Chhòng-sè-kì 第 39 章 - 巴克禮全羅

1

Iok-sek hō͘ lâng tòa lo̍h-khì Ai-kı̍p; ū chı̍t ê Ai-kı̍p lâng, sī Hoat-ló ê jîn-sîn sī-ōe-tiúⁿ Pho-thê-hoat, tùi hiah-ê tòa i lâi ê Í-sı̍t-má-lī lâng ê chhiú bóe-khì.

2

Iâ-hô-hoa kap i saⁿ-kap tī-teh, hō͘ i ta̍k-hāng heng-thong; tòa tī i ê chú-lâng Ai-kı̍p lâng ê ke.

3

I ê chú-lâng khòaⁿ-kìⁿ Iâ-hô-hoa kap i saⁿ-kap tī-teh; koh Iâ-hô-hoa hō͘ i ê chhiú só͘ chòe-ê lóng heng-thong.

4

Iok-sek chiū tī chú-lâng ê bīn-chêng tit-tio̍h un-tián, lâi ho̍k-sāi i; chú-lâng siat-lı̍p i kóan-lí i ê ke, chiong it-chhè só͘-ū-ê kau i ê chhiú.

5

Tùi chú-lâng siat-lı̍p i kóan-lí ke-sū, kap i it-chhè só͘-ū-ê, Iâ-hô-hoa ūi-tio̍h Iok-sek ê iân-kò͘, sù-hok tī hit ê Ai-kı̍p lâng ê ke; kìⁿ-nā ke-lāi kap chhân-nı̍h it-chhè só͘-ū-ê, lóng tit-tio̍h Iâ-hô-hoa sù-hok.

6

I chiong it-chhè só͘-ū-ê, lóng kau Iok-sek ê chhiú; tû-khì i só͘ chia̍h ê mı̍h í-gōa, pa̍t-hāng só͘-ū-ê, lóng m̄-chai. Iok-sek súi koh hó-siⁿ-chòe.

7

Chiah ê tāi-chì í-āu, Iok-sek ê chú-bú chù-sîn khòaⁿ-i, kóng, Lâi kap góa khùn.

8

Iok-sek m̄-thàn, tùi i ê chú-bú kóng, Lí khòaⁿ, ke-lāi ū sím-mı̍h tī góa ê chhiú, góa ê chú-lâng lóng m̄-chai; i í-keng chiong só͘-ū-ê kau tī góa ê chhiú; tī chí ke-lāi bô chı̍t-ê pí góa khah-tōa;

9

lí í-gōa, i bô chı̍t-hāng bô kau góa, in-ūi lí sī i ê bó͘; góa cháiⁿ-iūⁿ thang kiâⁿ chit ê tōa-pháiⁿ, lâi tek-chōe Siōng-tè?

10

Āu-lâi i ta̍k-jı̍t kap Iok-sek kóng-ōe; Iok-sek bô thiaⁿ i ê ōe; bô kap i khùn, ia̍h bô kap i chòe-tui.

11

Ū chı̍t-jı̍t, Iok-sek jı̍p chhù pān i ê tāi-chì; ke-lāi ê lâng bô chı̍t-ê tī chhù-lāi.

12

Hū-jîn-lâng chiū khiú i ê saⁿ kóng, Lí lâi kap góa khùn; Iok-sek chiong saⁿ pàng tī i ê chhiú, cháu chhut-khì gōa-bīn.

13

Hū-jîn-lâng khòaⁿ-kìⁿ Iok-sek chiong saⁿ pàng tī i chhiú-nı̍h, koh cháu-chhut gōa-bīn;

14

chiū kiò ke-lāi ê lâng lâi, tùi in kóng, Lín khòaⁿ-teh, i tòa chı̍t ê Hi-pek-lâi lâng jı̍p-lâi lán ê ke beh hì-lāng lán; i lâi góa chia, beh kap góa khùn, góa chiū tōa-siaⁿ hoah;

15

i thiaⁿ-kìⁿ góa chhut-siaⁿ hoah, chiū chiong i ê saⁿ pàng tī góa chia, cháu-chhut gōa-bīn.

16

Hū-jîn-lâng chiong Iok-sek ê saⁿ siu tī i hia, thèng-hāu i ê chú-lâng tò-lâi.

17

Chiū tùi i kóng-khí chiah ê sū; kóng, Lí só͘ tòa-lâi lán chia, hit ê Hi-pek-lâi ê lô͘-po̍k, kàu góa chia, beh hì-lāng góa;

18

góa chhut-siaⁿ hoah, i chiong i ê saⁿ pàng tī góa chia, cháu-chhut gōa-bīn.

19

Chú-lâng thiaⁿ-kìⁿ i ê bó͘ tùi i só͘ kóng ê ōe, kóng, Lí ê lô͘-po̍k chhin-chhiūⁿ án-ni khóan-thāi góa, i chiū siū-khì.

20

Iok-sek ê chú-lâng chiong i koaiⁿ-lo̍h kaⁿ, chiū-sī ông ê chōe-hōan siū koaiⁿ ê só͘-chāi; tùi án-ni Iok-sek tī hit ê kaⁿ-lāi.

21

Chóng-sī Iâ-hô-hoa kap Iok-sek tī-teh, si-un hō͘ i; hō͘ i tī kóan-kaⁿ ê lâng ê bīn-chêng tit-tio̍h un-tián.

22

Kóan-kaⁿ-ê chiū chiong kaⁿ-lāi só͘ ū ê hōan-lâng lóng kau Iok-sek ê chhiú; in tī-hia só͘ chòe ê tāi-chì, lóng sī i teh chòe.

23

Kìⁿ-nā Iok-sek chhiú-ē ê tāi-chì, kóan-kaⁿ-ê it-khài bô chhap; in-ūi Iâ-hô-hoa kap Iok-sek tī-teh, koh i só͘ chòe-ê, Iâ-hô-hoa lóng hō͘ i heng-thong.