Hi-pek-lâi 第 4 章 - 巴克禮全羅

1

Só͘-í ū jı̍p I ê an-hioh ê èng-ún lâu-teh hō͘ lán, chiū tio̍h kiaⁿ-hiâⁿ, kiaⁿ-kìⁿ lín tiong-kan kiám-chhái ū lâng chhin-chhiūⁿ tit bô tio̍h.

2

In-ūi hok-im ū thôan hō͘ lán, chhin-chhiūⁿ thôan hō͘ in, chóng-sī só͘ thiaⁿ ê ōe bô lī-ek in, in-ūi thiaⁿ ê lâng bô ēng sìn kap tō-lí saⁿ-ha̍p.

3

In-ūi lán í-keng sìn ê, sī jı̍p chit ê an-hioh; chiàu I só͘ kóng, Góa chiū tī siū-khì tiong chiù-chōa kóng, In tòan-tòan bōe tit thang jı̍p góa ê an-hioh;kî-sı̍t chiah ê kang, tùi chhòng-sè-kan í-lâi, í-keng chiâⁿ lah.

4

In-ūi lūn-kàu tē chhit jı̍t, tī bó͘ só͘-chāi ū án-ni kóng, Siōng-tè tī tē chhit jı̍t bêng-pe̍k I lóng-chóng ê kang lâi an-hioh;

5

ia̍h tī chit só͘-chāi koh kóng, In tòan-tòan bōe tit-thang jı̍p góa ê an-hioh.

6

Só͘-í chit ê an-hioh iáu teh thèng-hāu ū lâng jı̍p, nā-sī hiah ê tāi-seng tit-tio̍h hok-im ê, in-ūi m̄ sìn-thàn, chiah bô jı̍p;

7

le̍k-kè chōe-chōe nî, tī Tāi-pı̍t ê chheh-lāi, I koh tēng chı̍t jı̍t, kóng, Kin-á-jı̍t, chhin-chhiūⁿ téng-bīn só͘ kóng, Kin-á-jı̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim.

8

In-ūi Iok-su-a nā bat ēng an-hioh siúⁿ-sù peh-sìⁿ, chiū āu-lâi tek-khak bô kóng-khí pa̍t jı̍t.

9

Tùi án-ni khòaⁿ, iáu ū an-hioh kā Siōng-tè ê peh-sìⁿ lâu-teh.

10

In-ūi jı̍p i ê an-hioh ê sī bêng-pe̍k i lóng-chóng ê kang lâi an-hioh,

11

chhin-chhiūⁿ Siōng-tè bêng-pe̍k I ê kang lâi an-hioh. Só͘-í lán tio̍h chīn-la̍t lâi jı̍p chit ê an-hioh, bián-tit ū lâng po̍ah-tó tī siāng hit iūⁿ ê m̄ sìn.

12

In-ūi Siōng-tè ê tō sī o̍ah ê, sī ū kong-hāu ê, pí it-chhè siang-bīn ê kiàm khah lāi, hōan-nā hûn kap sîn, kut-chat kap kut-chhé, bô m̄ chhì-jı̍p phòa-khui, sim-lāi chiah ê liām-thâu kap chú-ì ia̍h bô m̄ kàm-chhat.

13

Koh só͘ chhòng-chō ê, tī I ê bīn-chêng bô chı̍t hāng khàm-ba̍t: chiū-sī bān mı̍h hian-khui lō͘-chhut tī sím-phòaⁿ lán ê ê ba̍k-chêng.

14

Só͘-í lán í-keng ū tōa ê chè-si-thâu, Siōng-tè ê Kiáⁿ Iâ-so͘, keng-kè hiah ê thiⁿ, chiū tio̍h chip-siú só͘ sêng-jīn ê.

15

In-ūi lán só͘ ū ê chè-si-thâu m̄ sī bōe-ōe thé-thiap lán lóng-chóng ê lóan-jio̍k; chiū-sī hōan sū pîⁿ-pîⁿ ū siū chhì, nā-sī bô chōe.

16

Só͘-í lán tio̍h hó-táⁿ chiū-kūn un-tián ê chō-ūi, thang siū lîn-bín, iā tit-tio̍h un-tián, chòe kı̍p-sî ê pang-chān.