Hi-pek-lâi 第 3 章 - 巴克禮全羅

1

Só͘-í lín chiah ê sèng ê hiaⁿ-tī, tâng tit-tio̍h thiⁿ tiàu ê, tio̍h chhim siūⁿ lán só͘ sêng-jīn chòe Sù-chiá, chòe Chè-si-thâu ê Iâ-so͘;

2

I chīn-tiong tī siat-lı̍p I ê, chhin-chhiūⁿ Mô͘-se tī Siōng-tè ê chôan ke chı̍t iūⁿ.

3

In-ūi I sǹg sī ōe kham-tit siū êng-kng iâⁿ-kè Mô͘-se chhin-chhiūⁿ kiàn-lı̍p ke ê, pí ke khah chun-kùi.

4

In-ūi ke lóng ū lâng kiàn-lı̍p i, to̍k-to̍k kiàn-lı̍p bān mı̍h ê chiū-sī Siōng-tè.

5

Koh Mô͘-se chòe lô͘-po̍k, kó-jiân chīn-tiong tī Siōng-tè ê chôan ke, lâi kan-chèng chiong-lâi beh thôan ê sū;

6

to̍k-to̍k Ki-tok chòe Kiáⁿ, tī-lí I ê ke; lán nā chip-siú tùi ǹg-bāng só͘ ū ê hó-táⁿ kap khoa-kháu, kian-kò͘ kàu bé, chiū chòe I ê ke.

7

Só͘-í, chhin-chhiūⁿ Sèng Sîn kóng: Kin-á-jı̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim, chhin-chhiūⁿ tī kek góa siū-khì ê sî, Tī khòng-iá chhì-thàm góa ê jı̍t.

8

9

Tī hia lín ê lia̍t-chó͘ giām lâi chhì góa, Koh le̍k-kè sì-cha̍p nî khòaⁿ-kìⁿ góa ê só͘ kiâⁿ.

10

Só͘-í góa bô hoaⁿ-hí hit tāi ê lâng, Kóng, In ê sim siông-siông sit-bê, M̄ bat góa chiah ê lō͘;

11

Góa chiū tī siū-khì tiong chiù-chōa, kóng, In tòan-tòan bōe tit thang jı̍p góa ê an-hioh.

12

Hiaⁿ-tī ah, lín tio̍h kín-sīn, kiaⁿ-liáu lín tiong-kan kiám-chhái ū lâng khǹg m̄ sìn ê pháiⁿ sim, lī-khui chin o̍ah ê Siōng-tè;

13

só͘-í lín tio̍h thàn iáu ū thang kiò chòe kin-á-jı̍t ê, jı̍t-jı̍t saⁿ khòan-bián; kiaⁿ-liáu lín tiong-kan ū-ê hō͘ chōe bê--khì, lâi ngī-sim:

14

in-ūi lán nā chhî-siú khí-thâu ê chhim sìn, kian-kò͘ kàu lō͘-bé, chiū ū hūn tī Ki-tok:

15

tng iáu teh kóng, Kin-á-jı̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim, chhin-chhiūⁿ tī kek góa siū-khì ê sî.

16

In-ūi thiaⁿ lâi kek siū-khì ê, sī chī-chūi ah? kiám m̄ sī tè Mô͘-se chhut Ai-kı̍p ê chèng lâng mah?

17

Siōng-tè sì-cha̍p nî kú só͘ bô hoaⁿ-hí ê sī chī-chūi ah? kiám m̄ sī hōan-chōe, sin-si tó tī khòng-iá ê lâng mah?

18

Siōng-tè chiù-chōa m̄ chún jı̍p I ê an-hioh ê, nā m̄ sī m̄ sìn-thàn ê lâng, sī chī-chūi ah?

19

Tùi án-ni khòaⁿ, in bōe ōe jı̍p, chiū-sī in-ūi m̄ sìn.