Chhòng-sè-kì 第 4 章 - 巴克禮全羅

1

Hit-lâng kap i ê bó͘ Hā-oa tâng-pâng; Hā-oa chiū hôai-īn siⁿ Kai-ún, kóng, Góa tùi Iâ-hô-hoa pì-iū tit-tio̍h kiáⁿ.

2

Koh siⁿ i ê sió-tī A-pek. A-pek sī kò͘-iûⁿ-ê, Kai-ún sī choh-chhân-ê.

3

Kàu jı̍t-āu, Kai-ún chiong thó͘-sán chòe lé-mı̍h hiàn hō͘ Iâ-hô-hoa.

4

A-pek iā chiong iûⁿ-kûn-tiong thâu-chiūⁿ-siⁿ ê iûⁿ kap i ê iû the̍h-lâi hiàn. Iâ-hô-hoa kòan-kò͘ A-pek kap i ê lé-mı̍h;

5

chóng-sī bô kòan-kò͘ Kai-ún kap i ê lé-mı̍h. Kai-ún chiū tōa siū-khì, pìⁿ-bīn.

6

Iâ-hô-hoa tùi Kai-ún kóng, Lí siáⁿ-sū siū-khì? lí siáⁿ-sū pìⁿ-bīn?

7

Lí nā kiâⁿ-hó, kiám bô tit-tio̍h kàm-la̍p? nā bô kiâⁿ-hó, chōe-gia̍t bâi-ho̍k tī mn̂g-kháu; i beh lôan-bō͘ lí, lí beh kóan-hat i.

8

Kai-ún kā i ê sió-tī kóng. Í-āu in tī soaⁿ-nı̍h ê sî, Kai-ún kong-kek i ê sió-tī A-pek, kā i thâi-sí.

9

Iâ-hô-hoa tùi Kai-ún kóng, Lí ê sió-tī A-pek tī tah-lo̍h? I kóng, M̄-chai; góa kiám-sī kò͘-siú góa ê sió-tī-ê mah?

10

I kóng, Lí ū chòe sím-mı̍h? Lín sió-tī ê huih ê siaⁿ tùi tōe-nı̍h âu-kiò Góa.

11

Tōe ū khui-chhùi tùi lí ê chhiú lâi chiap-siū lín sió-tī ê huih, taⁿ lí tùi chit ê tōe siū chiù-chó͘.

12

Lí chèng-choh, tōe bô beh chhut thó͘-sán hō͘ lí; lí beh sì-kòe cháu, phiau-liû tōe-chiūⁿ.

13

Kai-ún tùi Iâ-hô-hoa kóng, Góa ê hêng-ho̍at thài-tāng, kè-thâu tī góa só͘ ōe-tng-ê.

14

Lí kin-á-jı̍t kóaⁿ góa lī-khui chit ê tōe-bīn, bô thang tòa tī Lí ê bīn-chêng; góa sì-kòe cháu phiau-liû tōe-chiūⁿ; kìⁿ-nā tú-tio̍h góa ê beh thâi-sí góa.

15

Iâ-hô-hoa tùi i kóng, In-ūi án-ni, kìⁿ-nā thâi-sí Kai-ún ê, beh siū chhit-pē ê pò-èng. Iâ-hô-hoa chiū kā Kai-ún lı̍p chı̍t ê kì-hō, bián-tit tú-tio̍h i ê thâi-sí i.

16

Kai-ún chiū lī-khui Iâ-hô-hoa ê bīn-chêng, khì tī Ai-tiân ê tang-sì, Lô-tek ê tōe, khiā-khí.

17

Kai-ún kap i ê bó͘ tâng-pâng; i ê bó͘ hôai-īn siⁿ Í-lo̍k; Kai-ún khí siâⁿ, chiū chiàu i ê kiáⁿ ê miâ chheng hit ê siâⁿ ê miâ chòe Í-lo̍k.

18

Í-lo̍k siⁿ Í-ná; Í-ná siⁿ Bí-hō͘-ngá-lī; Bí-hō͘-ngá-lī siⁿ Má-thó͘-sat-lī; Má-thó͘-sat-lī siⁿ La̍h-be̍k.

19

La̍h-be̍k chhōa nn̄g ê bó͘; chı̍t-ê miâ A-tāi, chı̍t-ê miâ Sé-la̍h.

20

A-tāi siⁿ Ngá-pat; i chòe khiā-khí pò͘-pîⁿ chhī cheng-siⁿ ê lâng ê chó͘.

21

I ê sió-tī miâ Iû-pat; i sī chòe it-chhè tôaⁿ-khîm pûn-siau ê lâng ê chó͘.

22

Sé-la̍h iā siⁿ Thó͘-pat-kai-ún; i chiū-sī chè-chō ta̍k-iūⁿ tâng thih lāi-khì ê; Thó͘-pat-kai-ún ê chí-bē chiū-sī Ná-má.

23

La̍h-be̍k tùi i nn̄g ê bó͘ kóng: A-tāi kap Sé-la̍h ah, tio̍h thiaⁿ góa ê siaⁿ, La̍h-be̍k ê bó͘ ah, tio̍h tì-ì thiaⁿ góa ê ōe; Lâng siong góa, góa thâi i, Siàu-liân lâng hāi góa, góa thâi i.

24

Kai-ún ê sin-oan nā sī chhit-pē, Chiū La̍h-be̍k ê sin-oan tek-khak chhit-cha̍p-chhit pē.

25

A-tong koh kap i ê bó͘ tâng-pâng; i ê bó͘ siⁿ-kiáⁿ, piáu-miâ kiò Siat; sī kóng, Siōng-tè koh kā góa siat-lı̍p chı̍t ê kiáⁿ lâi thòe A-pek, in-ūi Kai-ún kā i thâi-sí.

26

Siat iā siⁿ-kiáⁿ, piáu-miâ Í-lô-sū; hit-sî lâng chiah khí-thâu kiû-kiò Iâ-hô-hoa ê miâ.