Chhòng-sè-kì 第 30 章 - 巴克禮全羅

1

La̍h-kiat khòaⁿ pún-sin bô kā Ngá-kok siⁿ kiáⁿ, chiū òan-tò͘ i ê tōa-chí; tùi Ngá-kok kóng, Lí tio̍h kiáⁿ hō͘ góa; nā bô, góa beh sí.

2

Ngá-kok siū-khì La̍h-kiat; kóng, Hō͘ lí bô siⁿ-ê, sī Siōng-tè; góa kiám sī thòe I mah?

3

La̍h-kiat kóng, Lí khòaⁿ góa ê lú-pī Phek-la̍h tī-chia; lí khì kap i tâng-pâng, hō͘ i siⁿ kiáⁿ phō tī góa ê kha-thâu-u; góa iā chiū thang tùi i tit-tio̍h kiáⁿ.

4

La̍h-kiat chiū chiong i ê lú-pī Phek-la̍h hō͘ i chòe-bó͘; Ngá-kok chiū kap i tâng-pâng.

5

Phek-la̍h hôai-īn, kā Ngá-kok siⁿ chı̍t ê kiáⁿ.

6

La̍h-kiat kóng, Siōng-tè kā góa phòaⁿ-tòan, ia̍h thiaⁿ góa ê siaⁿ, hō͘ góa ū kiáⁿ; só͘-í kiò i ê miâ chòe Tàn.

7

La̍h-kiat ê lú-pī Phek-la̍h koh hôai-īn, kā Ngá-kok siⁿ tē-jī ê kiáⁿ;

8

La̍h-kiat kóng, Góa kap góa ê tōa-chí hui-siông ê saⁿ-chiⁿ, ia̍h tit-tio̍h khah-iâⁿ; chiū kiò i ê miâ chòe Ná-hut-tha-lī.

9

Lī-a khòaⁿ pún-sin thêng-hioh bô siⁿ, chiū chiong i ê lú-pī, Sek-phàⁿ, hō͘ Ngá-kok chòe bó͘.

10

Lī-a ê lú-pī Sek-phàⁿ kā Ngá-kok siⁿ kiáⁿ.

11

Lī-a kóng, Kai-chài! chiū kiò i ê miâ chòe Ka-tek.

12

Lī-a ê lú-pī, Sek-phàⁿ, koh kā Ngá-kok siⁿ tē-jī ê kiáⁿ.

13

Lī-a kóng, Góa ū hok-khì! chiah ê cha-bó͘-gín-á lóng beh chheng góa ū hok-khì; chiū kiò i ê miâ chòe A-siat.

14

Koah-be̍h ê sî, Liû-piān khì chhân-nı̍h, tit-tio̍h hong-ka, the̍h-lâi hō͘ i ê lāu-bú Lī-a. La̍h-kiat tùi Lī-a kóng, Chhiáⁿ chiong lí ê kiáⁿ ê hong-ka hō͘ góa.

15

Lī-a tùi i kóng, Lí chhiúⁿ-to̍at góa ê tiōng-hu, kiám-sī sió-khóa sū; lí koh chhiúⁿ-to̍at góa ê kiáⁿ ê hong-ka mah? La̍h-kiat kóng, Ūi-tio̍h lí ê kiáⁿ ê hong-ka, só͘-í kin-mî i thang kap lí saⁿ-kap khùn.

16

Kàu àm, Ngá-kok tùi chhân-nı̍h tò-lâi; Lī-a chhut-khì ngiâ-chih i, kóng, Lí tio̍h kap góa saⁿ-kap khùn; in-ūi góa sı̍t-chāi ēng góa ê kiáⁿ ê hong-ka chhiàⁿ lí. Hit-mî i chiū kap i saⁿ-kap khùn.

17

Siōng-tè ún-chún Lī-a, i chiū hôai-īn, kā Ngá-kok siⁿ tē-gō͘ ê kiáⁿ.

18

Lī-a kóng, Siōng-tè hō͘ góa kang-chîⁿ, in-ūi góa chiong lú-pī hō͘ góa ê tiōng-hu; tùi án-ni kā i hō-miâ Í-sat-ka.

19

Lī-a koh hôai-īn, kā Ngá-kok siⁿ tē-la̍k ê kiáⁿ.

20

Lī-a kóng, Siōng-tè siúⁿ-sù góa hó ê siúⁿ-sù; góa ê tiōng-hu beh kap góa tòa, in-ūi góa kā i siⁿ la̍k ê kiáⁿ; tùi án-ni kā i hō-miâ Se-pò͘-lûn.

21

Āu-lâi siⁿ chı̍t ê cha-bó͘-kiáⁿ, kā i hō-miâ kiò Tí-ná.

22

Siōng-tè siàu-liām La̍h-kiat, Siōng-tè ún-chún i, hō͘ i ōe siⁿ kiáⁿ.

23

I chiū hôai-īn siⁿ kiáⁿ; kóng, Siōng-tè tû-khì góa ê kiàn-siàu;

24

chiū kā i hō-miâ Iok-sek, kóng, Gōan Iâ-hô-hoa koh ke-thiⁿ góa chı̍t ê kiáⁿ.

25

La̍h-kiat siⁿ Iok-sek liáu-āu, Ngá-kok tùi La̍h-pan kóng, Chhiáⁿ chhe góa khì, hō͘ góa tò-khì góa ê pún só͘-chāi, pún-tōe;

26

chhiáⁿ lí chiong góa ho̍k-sāi lí só͘ tit-tio̍h ê bó͘-kiáⁿ hō͘ góa, iông-ún góa khì; góa cháiⁿ-iūⁿ ho̍k-sāi lí, lí lóng chai.

27

La̍h-pan kā i kóng, Góa nā tī lí ê bīn-chêng tit-tio̍h un-tián, chhiáⁿ lí kap góa tòa; in-ūi góa chhim-chai Iâ-hô-hoa sù góa hok-khì, sī ūi-tio̍h lí ê iân-kò͘.

28

Koh kā i kóng, Chhiáⁿ lí tiāⁿ-tio̍h lí ê kang-chîⁿ, góa chiū hō͘ lí.

29

Ngá-kok kā i kóng, Góa ho̍k-sāi lí cháiⁿ-iūⁿ, lí ê cheng-siⁿ tī góa ê chhiú-thâu cháiⁿ-iūⁿ, sī lí só͘ chai.

30

Góa bē lâi ê tāi-seng, lí só͘-ū-ê chin-chió, taⁿ chiū tōa hoat-ta̍t; Iâ-hô-hoa ēng hok-khì tè góa ê kha lâi hō͘ lí; taⁿ góa beh sím-mı̍h sî ūi góa ê ke kiàn-tì sán-gia̍p?

31

La̍h-pan kóng, Góa tio̍h hō͘ lí sím-mı̍h? Ngá-kok kóng, Lí ia̍h m̄-bián hō͘ góa sím-mı̍h; ū chı̍t-hāng sū, lí nā èng-sêng, chiū góa iû-gôan chhī lí ê iûⁿ-kûn lâi kò͘-siú.

32

Kin-á-jı̍t góa beh piàn-sûn lí ê iûⁿ-kûn, chiong mî-iûⁿ-tiong kìⁿ-ū tiám-ê, ū pan-ê, kap o͘-sek-ê, í-kı̍p soaⁿ-iûⁿ-tiong kìⁿ-ū pan-ê, ū tiám-ê, lóng poah-chhut; chiong-lâi chit-khóan-ê chòe góa ê kang-chîⁿ.

33

Í-āu lí lâi khòaⁿ góa ê kang-chîⁿ, hit tiong-kan nā soaⁿ-iûⁿ bô tiám bô pan-ê, mî-iûⁿ bô o͘-sek-ê, chiū sǹg sī góa thau-ê; ēng án-ni lâi chèng-bêng góa ê kong-tō.

34

La̍h-pan kóng, Hó, góa gōan chiàu lí ê ōe kiâⁿ.

35

Tng hit-jı̍t, chiū chiong ū hûn ū pan ê soaⁿ-iûⁿ-káng, ū tiám ū pan, kàiⁿ pe̍h ê soaⁿ-iûⁿ-bú, í-kı̍p o͘-sek ê mî-iûⁿ, lóng poah-chhut lâi kau hō͘ i hiah ê kiáⁿ.

36

I hō͘ ka-kī kap Ngá-kok saⁿ-lī ū saⁿ-jı̍t ê lō͘-chām; Ngá-kok chiū kò͘ La̍h-pan kî-û ê iûⁿ.

37

Ngá-kok the̍h chhiⁿ ê iông-chhiū, hēng-chhiū, png-chhiū, nńg ê ki, chiong phê pak chiâⁿ pe̍h-hûn, hō͘ ki-lāi pe̍h-ê lō͘-chhut.

38

Chiong pak-phê ê ki, chhah tī iûⁿ lim-chúi ê chúi-kau kap chúi-chô, hō͘ i kap iûⁿ saⁿ-tùi; iûⁿ lâi lim ê sî, kang-bú kau-ha̍p;

39

iûⁿ tī ki ê tùi-bīn kau-ha̍p, chiū siⁿ ū-hûn-ê, ū-tiám-ê, ū-pan-ê.

40

Ngá-kok chiong iûⁿ-á poah-chhut, hō͘ La̍h-pan ê iûⁿ kap chiah ê ū-hûn kap o͘-sek ê iûⁿ saⁿ-tùi; chiong ka-kī ê iûⁿ lēng-gōa pàng tī chı̍t só͘-chāi, bô hō͘ i kap La̍h-pan ê iûⁿ chham-chhap.

41

Tú-tio̍h iûⁿ-kûn-tiong ióng-chòng-ê kau-ha̍p ê sî, Ngá-kok chiū ēng chhiū-ki chhah tī chúi-kau-lāi; hō͘ iûⁿ tī chhiū-ki ê tùi-bīn kau-ha̍p.

42

Tú-tio̍h iûⁿ-kûn ê sán-ê, chiū bô chhah chhiū-ki; tùi án-ni sán-ê kui La̍h-pan, ióng-chòng-ê kui Ngá-kok.

43

Tùi án-ni i tōa hoat-ta̍t, tit-tio̍h chōe-chōe iûⁿ-kûn, lú-pī, lô͘-po̍k, lo̍k-tô, kap lû.