Chhòng-sè-kì 第 41 章 - 巴克禮全羅

1

Kè nn̄g-nî ka-nn̂g, Hoat-ló bîn-bāng; bāng-kìⁿ i khiā tī hô-piⁿ,

2

khòaⁿ-kìⁿ chhit chiah gû-bú tùi hô-nı̍h khí-lâi, súi koh pûi; tī lô͘-tek-á-lāi teh chia̍h.

3

Tè-āu koh ū chhit chiah gû-bú tùi hô-nı̍h khí-lâi, khiap-sì koh sán; kap chêng hiah ê gû tâng-khiā tī hô-piⁿ.

4

Chiah ê khiap-sì koh sán ê gû-bú it-chīn chia̍h hit chhit-chiah súi koh pûi ê gû. Hoat-ló chiū chhíⁿ.

5

I koh khùn, tē-jī pái bîn-bāng; bāng-kìⁿ chı̍t châng be̍h chhut chhit-sūi, phauh koh hó.

6

Āu-lâi khòaⁿ-kìⁿ koh chhut chhit-sūi, phàⁿ-phàⁿ, koh hō͘ tang-hong sàu-pháiⁿ.

7

Chiah ê phàⁿ ê sūi thun hit chhit-sūi phauh koh pá-móa-ê. Hoat-ló chhíⁿ, chiah chai sī bāng-kìⁿ.

8

Kàu thiⁿ-kng, Hoat-ló sim bô pêng-an; chiū chhe lâng tiàu Ai-kı̍p só͘ ū ê su̍t-sū, phok-sū lâi; Hoat-ló chiū chiong i só͘ bāng-kìⁿ-ê kā in kóng; in bô lâng ōe kā Hoat-ló ôan.

9

Hit-sî chiú-chèng-tiúⁿ kā Hoat-ló kóng, Góa kin-á-jı̍t kì-tit góa ê chōe.

10

Chêng Hoat-ló siū-khì jîn-sîn, chiong góa kap tû-pâng-thâu koaiⁿ tī sī-ōe-tiúⁿ hú-lāi ê kaⁿ.

11

Góa kap i, nn̄g-lâng siâng hit-mî ū bāng-kìⁿ, kok chiàu i ê bāng ê ì-gī lâi bāng.

12

Tī-hia, kap góan tī-teh, ū chı̍t ê Hi-pek-lâi ê siàu-liân lâng, sī sī-ōe-tiúⁿ ê lô͘-po̍k, góan kā i kóng, i chiū kā góan ôan góan ê bāng; sī chiàu góan ta̍k-lâng ê bāng lâi ôan.

13

Āu-lāi tú-tú chiàu i só͘ kā góan ôan-ê lâi chiâⁿ; i hō͘ góa ho̍k-chit, hit-lâng siū tiàu lâi sí.

14

Hoat-ló chiū chhe lâng khì tiàu Iok-sek, in chiū kín-kín chhōa i chhut-kaⁿ; i chiū chián-hoat, ōaⁿ i ê saⁿ, lâi kìⁿ Hoat-ló.

15

Hoat-ló kā Iok-sek kóng, Góa bāng-kìⁿ chı̍t ê bāng, bô lâng ōe ôan-i; góa thiaⁿ-kìⁿ lâng kóng kàu lí thiaⁿ-kìⁿ bāng chiū ōe ôan.

16

Iok-sek ìn Hoat-ló kóng, Che m̄-sī chāi-tī góa; Siōng-tè beh chiong pêng-an chí-sī Hoat-ló.

17

Hoat-ló kā Iok-sek kóng, Góa bāng-kìⁿ góa khiā tī hô-piⁿ,

18

ū chhit chiah gû-bú tùi hô-nı̍h khí-lâi, pûi koh súi; tī lô͘-tek-á-lāi teh chia̍h;

19

tè-āu koh ū chhit chiah gû-bú khí-lâi, nńg-chiáⁿ, chin khiap-sì, koh chin sán; piàn Ai-kı̍p tōe, góa m̄-bat khòaⁿ-kìⁿ kàu chiah pháiⁿ.

20

Chiah ê sán koh khiap-sì ê gû-bú it-chīn chia̍h tāi-seng hit chhit chiah pûi ê gû-bú;

21

thun lo̍h pak, iáu-bōe khòaⁿ-chhut ū thun-lo̍h khì; hit ê khiap-sì ê khóan iû-gôan kap tāi-seng bô koh-iūⁿ; góa chiū chhíⁿ.

22

Góa tī bāng-tiong koh khòaⁿ-kìⁿ chı̍t châng be̍h, chhut chhit-sūi, pá-móa koh hó;

23

āu-lâi koh chhut chhit-sūi, ko͘-tâ, phàⁿ-phàⁿ, koh hō͘ tang-hong sàu-pháiⁿ;

24

chiah ê phàⁿ-phàⁿ ê sūi thun hit chhit sūi hó-ê. Góa kóng hō͘ su̍t-sū thiaⁿ, iā bô lâng ōe kā góa kóe-bêng.

25

Iok-sek kā Hoat-ló kóng, Hoat-ló ê bāng chiū-sī chı̍t-ê; Siōng-tè só͘ beh kiâⁿ ê sū, ū chí-sī Hoat-ló.

26

Chhit-chiah hó ê gû-bú sī chhit-nî; chhit-sūi hó-ê, ia̍h sī chhit-nî; bāng sī chı̍t-ê.

27

Hiah ê tè-āu khí-lâi ê chhit chiah sán koh khiap-sì ê gû-bú, sī chhit-nî; hiah ê chhit sūi khang-phàⁿ, koh hō͘ tang-hong sàu-pháiⁿ-ê, ia̍h sī chhit nî; beh chòe chhit nî ê ki-hng.

28

Siōng-tè só͘ beh chòe ê sū, ū hián-bêng tī Hoat-ló; che sī góa tùi Hoat-ló só͘ kóng-ê.

29

Lí khòaⁿ, Ai-kı̍p piàn-tōe beh tú-tio̍h tōa hó-nî-tang chhit-nî;

30

tè-āu, koh beh tú-tio̍h ki-hng chhit-nî; sīm-chì tī Ai-kı̍p tōe lóng bōe kì-tit í-chêng ê hó-siu; chôan-tōe beh hō͘ ki-hng só͘ bia̍t;

31

in-ūi í-āu ê ki-hng thài siong-tiōng, chiū m̄-chai í-chêng tōe-hng ê hó-siu.

32

Lūn-kàu Hoat-ló nn̄g pái ê bîn-bāng, sī in-ūi Siōng-tè chù-tiāⁿ chit ê tāi-chì, koh Siōng-tè beh kín-kín chiâⁿ-i.

33

Só͘-í Hoat-ló tio̍h kéng chı̍t ê ū chhang-miâ, ū tì-hūi ê lâng, phài i tī-lí Ai-kı̍p tōe.

34

Hoat-ló tio̍h án-ni kiâⁿ, koh lı̍p koaⁿ-ôan kóan-lí chit ê tōe; tng chhit-nî hó-nî-tang ê sî, Ai-kı̍p tōe só͘-siu-ê, gō͘-hūn thiu chı̍t-hūn;

35

hō͘ in tī chiong-lâi ê hó-nî-tang, chek-chū it-chhè ê bí-niû; chū-chı̍p ngó͘-kok, siu-khǹg chiàu-kò͘; tī ta̍k ê siâⁿ chòe chia̍h-mı̍h, kui tī Hoat-ló ê chhiú-thâu.

36

Só͘ chek-chū ê bí-niû, thang chòe Ai-kı̍p tōe chiong-lâi chhit-nî ki-hng ê lō͘-ēng; bián-tit chit ê tōe hō͘ ki-hng só͘ bia̍t.

37

Hoat-ló kap i it-chhè ê jîn-sîn lóng lia̍h chit ê tāi-chì chòe-hó.

38

Hoat-ló tùi i ê jîn-sîn kóng, Lán kiám ōe chhē-tio̍h chı̍t-ê chhin-chhiūⁿ i chit ê lâng, ū Siōng-tè ê sîn tī i ê lāi-bīn mah?

39

Hoat-ló tùi Iok-sek kóng, Siōng-tè í-keng chiong chit ê tāi-chì lóng chí-sī lí, khó-kiàn bô lâng chhin-chhiūⁿ lí ū chit-hō ê chhang-miâ tì-hūi.

40

Lí thang kóan-lí góa ê ke; góa ê peh-sìⁿ lóng tio̍h thiaⁿ lí ê ōe, hō͘ lí kóan-lí; to̍k-to̍k tī pó-chō, góa pí lí khah tōa.

41

Hoat-ló kā Iok-sek kóng, Góa kú-khí lí kóan-hat Ai-kı̍p chôan-tōe.

42

Hoat-ló chiū pak i chhiú-nı̍h chòe ìn ê chhiú-chí, kòa tī Iok-sek ê chńg-thâu-á; kā i chhēng iù-tōe-saⁿ; chiong kim-liān kòa tī i ê ām-kún.

43

Koh hō͘ Iok-sek chē i ê tē-jī pān chhia; khui-tō-ê kiò kóng, Kūi; án-ni Hoat-ló siat-lı̍p i tī-lí Ai-kı̍p chôan-tōe.

44

Hoat-ló tùi Iok-sek kóng, Góa sī Hoat-ló, nā bô lí ū siaⁿ, tī Ai-kı̍p chôan-tōe, m̄-chún lâng tāng kha-chhiú.

45

Hoat-ló khim-sù Iok-sek ê miâ kiò Sat-hoat-ná-thek Pa-lōe-a; koh chiong An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p hō͘ i chòe-bó͘. Iok-sek chiū chhut-sûn Ai-kı̍p tōe.

46

Iok-sek kìⁿ Ai-kı̍p ông Hoat-ló ê sî, hit-nî saⁿ-cha̍p hè. Iok-sek tùi Hoat-ló ê bīn-chêng chhut-khì, piàn kiâⁿ Ai-kı̍p chôan-tōe.

47

Chhit-ê hó nî-tang ê lāi-bīn, tōe ê chhut-sán ke̍k-kî hong-sēng.

48

Iok-sek chū-chı̍p Ai-kı̍p tōe chhit ê hó nî-tang it-chhè ê bí-niû; chiong bí-niû chek-chū tī ta̍k ê siâⁿ; chiu-ûi chhân-tōe ê bí-niû, lóng chek-chū tī i ê pún-siâⁿ.

49

Iok-sek chek-chū gō͘-kak ke̍k-chōe, chhin-chhiūⁿ hái-piⁿ ê soa, kàu i thêng-chí bô sǹg; in-ūi sǹg-bōe-liáu.

50

Ki-hng ê nî bē-kàu í-chêng, An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p kā Iok-sek siⁿ nn̄g ê kiáⁿ.

51

Iok-sek kā tōa kiáⁿ hō miâ kiò Má-ná-se; in-ūi i kóng, Siōng-tè hō͘ góa bōe-kì-tit góa it-chhè ê khùn-khó͘, kap góa ê lāu-pē ê chôan-ke.

52

I kā tē-jī kiáⁿ hō miâ Í-hoat-liân; in-ūi i kóng, Siōng-tè hō͘ góa tī góa siū-khó͘ ê tōe-hng heng-ōng.

53

Ai-kı̍p tōe chhit-nî hó nî-tang í-keng ôan,

54

chhit-nî ki-hng chiū lâi, tú-tú chiàu Iok-sek só͘ kóng-ê; ta̍k-kok lóng ū ki-hng; to̍k-to̍k Ai-kı̍p chôan-tōe ū bí-niû.

55

Kàu Ai-kı̍p chôan-tōe ū ki-hng, chèng peh-sìⁿ tùi Hoat-ló ai-kiû bí-niû; Hoat-ló tùi Ai-kı̍p ê chèng-lâng kóng, Lín khì chhē Iok-sek, hōan-nā i só͘ kóng-ê, lín lóng tio̍h chòe.

56

Tng-sî ki-hng piàn-móa thiⁿ-ē; Iok-sek khui ta̍k só͘-chāi ê chhek-chhng, thiò bí-niû hō͘ Ai-kı̍p lâng; tī Ai-kı̍p tōe ki-hng chin siong-tiōng.

57

Ta̍k-kok ê lâng lóng khì Ai-kı̍p, kàu Iok-sek hia tia̍h bí-niû; in-ūi thiⁿ-ē ki-hng chin siong-tiōng.