Chhòng-sè-kì 第 40 章 - 巴克禮全羅

1

Chiah ê tāi-chì í-āu, Ai-kı̍p ông ê chiú-chèng kap tû-pâng tek-chōe in ê chú Ai-kı̍p ông.

2

Hoat-ló siū-khì i nn̄g ê jîn-sîn, chiū-sī chiú-chèng-tiúⁿ kap tû-pâng-tiúⁿ,

3

chiong in koaiⁿ tī sī-ōe-tiúⁿ hú-lāi ê kaⁿ, chiū-sī Iok-sek siū koaiⁿ ê só͘-chāi.

4

Sī -ōe-tiúⁿ chiong in kau-tài Iok-sek, i chiū su-hāu in; in chiū tī kaⁿ-lāi ū hiah-kú.

5

Siū-koaiⁿ tī kaⁿ-ê, Ai-kı̍p ông ê chiú-chèng kap tû-pâng, nn̄g-lâng tâng chı̍t-mî kok bāng-kìⁿ chı̍t ê bāng, lóng chiàu ta̍k ê bāng ê ì-gī lâi bāng.

6

Kàu thiⁿ-kng, Iok-sek jı̍p-khì in hia, khòaⁿ-kìⁿ in ū iu-būn ê khóan-sit.

7

I chiū mn̄g Hoat-ló nn̄g ê jîn-sîn, chiū-sī kap i pîⁿ-pîⁿ koaiⁿ tī chú-lâng hú-lāi-ê, kóng, Kin-á-jı̍t lín siáⁿ-sū bīn tài-iu-iông?

8

In kā i kóng, Góan ta̍k-lâng bāng-kìⁿ chı̍t ê bāng, bô lâng thang ôan. Iok-sek kā in kóng, Ôan-bāng kiám-m̄-sī chāi tī Siōng-tè mah? chhiáⁿ lín kā góa kóng.

9

Chiú-chèng chiū tùi Iok-sek pâi-lia̍t i ê bāng, kóng, Góa bāng-tiong khòaⁿ-kìⁿ ū chı̍t châng phû-tô-chhiū tī góa ê bīn-chêng;

10

chhiū-téng ū saⁿ-ki, chhin-chhiūⁿ ū hoat-gê khui-hoe; i ê pha kiat-chiâⁿ se̍k ê phû-tô.

11

Hoat-ló ê poe tī góa ê chhiú-lāi, góa chiū the̍h phû-tô, nı̍h i tī Hoat-ló ê poe-lāi, chiong poe phâng kau Hoat-ló ê chhiú.

12

Iok-sek kā i kóng, Lí ê bāng sī án-ni ôan; saⁿ-ki chiū-sī saⁿ-jı̍t;

13

koh saⁿ-jı̍t, Hoat-ló beh kú-khí lí ê thâu, ho̍k-tò lí ê koaⁿ-chit; Hoat-ló ê chiú-poe beh iû-gôan hē tī lí ê chhiú, chhin-chhiūⁿ chêng chòe i ê chiú-chèng chı̍t-iūⁿ.

14

Lí nā tek-chì ê sî, tio̍h kì-liām góa, si-un hō͘ góa; tī Hoat-ló ê bīn-chêng thòe góa kóng chı̍t siaⁿ; kiù góa chhut chit ê kaⁿ.

15

Góa sı̍t-chāi sī tùi Hi-pek-lâi lâng ê tōe siū-bōe-lâi-ê; góa tī-chia ia̍h bô chòe-chhut sím-mı̍h, hō͘ in kā góa koaiⁿ-lo̍h kaⁿ.

16

Tû-pâng khòaⁿ-kìⁿ bāng ôan-liáu hó, chiū kā Iok-sek kóng, Góa ia̍h tī góa ê bāng-tiong khòaⁿ, tī góa ê thâu-khak-téng ū saⁿ-kheng pek ê piáⁿ;

17

téng-bīn hit-kheng ū tóe Hoat-ló só͘ chia̍h ta̍k-hō pek ê mı̍h; ū chiáu lâi teh góa thâu-khak-téng kheng-lāi ê mı̍h.

18

Iok-sek ìn i kóng, Lí ê bāng sī án-ni ôan; saⁿ khia kheng sī saⁿ-jı̍t;

19

koh saⁿ-jı̍t, Hoat-ló beh kú-khí lí ê thâu-khak lī-khui lí, tiàu lí tī chhâ-nı̍h; beh ū pe-chiáu lâi teh lí sin-khu ê bah.

20

Kàu tē-saⁿ jı̍t, sī Hoat-ló ê siⁿ-jı̍t, i ūi chèng jîn-sîn pâi-siat iân-sia̍h; tī chiah ê jîn-sîn ê tiong-kan, thâi-kú chiú-chèng kap tû-pâng;

21

hō͘ chiú-chèng-tiúⁿ ho̍k-tò koaⁿ-chit; i iû-gôan phâng-poe tī Hoat-ló ê chhiú;

22

chóng-sī chiong tû-pâng-thâu tiàu-khí-lâi; tú-tú chiàu Iok-sek só͘ kā in ôan-ê.

23

Nā-sī chiú-chèng-tiúⁿ bô liām-tio̍h Iok-sek, kéng-jiân bōe-kì-tit i.