Chhòng-sè-kì 第 43 章 - 巴克禮全羅

1

Hit só͘-chāi ki-hng chin-tōa.

2

In tùi Ai-kı̍p tòa-lâi ê gō͘-kak í-keng chia̍h-liáu, in lāu-pē kā in kóng, Lín koh khì kā lán tia̍h tām-po̍h bí-niû lâi.

3

Iû-tāi ìn i kóng, Hit-lâng chhiat-chhiat hoan-hù góan kóng, Lín sió-tī nā bô kap lín saⁿ-kap lâi, lín chiū bōe tit-tio̍h kìⁿ góa ê bīn.

4

Lín nā chhe góan sió-tī kap góan saⁿ-kap khì, góan chiū lo̍h-khì, kā lí tia̍h bí-niû.

5

Lí nā m̄ chhe i khì, góan chiū m̄ lo̍h-khì; in-ūi hit-lâng kā góan kóng, Lín sió-tī nā bô kap lín saⁿ-kap lâi, lín chiū bōe tit-tio̍h kìⁿ góa ê bīn.

6

Í-sek-lia̍t kóng, Lín siáⁿ-sū án-ni hāi góa, kā hit-lâng kóng lín iáu ū sió-tī ah?

7

In ìn kóng, Hit-lâng tì-ì mn̄g góan kap góan chhin-cho̍k ê tāi-chì kóng, Lín lāu-pē iáu tī-teh bô? lín iáu ū hiaⁿ-tī bô? góan chiàu i só͘ mn̄g-ê kā i kóng; góan thái-thó ōe chai i beh kóng, Tio̍h tòa lín sió-tī lo̍h-lâi?

8

Iû-tāi koh kā i ê lāu-pē Í-sek-lia̍t kóng, Lí chhe gín-á kap góa khì, góan chiū khí-sin khì, thang hō͘ góan kap lí, í-kı̍p góan ê gín-á, tit-tio̍h o̍ah, bián sí.

9

Góa kā i pó, lí thang tùi góa thó; góa nā bô chhōa i tò-lâi, khiā tī lí ê bīn-chêng, góa gōan it-seng tam-tng chōe.

10

Lán nā m̄-sī ū iân-chhiân, í-keng tē-jī-pái tò-lâi lah.

11

In lāu-pē Í-sek-lia̍t tùi in kóng, Nā sī án-ni, lín chiū tio̍h án-ni chòe; thang chhú chit só͘-chāi tē-it hó ê thó͘-sán, jú-hiuⁿ tām-po̍h, phang-bı̍t tām-po̍h, í-kı̍p hiuⁿ-liāu, bu̍t-io̍h, húi-chí, hēng-jîn, lóng siu tī khì-kū lāi; tòa-khì sàng hit-lâng.

12

Koh tio̍h tòa gûn têng-pē, ia̍h tio̍h chiong lín pò͘-tē-kháu, i hêng lín ê gûn, tòa tò-tńg khì hō͘-i; hit-ê kiám-chhái sī sit-chhò;

13

ia̍h chhōa lín sió-tī khí-sin, khì koh kìⁿ hit-lâng.

14

To̍k-to̍k gōan chôan-lêng ê Siōng-tè hō͘ lín tī hit-lâng ê bīn-chêng tit-tio̍h lîn-bín; chiong lín hit ê hiaⁿ-tī kap Piān-ngá-bín kau lín; góa nā sit-lo̍h góa ê kiáⁿ, ia̍h tio̍h hō͘ i sit-lo̍h chiū-sī.

15

Tùi hit-tia̍p in tòa hiah ê lé-mı̍h, ia̍h tòa gûn têng-pē, koh chhōa Piān-ngá-bín, khí-sin lo̍h-khì Ai-kı̍p; khiā tī Iok-sek ê bīn-chêng.

16

Iok-sek khòaⁿ-kìⁿ Piān-ngá-bín kap in saⁿ-kap lâi, chiū tùi kóan-ke-ê kóng, Chhōa chiah ê lâng khì chhù-lāi, thâi cheng-siⁿ, pī-pān iân-sia̍h; in-ūi jı̍t-tàu, chiah ê lâng beh kap góa saⁿ-kap chia̍h.

17

Hit-lâng chiū chiàu Iok-sek ê ōe khì kiâⁿ; chhōa in hiah ê lâng jı̍p Iok-sek ê chhù.

18

Hiah ê lâng, in-ūi hō͘ i chhōa kàu Iok-sek ê chhù, chiū kiaⁿ-hiâⁿ; kóng, Chhōa lán kàu chia, tek-khak sī in-ūi thâu-chı̍t-pái hêng lán tī pò͘-tē-lāi ê gûn, beh chhē lán ê khang-phāng, hē chhiú hāi lán, kiông-kiông lia̍h lán chòe lô͘-po̍k, chhiúⁿ lán ê lû.

19

In chiū óa-kūn Iok-sek ê kóan-ke-ê, tī chhù-mn̂g-kháu kap i kóng-ōe,

20

kóng, Góa ê chú ah, góan thâu-pái lo̍h-lâi, sı̍t-chāi sī beh tia̍h bí-niû;

21

āu-lâi kàu hioh-mî ê só͘-chāi, khui góan ê pò͘-tē, bô phah-sǹg, góan ta̍k-lâng ê gûn chiok-sò͘ iû-gôan tī ta̍k-lâng ê pò͘-tē-kháu; taⁿ góan ū koh tòa-lâi; góan lēng-gōa ū koh tòa gûn beh lâi tia̍h bí-niû;

22

góan m̄-chai chī-chūi chiong góan ê gûn hē tī góan ê pò͘-tē-lāi.

23

Kóan-ke-ê kóng, Chòe lín an-sim, bián kiaⁿ; sī lín ê Siōng-tè, kap lín lāu-pē ê Siōng-tè, siúⁿ-sù lín châi-pó tī lín ê pò͘-tē-lāi; lín ê gûn góa í-keng siu-liáu. Chiū chhōa Se-biān chhut-lâi hō͘ in.

24

Hit-lâng chiū chhōa hiah ê lâng jı̍p Iok-sek ê chhù, phâng chúi hō͘ in, in chiū sóe kha; koh the̍h chháu-liāu chhī in ê lû.

25

In chiū pī-pān hiah ê lé-mı̍h, thèng-hāu Iok-sek jı̍t-tàu tò-lâi; in-ūi in thiaⁿ-kìⁿ beh tī-hia chia̍h.

26

Iok-sek tò-lâi kàu chhù, in chiū chiong só͘ tòa-lâi ê lé-mı̍h the̍h jı̍p chhù sàng-i; koh phak tī tōe-nı̍h pài i.

27

Iok-sek mn̄g in pêng-an; koh kóng, Lín ê lāu-pē, chiū-sī lín só͘ kóng hit ê lāu-lâng, pêng-an mah? i iáu tī-teh mah?

28

In ìn kóng, Lí ê lô͘-po̍k, góan ê lāu-pē, pêng-an, i iáu tī-teh; in chiū àⁿ-thâu pài i.

29

Iok-sek kia̍h-ba̍k khòaⁿ-kìⁿ i tâng-bú ê sió-tī, Piān-ngá-bín; chiū kóng, Lí só͘ kā góa kóng soah-bé sió-tī, sī chit-ê mah? Koh kóng, Sòe-kiáⁿ, gōan Siōng-tè si-un hō͘ lí.

30

Iok-sek thiàⁿ sió-tī ê chêng tōa siū kek-tōng; chiū kóaⁿ-kín chhē chı̍t-ūi thang thî-khàu; jı̍p i ê pâng-keng thî-khàu;

31

āu-lâi sóe-bīn chhut-lâi, bián-kióng lún-teh; hoan-hù khui-toh.

32

In chiū ūi Iok-sek lēng-gōa pâi chı̍t tè toh, ūi hiah ê lâng koh pâi chı̍t tè, ia̍h ūi kap Iok-sek saⁿ-kap chia̍h ê Ai-kı̍p lâng lēng-gōa pâi chı̍t-tè; in-ūi Ai-kı̍p lâng bōe thang kap Hi-pek-lâi lâng saⁿ-kap chia̍h, che sī Ai-kı̍p lâng só͘ iàm-ò͘ⁿ.

33

Hiah ê lâng chē tī i ê bīn-chêng, tōa-sòe chiàu in nî-hè ê chhù-sū; hiah ê lâng tāi-ke gông-ngia̍h.

34

Iok-sek chiong i bīn-chêng ê chia̍h-mı̍h, pun hō͘ in; to̍k-to̍k Piān-ngá-bín só͘ tit-tio̍h-ê, pí pa̍t-lâng gō͘-pē chōe; in chiū lim chiú, kap Iok-sek saⁿ-kap iàn-lo̍k.