Hi-pek-lâi 第 10 章 - 巴克禮全羅

1

In-ūi lu̍t-hoat kì-jiân ū chiong-lâi hó sū ê iáⁿ, bô hiah ê mı̍h ê chin hêng; éng-éng bōe-ōe ēng ta̍k nî siông-siông teh hiàn saⁿ-tâng ê chè, hō͘ chhin-kūn ê lâng tit-tio̍h ôan-chôan.

2

Nā sī ōe, chiū hiàn-chè ê sū kiám bô thêng-soah mah? in-ūi ho̍k-sāi ê lâng chı̍t-ē chheng-khì, chiū liông-sim bô koh chai ū chōe.

3

Nā-sī tùi chiah ê chè-mı̍h sī hō͘ lâng ta̍k nî kì-tit chōe.

4

In-ūi gû iûⁿ ê huih bōe-ōe tû-khì chōe.

5

Só͘-í I lâi jı̍p sè-kan, chiū kóng, Chè-sū lé-mı̍h lí m̄ ài, Lí bat kā góa pī-pān sin-khu;

6

Sio-chè kap sio̍k-chōe chè, lí bô hoaⁿ-hí;

7

Hit sî góa kóng, Lí khòaⁿ, góa lâi lah, Góa ê sū kì-chài tī chheh-nı̍h, Siōng-tè, góa lâi sī beh kiâⁿ lí ê chí-ì.

8

Téng-bīn í-keng kóng, Chè-sū kap lé-mı̍h, sio-chè kap sio̍k-chōe chè, lí m̄ ài, ia̍h bô hoaⁿ-hí, (chiah-ê sī chiàu lu̍t-hoat lâi hiàn ê),

9

āu-lâi kóng, Lí khòaⁿ, góa lâi sī beh kiâⁿ lí ê chí-ì. I sī tû-khì tāi-seng ê, beh siat-lı̍p tè-āu ê.

10

Tī chit ê chí-ì, tùi Iâ-so͘ Ki-tok chı̍t pái hiàn seng-khu, lán tit-tio̍h chiâⁿ sèng.

11

Koh kìⁿ-nā chè-si ta̍k jı̍t khiā-teh lâi ho̍k-sāi, ta̍uh-ta̍uh hiàn hiah ê saⁿ-tâng ê chè, chiū-sī éng-éng bōe-ōe tû-khì chōe ê;

12

to̍k-to̍k Ki-tok, kì-jiân hiàn chı̍t ê chè kàu tī éng-óan, chiū chē tī Siōng-tè ê tōa pêng;

13

í-āu thèng-hāu I chiah ê tùi-te̍k hē chòe I ê kha-ta̍h-í.

14

In-ūi I ēng chı̍t pái hiàn-chè, hō͘ chiah ê chiâⁿ-sèng ê lâng éng-óan chòe ôan-chôan.

15

Sèng Sîn kā lán chòe kan-chèng: in-ūi I í-keng ū kóng,

16

Chú kóng, Chiah ê jı̍t liáu-āu, Góa kap in só͘ beh lı̍p ê iok sī chit-ê, Góa beh chiong góa ê lu̍t-hoat hē tī in ê sim, Khek tī in ê thâu-náu;

17

āu-lâi chiū kóng, "In ê chōe-ok, in ê put-hoat, koat-tòan bô koh kì-liām."

18

Chiah-ê kì-jiân sià-bián, chiū bô koh ūi-tio̍h chōe hiàn-chè.

19

Só͘-í hiaⁿ-tī ah, lán tī Iâ-so͘ ê huih kì-jiân tit-tio̍h hó-táⁿ jı̍p sèng-só͘,

20

tùi I só͘ kā lán khui sin kap o̍ah ê lō͘, àn tiùⁿ-lî keng-kè ê, chit ê tiùⁿ-lî chiū-sī I ê sin-thé;

21

koh kì-jiân ū tōa chè-si tī-lí Siōng-tè ê ke;

22

lán tio̍h ēng chin-sı̍t ê sim, chhiong-móa ê sìn, sim í-keng siū hiù bián hō͘ liông-sim chek-pī, seng-khu ia̍h í-keng siū chheng-chúi sóe, lâi chhin-kūn Siōng-tè.

23

Lán só͘ ǹg-bāng ê, í-keng ū sêng-jīn, taⁿ tio̍h kian-kò͘ chit ê sêng-jīn bô iô-tāng; in-ūi hit ê èng-ún lán ê sī sìn-sı̍t;

24

koh tio̍h tāi-ke saⁿ kòan-kò͘, lâi kek-khí jîn-ài kap kiâⁿ hó;

25

m̄ thang pàng-soah lín ê chū-hōe, chhin-chhiūⁿ ū lâng kòaiⁿ-sì án-ni, chiū-sī tio̍h saⁿ khòan-bián; kì-jiân khòaⁿ-kìⁿ hit jı̍t kūn, koh khah tio̍h án-ni.

26

In-ūi lán í-keng tit-tio̍h chin-chai chin-lí, āu-lâi nā kam-sim teh hōan-chōe, chiū bô koh ū sio̍k-chōe ê chè,

27

to̍k-to̍k kiaⁿ-hiâⁿ lâi thèng-hāu sím-phòaⁿ, kap beh thun-bia̍t tùi-te̍k ê jia̍t hé.

28

Khì-cho̍at Mô͘-se ê lu̍t-hoat ê, ū nn̄g saⁿ lâng chòe kan-chèng, chiū hō͘ i sí bô lîn-bín:

29

hô-hòng thún-ta̍h Siōng-tè ê Kiáⁿ, chiong hō͘ pún-sin chiâⁿ sèng ê iok ê huih chòe sio̍k mı̍h, koh bú-bān si un ê Sèng Sîn, lín siūⁿ hit hō lâng eng-kai siū ê hêng-ho̍at tio̍h ke jōa tāng ah?

30

In-ūi lán chai chī-chūi ū kóng, Sin-oan chāi góa, góa beh pò-èng.

31

Koh kóng, Chú beh sím-phòaⁿ I ê peh-sìⁿ. Hām-lo̍h tī chin-o̍ah Siōng-tè ê chhiú, chin thang kiaⁿ ah!

32

Lín tio̍h kì-tit chêng tit-tio̍h kng chiò liáu-āu, jím-siū hōan-lān ê tōa kau-chiàn hiah ê jı̍t;

33

he̍k-sī siū lóe-mē kan-khó͘, hō͘ lâng pìⁿ-lāng chòe hì-chhut; á-sī lâng siū chit hō ê kan-khó͘, lín ia̍h kap i ū hūn.

34

In-ūi lâng tī só-liān ê tiong-kan, lín bat thé-thiap i; lâng chhiúⁿ lín ê gia̍p, lín hoaⁿ-hí jím-siū, chai ka-kī ū koh khah hó kú-tn̂g tī-teh ê gia̍p.

35

Só͘-í bo̍h-tit khì-sak lín hó-táⁿ ê sim, in-ūi che ū tōa pò-siúⁿ.

36

Lín iàu-kín tio̍h thun-lún, hō͘ lín, í-keng kiâⁿ Siōng-tè ê chí-ì, āu-lâi thang siū só͘ èng-ún ê.

37

In-ūi koh tiap-á-kú nā-tiāⁿ, Hit ê teh-lâi-ê beh kàu, I bô beh iân-chhiân.

38

Nā-sī góa ê gī lâng beh tùi sìn lâi o̍ah: Siat-sú i kiu-ko̍eh, góa ê sim bô hoaⁿ-hí i.

39

Chóng-sī lán m̄ sī kiu-ko̍eh, tì-kàu tîm-lûn ê; sī ū sìn, tì-kàu lêng-hûn tit kiù ê.