Chhòng-sè-kì 第 44 章 - 巴克禮全羅

1

Iok-sek hoan-hù kóan-ke-ê kóng, chiong bí-niû jı̍p móa chiah ê lâng ê pò͘-tē, chīn in só͘ ōe tòa-ê; koh chiong ta̍k-lâng ê gûn lok tī i ê pò͘-tē-kháu.

2

Ia̍h chiong góa ê poe, chiū-sī hit tè gûn-poe, hē tī siàu-liân-ê ê pò͘-tē-kháu; i tia̍h gō͘-kak ê gûn ia̍h sòa hē-teh. Kóan-ke-ê chiū chiàu Iok-sek só͘ kóng ê ōe khì kiâⁿ.

3

Thiⁿ chı̍t-ē kng, chiū chhe hiah ê lâng kap in ê lû khì.

4

In chhut siâⁿ kiâⁿ bô jōa-hn̄g, Iok-sek kā kóan-ke-ê kóng, Khí-lâi, khì tui-jip hiah ê lâng, tui-tio̍h, chiū kā in kóng, Lín siáⁿ-sū ēng pháiⁿ pò hó ah?

5

Che kiám m̄-sī góa ê chú-lâng lim-chiú ê poe mah? Kiám m̄-sī i chiam-pok teh ēng-ê mah? lín án-ni chòe sī pháiⁿ.

6

Kóan-ke-ê tui-tio̍h in, chiong chiah ê ōe kā in kóng.

7

In ìn kóng, Góa ê chú siáⁿ-sū kóng chit hō ōe? lí ê lô͘-po̍k tòan-tòan bô chòe chit-hō sū.

8

Lí khòaⁿ, góan chêng tī pò͘-tē-kháu só͘ khòaⁿ-kìⁿ ê gûn, siōng-chhiáⁿ tùi Ka-lâm tōe tòa-lâi hêng lí; góan thái-thó ōe tùi lí chú-lâng ê ke thau-the̍h kim-gûn ah?

9

Lí ê lô͘-po̍k ê tiong-kan, bô-lūn tī sím-mı̍h lâng hia chhiau-tio̍h, chiū hō͘ i sí, góan ia̍h beh chòe góa ê chú-lâng ê lô͘-po̍k.

10

Kóan-ke-ê kóng, Taⁿ chiū chiàu lín ê ōe kiâⁿ; tī sím-mı̍h lâng hia chhiau-tio̍h, hit-lâng chiū chòe góa ê lô͘-po̍k; kî-û-ê lóng bô chōe.

11

Tùi hit-tia̍p in ta̍k-lâng kóaⁿ-kín chiong pò͘-tē sià tī thô͘-kha, ta̍k-lâng tháu-khui in ê pò͘-tē.

12

Kóan-ke-ê chiū chhiau, tùi tōa-ê khí, kàu sòe-ê chí; hit ê poe kéng-jiân tī Piān-ngá-bín ê pò͘-tē-lāi chhiau-tio̍h.

13

In chiū thiah-lı̍h in ê saⁿ, ta̍k-lâng chiong in ê mı̍h hō͘ lû chài, tò-khì siâⁿ-lāi.

14

Iû-tāi kap i ê hiaⁿ-tī kàu Iok-sek ê chhù, Iok-sek iáu tī-hia, in chiū tī i ê bīn-chêng phak-lo̍h tōe.

15

Iok-sek kā in kóng, Lín só͘-chòe-ê sī sím-mı̍h sū? lín kiám m̄-chai, chhin-chhiūⁿ góa chit-hō ê lâng ōe chiam-pok mah?

16

Iû-tāi kóng, Góan tùi góa ê chú beh kóng sím-mı̍h? iáu ū siáⁿ ōe thang kóng? góan thái ōe ka-kī sò͘-bêng ah? Siōng-tè í-keng cha-chhut lí ê lô͘-po̍k ê chōe-kòa, góan kap hit-ê tī i ê chhiú chhiau tio̍h poe-ê, lóng sī góa ê chú ê lô͘-po̍k.

17

Iok-sek kóng, Góa tòan-tòan bô beh án-ni chòe; Tī sím-mı̍h lâng ê chhiú chhiau tio̍h poe, hit-lâng chiū tio̍h chòe góa ê lô͘-po̍k; lín chiah-ê thang pêng-an chiūⁿ khì lín lāu-pē hia.

18

Iû-tāi óa-kūn i kóng, Góa ê chú ah, kiû lí iông-ún lí ê lô͘-po̍k kóng chı̍t-kù-ōe hō͘ góa ê chú thiaⁿ, bo̍h-tit siū-khì lí ê lô͘-po̍k; in-ūi lí kap Hoat-ló chı̍t-iūⁿ.

19

Góa ê chú bat mn̄g lí chiah ê lô͘-po̍k kóng, Lín ū lāu-pē, ū hiaⁿ-tī bô?

20

Góan kā góa ê chú kóng, Góan ū lāu-pē, í-keng nî-lāu; iáu ū i nî-lāu só͘ siⁿ chı̍t ê soah-bé kiáⁿ; i ê hiaⁿ í-keng sí, i ê lāu-bú kan-ta pàng i chı̍t-ê, koh i ê lāu-pē chin thiàⁿ-i.

21

Lí kā lí ê lô͘-po̍k kóng, Chhōa i lo̍h-lâi góa chia, hō͘ góa chhin-ba̍k khòaⁿ-kìⁿ i.

22

Góan kā góa ê chú kóng, Gín-á bōe-ōe lī-khui i ê lāu-pē; nā lī-khui i ê lāu-pē, lāu-pē tek-khak sí.

23

Lí kā lí ê lô͘-po̍k kóng, Lín ê soah-bé sió-tī nā bô kap lín saⁿ-kap lo̍h-lâi, lín chiū bōe-tit koh kìⁿ góa ê bīn.

24

Góan chiūⁿ kàu lí ê lô͘-po̍k, góan lāu-pē hia, chiū chiong góa ê chú ê ōe kā i kóng.

25

Góan ê lāu-pē kóng, Lín koh khì kā lán tia̍h tām-po̍h bí-niû lâi.

26

Góan chiū kóng, Góan bōe-ōe lo̍h-khì; góan ê soah-bé sió-tī nā kap góan saⁿ-kap khì, góan chiū beh lo̍h-khì; in-ūi soah-bé sió-tī nā bô kap góan saⁿ-kap khì, góan tek-khak bōe-tit kìⁿ hit-lâng ê bīn.

27

Lí ê lô͘-po̍k, góa ê lāu-pē, kā góan kóng, Lín chai góa ê bó͘ kā góa siⁿ nn̄g ê kiáⁿ;

28

chı̍t-ê lī-khui góa chhut-khì, góa kóng i tek-khak sī hō͘ iá-siù thiah-chhùi; kàu-taⁿ góa iáu m̄-bat khòaⁿ-kìⁿ;

29

taⁿ lín koh chiong chit-ê chhōa-khì, lī-khui góa; nā i tú-tio̍h hām-hāi, chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.

30

Góan lāu-pē ê sìⁿ-miā kap chit ê gín-á ê sìⁿ-miā siⁿ saⁿ-liân; taⁿ góa tò-khì lí ê lô͘-po̍k góa ê lāu-pē hia; nā gín-á bô kap góan saⁿ-kap tī-teh, góan ê lāu-pē khòaⁿ bô gín-á, i chiū tek-khak sí,

31

che chiū-sī góan hō͘ lí ê lô͘-po̍k, góan ê lāu-pē, pe̍h-thâu-mn̂g chhiⁿ-chhám lo̍h im-hú.

32

In-ūi lí ê lô͘-po̍k bat tùi góa ê lāu-pē pó chit ê gín-á, kóng, Góa nā bô chhōa i tò-lâi kau lí, góa gōan tī lāu-pē ê bīn-chêng it-seng tam-tng chōe.

33

Taⁿ kiû lí iông-ún lí ê lô͘-po̍k tiàm-teh, thòe chit ê gín-á chòe góa ê chú ê lô͘-po̍k; hō͘ gín-á kap i hiah ê hiaⁿ saⁿ-kap chiūⁿ-khì.

34

Nā gín-á bô kap góa saⁿ-kap khì, góa thái-thó ōe chiūⁿ-khì kìⁿ góa ê lāu-pē ah? kiaⁿ-liáu góa khòaⁿ-kìⁿ góan lāu-pē só͘ tú-tio̍h ê chai-ē.