Chhòng-sè-kì 第 42 章 - 巴克禮全羅

1

Ngá-kok khòaⁿ-kìⁿ Ai-kı̍p ū gō͘-kak, Ngá-kok chiū kā i hiah ê kiáⁿ kóng, Lín siáⁿ-sū teh saⁿ-khòaⁿ.

2

Koh kóng, Góa thiaⁿ-kìⁿ Ai-kı̍p ū gō͘-kak, lín thang lo̍h-khì hia, ūi lán tia̍h tām-po̍h, hō͘ lán thang tō͘-o̍ah, bián sí.

3

Tùi án-ni Iok-sek cha̍p ê hiaⁿ lóng lo̍h Ai-kı̍p, khì tia̍h bí-niû.

4

Chóng-sī Iok-sek ê sió-tī Piān-ngá-bín, Ngá-kok bô chhe i kap in hiaⁿ saⁿ-kap khì; in-ūi i kóng, Kiaⁿ-liáu i tú-tio̍h hāi.

5

Lâi tia̍h bí-niû ê lâng ê tiong-kan, Í-sek-lia̍t hiah ê kiáⁿ ia̍h ū lâi, in-ūi Ka-lâm tōe ia̍h ū ki-hng.

6

Tng-sî tī-lí Ai-kı̍p tōe ê sī Iok-sek; thiò bí-niû hō͘ hit só͘-chāi ê chèng peh-sìⁿ-ê, ia̍h sī i; Iok-sek hiah ê hiaⁿ lâi, phak-lo̍h tōe pài i.

7

Iok-sek khòaⁿ-kìⁿ i hiah ê hiaⁿ, ōe jīn-tit, ké-chòe siⁿ-hūn-lâng, tùi in kóng khah-giâm ê ōe, mn̄g in kóng, Lín tùi tah-lo̍h lâi? in kóng, Tùi Ka-lâm tōe lâi tia̍h bí-niû.

8

Iok-sek ōe jīn-tit in hiaⁿ, in bōe jīn-tit i.

9

Iok-sek kì-tit chêng só͘ bāng lūn-kàu in-ê hiah ê bāng, chiū tùi in kóng, Lín sī cheng-thàm, lâi thàm-thiaⁿ chit só͘-chāi ê hu-sı̍t.

10

In tùi i kóng, Góan ê chú ah, m̄-sī, lí ê lô͘-po̍k lâi beh tia̍h bí-niû.

11

Góan lóng sī chı̍t-lâng ê kiáⁿ, góan sī láu-sı̍t lâng, lí ê lô͘-po̍k m̄-sī cheng-thàm.

12

Iok-sek kā in kóng, M̄-sī án-ni, lín lâi sī beh thàm-thiaⁿ chit só͘-chāi ê hu-sı̍t.

13

In kóng, Lí ê lô͘-po̍k cha̍p-jī ê hiaⁿ-tī, sī Ka-lâm tōe chı̍t ê lâng ê kiáⁿ; tē-it-sòe-ê, hiān-kim tī góan lāu-pē hia; ū chı̍t-ê bô-khì lah.

14

Iok-sek kā in kóng, Góa tú-á kóng lín sī cheng-thàm, chit ê ōe sı̍t-chāi bô chhò.

15

Góa kí Hoat-ló ê sìⁿ-miā lâi chiù-chōa, nā lín soah-bé ê sió-tī bô kàu chia, lín bōe-tit-thang chhut chit só͘-chāi; ēng án-ni lâi chhì-giām lín ê hu-sı̍t.

16

Tio̍h chhe lín tiong-kan chı̍t-lâng khì chhōa lín ê sió-tī lâi, lín chiah-ê lóng tio̍h koaiⁿ tī-chia, chèng-bêng lín ê ōe, chai lín sêng-sı̍t á-bô; nā bô, góa kí Hoat-ló ê sìⁿ-miā lâi chiù-chōa, lín it-tēng sī cheng-thàm.

17

Tùi án-ni Iok-sek chiong in lóng koaiⁿ tī Kaⁿ-nı̍h saⁿ-jı̍t.

18

Kàu tē-saⁿ jı̍t Iok-sek tùi in kóng, Góa kèng-ùi Siōng-tè; lín chiàu góa ê ōe kiâⁿ, chiū ōe o̍ah.

19

Lín nā kó-jiân sī láu-sı̍t lâng, lín hiaⁿ-tī-tiong thang lâu chı̍t-ê pa̍k tī lín hit kaⁿ-lāi; chóng-sī lín thang tòa bí-niû tò-khì, kiù lín ke-lāi ê ki-hng,

20

chiong lín soah-bé sió-tī chhōa lâi góa chia; án-ni lín ê ōe chiū ū pîn-kù, lín iā m̄-bián sí. In chiū chiàu án-ni kiâⁿ.

21

In saⁿ-kap kóng, Lán tùi tī lán ê sió-tī sı̍t-chāi ū chōe, i ai-kiû lán ê sî, lán khòaⁿ-kìⁿ i sim-lāi ê kan-khó͘, iā m̄-khéng thiaⁿ i; só͘-í chit-tiûⁿ ê khó͘-lān kàu tī lán.

22

Liû-piān ìn in kóng, Góa kiám m̄-sī tùi lín kóng, m̄-thang hāi hit ê gín-á lâi chhú-chōe, to̍k-to̍k lín m̄-thiaⁿ? só͘-í lâu i ê huih ê chōe, tùi lán chiah-ê thó.

23

In m̄-chai Iok-sek thiaⁿ ōe hiáu-tit; in-ūi tī in tiong-kan ū ēng hoan-e̍k-koaⁿ.

24

Iok-sek o̍at-tńg-sin lâu ba̍k-sái; koh o̍at-lâi kap in kóng-ōe; chiū tī in tiong-kan chhú Se-biān chhut-lâi, tī in ê bīn-chêng kā i pa̍k-teh.

25

Iok-sek hoan-hù lâng chiong gō͘-kak jı̍p tī in ê khì-kū kàu móa-móa, iā chiong in ta̍k-lâng ê gûn hē tī in ê pò͘-tē-lāi, lâi hêng in, koh ēng lō͘-nı̍h ê chia̍h-mı̍h hō͘ in; lâng chiū chiàu án-ni lâi kā in chòe.

26

In chiū chiong gō͘-kak hō͘ in ê lû chài, chiū lī-khui hia khì.

27

Kàu hioh-mî ê só͘-chāi, in tiong-kan ū chı̍t-lâng tháu-khui i ê pò͘-tē, beh the̍h hō͘ lû chia̍h, chiah khòaⁿ-kìⁿ i ê gûn iû-gôan tī-teh, hē tī pò͘-tē-kháu.

28

Chiū kā i ê hiaⁿ-tī kóng, Góa ê gûn hêng tò-tńg, lí khòaⁿ, iû-gôan tī góa ê pò͘-tē-lāi; in chiū kiaⁿ kàu bô sim-koaⁿ, ngia̍uh-ngia̍uh-chhoah, saⁿ-kap kóng, Siōng-tè án-ni khóan-thāi lán sī sím-mı̍h?

29

In kàu Ka-lâm tōe, kàu in lāu-pē Ngá-kok hia, chiong só͘ tú-tio̍h ê sū lóng kā i kóng, kóng, Hit-lâng, chiū-sī hit só͘-chāi ê chú, tùi góan kóng chin giâm ê ōe, lia̍h góan chòe hit só͘-chāi ê cheng-thàm.

30

31

Góan kā i kóng, Góan sī láu-sı̍t lâng, góan m̄-sī cheng-thàm,

32

góan sī cha̍p-jī ê hiaⁿ-tī, sī góan lāu-pē ê kiáⁿ; ū chı̍t-ê bô-khì, tē-it-sòe-ê hiān-kim kap góan lāu-pē tī Ka-lâm tōe.

33

Hit-lâng, chiū-sī hit só͘-chāi ê chú, kā góan kóng, Nā ài hō͘ góa chai lín sī láu-sı̍t lâng, lín hiaⁿ-tī-tiong thang lâu chı̍t-ê tī góa chia, lín chiah-ê thang tòa gō͘-kak tò-khì, kiù lín ke-lāi ê ki-hng;

34

chhōa lín soah-bé ê sió-tī lâi góa chia, góa chiū chai lín m̄-sī cheng-thàm, sī láu-sı̍t lâng; án-ni góa chiū chiong lín ê hiaⁿ-tī kau hō͘ lín, lín iā thang tī chit só͘-chāi bóe-bōe.

35

Āu-lâi in piàⁿ in ê pò͘-tē, bô phah-sǹg, in ta̍k-lâng ê gûn-pau lóng tī in ê pò͘-tē-lāi; in kap in lāu-pē khòaⁿ-kìⁿ gûn-pau chiū lóng kiaⁿ-hiâⁿ.

36

In ê lāu-pē Ngá-kok kā in kóng, Lín hō͘ góa sit-lo̍h góa ê kiáⁿ; Iok-sek bô-khì, Se-biān iā bô-khì, lín koh beh chhōa Piān-ngá-bín khì; chiah ê tāi-chì lóng sī hāi-tio̍h góa.

37

Liû-piān kā i ê lāu-pē kóng, Góa nā bô chhōa i tò-lâi kau lí, lí thang thâi góa nn̄g ê kiáⁿ; chòe lí thang chiong i kau-tài góa, góa tek-khak chhōa i tò-lâi kau lí.

38

Ngá-kok kóng, Góa ê kiáⁿ góa bô beh hō͘ i kap lín khì; i ê hiaⁿ í-keng sí, chí-ū chhun i; i nā tī lín só͘ kiâⁿ ê lō͘ tú-tio̍h hām-hāi, he! chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.