim, lóng sī ēng hit ê chíⁿ ê chúi; chíⁿ-chhùi ēng tōa chio̍h khàm.

3

Pêng-sî iûⁿ-kûn chū-chı̍p tī-hia, lâng chiū chiong chio̍h-thâu sóa lī chíⁿ-chhùi, hō͘ iûⁿ lim chúi; chiah koh chiong chio̍h-thâu sóa kàu gôan-ūi.

4

Ngá-kok tùi in kóng, Hiaⁿ-tī ah, tùi tah-lo̍h lâi? in kóng, Góan tùi Hap-lân lâi.

5

Mn̄g in kóng, Ná-ho̍k ê sun Lāh-pan, lín bat i mah?

6

kóng, Bat-i. Koh tùi in kóng, I pêng-an mah? kóng, Pêng-an. Lí khòaⁿ, i ê cha-bó͘-kiáⁿ La̍h-kiat chhōa i ê iûⁿ-kûn teh lâi.

7

Kóng, Jı̍t iáu kôaiⁿ, cheng-siⁿ chū-chı̍p ê sî bē kàu, m̄-ta̍t-tio̍h hō͘ iûⁿ lim chúi, koh khì chhī.

8

In kóng, Góan bōe-ōe, tio̍h thèng-hāu chōe-chōe tīn lóng chū-chı̍p, lâng sóa chio̍h lī-khui chíⁿ-chhùi, chiah thang hō͘ iûⁿ lim.

9

Ngá-kok teh kap in kóng-ōe ê sî, La̍h-kiat chhōa in lāu-pē ê iûⁿ lâi; in-ūi sī i teh kò͘.

10

Ngá-kok khòaⁿ-kìⁿ bú-kū La̍h-pan ê cha-bó͘-kiáⁿ La̍h-kiat, kap bú-kū La̍h-pan ê iûⁿ-kûn, chiū chìn-chêng chiong chio̍h sóa lī chíⁿ-chhùi, hō͘ in bú-kū La̍h-pan ê iûⁿ-kûn lim.

11

Ngá-kok kā La̍h-kiat chim-chhùi, khui-siaⁿ khàu.

12

Ngá-kok koh kā La̍h-kiat kóng i sī in lāu-pē ê gōe-seng, sī Lī-pek-ka ê kiáⁿ; La̍h-kiat chiū cháu-khì kā in lāu-pē kóng.

13

La̍h-pan thiaⁿ-kìⁿ gōe-seng Ngá-kok ê siau-sit, chiū cháu-khì ngiâ-chih-i, phō-i, kap i chim-chhùi; chhōa i kàu in tau; Ngá-kok chiong it-chhè ê sū-chêng kā La̍h-pan kóng.

14

La̍h-pan kā Ngá-kok kóng, Lí sı̍t-chāi sī góa ê kut-jio̍k. I chiū kap i tòa chı̍t-ge̍h-jı̍t.

15

La̍h-pan kā Ngá-kok kóng, Lí sui-jiân sī góa ê chhin-chhek, kiám thang pe̍h-pe̍h chòe góa ê kang; chhiáⁿ kā góa kóng, lí beh sím-mı̍h kang-chîⁿ.

16

La̍h-pan ū nn̄g ê cha-bó͘-kiáⁿ, tōa-ê miâ-kiò Lī-a, sòe-ê miâ-kiò La̍h-kiat.

17

Lī-a ba̍k-chiu khah-su, La̍h-kiat siⁿ-chòe hó-khòaⁿ.

18

Ngá-kok thiàⁿ La̍h-kiat, chiū kóng, Góa gōan ūi-tio̍h lí sòe ê cha-bó͘-kiáⁿ La̍h-kiat, kā lí chòe-kang chhit-nî.

19

La̍h-pan kóng, Chiong i kè hō͘ lí, khah-hó hō͘ pa̍t-lâng; lí kap góa tòa.

20

Ngá-kok chiū ūi-tio̍h La̍h-kiat kā i chòe kang chhit-nî; in-ūi chhim-thiàⁿ i, khòaⁿ-chòe kúi-nā jı̍t.

21

Ngá-kok tùi La̍h-pan kóng, Jı̍t-kî í-keng móa, kiû lí chiong góa ê bó͘ hō͘ góa, góa thang kap i tâng-pâng.

22

La̍h-pan chū-chı̍p hit só͘-chāi ê chèng-lâng, pān iân-sia̍h chhiáⁿ in.

23

Kàu jı̍t àm, La̍h-pan chiong i ê cha-bó͘-kiáⁿ Lī-a, sàng lâi hō͘ i; Ngá-kok chiū kap i tâng-pâng.

24

La̍h-pan chiong i ê lú-pī Sek-phàⁿ hō͘ i ê cha-bó͘-kiáⁿ Lī-a chòe lú-pī.

25

Kàu thiⁿ-kng, chı̍t-ē khòaⁿ-kìⁿ sī Lī-a, chiū tùi La̍h-pan kóng, Lí kā góa chòe-ê, sī sím-mı̍h? Góa kā lí chòe-kang, kiám-m̄-sī ūi-tio̍h La̍h-kiat mah? lí siáⁿ-sū phiàn góa?

26

La̍h-pan kóng, Bē kè tōa-ê tāi-seng kè sòe-ê, tī góan chia bô lâng án-ni chòe.

27

Lí kap chit-ê tio̍h móa chhit-jı̍t; góan chiū chiong hit-ê ia̍h kè hō͘ lí; lí ūi-tio̍h i koh kā góa chòe kang chhit-nî.

28

Ngá-kok chiū chiàu án-ni kiâⁿ; kap chit-ê móa chhit-jı̍t; i chiū chiong i ê cha-bó͘-kiáⁿ, La̍h-kiat, hō͘ i chòe-bó͘.

29

La̍h-pan chiong i ê lú-pī Phek-la̍h, hō͘ i ê cha-bó͘-kiáⁿ La̍h-kiat chòe lú-pī.

30

Ngá-kok ia̍h kap La̍h-kiat tâng-pâng, koh thiàⁿ La̍h-kiat iâⁿ-kè Lī-a; chiū koh kā La̍h-pan chòe-kang chhit-nî.

31

Iâ-hô-hoa khòaⁿ Lī-a bô tek-thióng, chiū hō͘ i hôai-īn; to̍k-to̍k La̍h-kiat bô.

32

Lī-a hôai-īn siⁿ-kiáⁿ, chiū kā i hō-miâ Liû-piān; in-ūi kóng, Iâ-hô-hoa khòaⁿ-kìⁿ góa ê khó͘-chêng; taⁿ góa ê tiōng-hu beh thiàⁿ góa.

33

I koh hôai-īn siⁿ kiáⁿ; kóng, Iâ-hô-hoa thiaⁿ-kìⁿ góa bô tek-thióng, só͘-í koh hō͘ góa chit ê kiáⁿ; chiū kā i hō-miâ Se-biān.

34

Koh hôai-īn siⁿ kiáⁿ, kóng, Góa kā tiōng-hu siⁿ saⁿ ê kiáⁿ, i beh kap góa kiat-liân; miâ kiò Lī-bī.

35

Koh hôai-īn siⁿ kiáⁿ; kóng, Chit-ē góa beh o-ló Iâ-hô-hoa; só͘-í kiò i ê miâ Iû-tāi; chiū thêng bô koh siⁿ.