Chhòng-sè-kì 第 45 章 - 巴克禮全羅

1

Iok-sek tī hiah-ê khiā i sin-piⁿ ê lâng ê bīn-chêng lún-bōe-tiâu; chiū hoah kóng, Chèng-lâng tio̍h lī-khui góa chhut-khì. Iok-sek chiong i pún-sin hō͘ hiaⁿ-tī jīn-tit ê sî, bô chı̍t-lâng khiā tī i ê bīn-chêng.

2

I chiū chhut-siaⁿ tōa-khàu; Ai-kı̍p lâng thiaⁿ-kìⁿ, Hoat-ló ê ke ia̍h thiaⁿ-kìⁿ.

3

Iok-sek kā i ê hiaⁿ-tī kóng, Góa sī Iok-sek, góa ê lāu-pē iáu tī-teh mah? I ê hiaⁿ-tī bōe-ōe ìn, in-ūi tī i ê bīn-chêng lóng kiaⁿ-hiâⁿ.

4

Iok-sek koh kā i ê hiaⁿ-tī kóng, Chhiáⁿ kiâⁿ-óa-lâi. In chiū óa-lâi. I kóng, Góa sī lín ê sió-tī Iok-sek, chiū-sī lín só͘ bōe kàu Ai-kı̍p-ê.

5

Taⁿ m̄-bián in-ūi bōe góa kàu chia lâi iu-būn, lâi ka-kī òan-hūn; che sī Siōng-tè chhe góa tāi-seng lín lâi, in-ūi beh pó-chôan sìⁿ-miā.

6

Taⁿ tī chit só͘-chāi ê ki-hng í-keng nn̄g-nî, iáu ū gō͘-nî, bô thang chèng-choh, bô thang siu-sêng.

7

Siōng-tè chhe góa tāi-seng lín lâi, ūi-tio̍h beh kā lín lâu chhun ê chéng-cho̍k tī sè-chiūⁿ; koh beh kiâⁿ I tōa ê chín-kiù, pó-chôan lín ê o̍ah-miā.

8

Án-ni khòaⁿ-khí-lâi, chhe góa kàu chia ê, m̄-sī lín, chiū-sī Siōng-tè; I koh hō͘ góa chhin-chhiūⁿ Hoat-ló ê pē, chòe i chôan-ke ê chú, kap kóan-lí Ai-kı̍p chôan-tōe.

9

Lín tio̍h kóaⁿ-kín chiūⁿ-khì góa ê lāu-pē hia, kā i kóng, Lí ê kiáⁿ Iok-sek án-ni kóng, Siōng-tè hō͘ góa chòe chôan Ai-kı̍p ê chú, chhiáⁿ lo̍h-lâi góa chia, m̄-thang iân-chhiân.

10

Lí kap lí ê kiáⁿ lí ê sun, kap gû-kûn iûⁿ-kûn, í-kı̍p it-chhè só͘-ū-ê, lóng thang lâi tiàm tī Ko-san ê tōe, kap góa saⁿ-kūn.

11

Góa beh tī-hia hōng-sêng lí; in-ūi iáu ū gō͘ nî ê ki-hng, bián-tit lí, kap lí ê ke-kòan, kap it-chhè só͘-ū-ê lo̍h-po̍h.

12

Hô-hòng lín ê ba̍k-chiu kap góa ê sió-tī Piān-ngá-bín ê ba̍k-chiu lóng khòaⁿ-kìⁿ góa kap lín chhin-chhùi tùi lín kóng-ōe.

13

Lín iā tio̍h chiong góa tī Ai-kı̍p it-chhè ê êng-kng kap lín só͘ khòaⁿ-kìⁿ ê sū, lóng kā góa ê lāu-pē kóng; koh tio̍h kóaⁿ-kín chiong góa ê lāu-pē poaⁿ-lâi góa chia.

14

Tùi án-ni Iok-sek phak tī i ê sió-tī Piān-ngá-bín ê ām-kún thî-khàu; Piān-ngá-bín iā tī i ê ām-kún thî-khàu.

15

I koh kap chèng hiaⁿ-tī chim-chhùi, phō-in thî-khàu; āu-lâi i ê hiaⁿ-tī chiū kap i kóng-ōe.

16

Chit ê hong-siaⁿ thôan kàu Hoat-ló ê keng-lāi, kóng, Iok-sek ê hiaⁿ-tī lâi lah. Hoat-ló kap i ê jîn-sîn lóng hoaⁿ-hí.

17

Hoat-ló kā Iok-sek kóng, Lí tio̍h kā lí ê hiaⁿ-tī kóng, Lín tio̍h án-ni kiâⁿ; chiong mı̍h hō͘ cheng-siⁿ chài; khí-sin khì Ka-lâm tōe;

18

chiong lín ê lāu-pē, kap lín ê ke-kòan, lóng poaⁿ-lâi góa chia; góa beh chiong Ai-kı̍p tōe ê hó-mı̍h hō͘ lín, lín ia̍h thang chia̍h chit só͘-chāi ê san-tin hái-bī.

19

Taⁿ góa bēng-lēng lí, lín tio̍h án-ni chòe; tùi Ai-kı̍p tōe tòa chhia khì, chiong lín ê gín-á, kap bó͘, kap lín ê lāu-pē, lóng poaⁿ-lâi.

20

M̄-thang khòaⁿ-tāng lín ke-lāi ê mı̍h, in-ūi Ai-kı̍p chôan-tōe ê hó-mı̍h, lóng sī lín ê.

21

Í-sek-lia̍t ê chèng-kiáⁿ chiū án-ni kiâⁿ. Iok-sek chiàu Hoat-ló ê bēng-lēng hō͘ in chhia, kap lō͘-tiong tio̍h ēng ê chia̍h-mı̍h;

22

koh hō͘ in chı̍t-lâng chı̍t-thò i-ho̍k; to̍k-to̍k hō͘ Piān-ngá-bín gûn saⁿ-pah, i-ho̍k gō͘-thò.

23

Sàng in lāu-pē ê mı̍h, kì tī ē-tóe; lû-káng cha̍p-chiah, chài Ai-kı̍p ê hó-mı̍h; lû-bú cha̍p-chiah, chài gō͘-kak kap piáⁿ kap chhài, hō͘ in lāu-pē lō͘-nı̍h thang ēng.

24

Iok-sek chiū chhe i ê hiaⁿ-tī tò-khì, in chiū khí-sin; koh kā in kóng, Lín m̄-thang tī lō͘-nı̍h oan-ke.

25

In tùi Ai-kı̍p chiūⁿ-khì, lâi kàu Ka-lâm tōe, in lāu-pē Ngá-kok hia.

26

Kā i kóng, Iok-sek iáu tī-teh, koh kóan-lí Ai-kı̍p chôan-tōe. Ngá-kok sim hūn-khì, in-ūi m̄ sìn in ê ōe.

27

In chiū chiong Iok-sek tùi in só͘ kóng ê ōe, lóng kā i kóng; i koh khòaⁿ-kìⁿ Iok-sek só͘ chhe-lâi beh chài i ê chhia, in lāu-pē Ngá-kok ê sim o̍ah-khí-lâi.

28

Í-sek-lia̍t kóng, Hó lah; góa ê kiáⁿ Iok-sek iáu tī-teh, thàn góa iáu-bē sí, góa beh khì khòaⁿ-i.