Hi-pek-lâi 第 5 章 - 巴克禮全羅

1

In-ūi tùi lâng ê tiong-kan só͘ kéng ê chè-si-thâu lóng sī ūi-tio̍h lâng, tī koan-hē Siōng-tè ê sū, lâi siat-lı̍p, thang ūi-tio̍h chōe-kòa hiàn lé-mı̍h kap chè-sū.

2

I kì-jiân hō͘ nńg-chiáⁿ só͘ ûi-khùn, chiah ōe thé-liōng m̄ chai-iáⁿ kap sit-bê ê lâng;

3

só͘-í i eng-kai in-ūi pún-sin, chhin-chhiūⁿ in-ūi peh-sìⁿ, ūi-tio̍h chōe lâi hiàn-chè.

4

Koh chit ê chun-kùi, m̄ sī lâng ka-kī chhú, chí ū hō͘ Siōng-tè tiàu ê, chhin-chhiūⁿ A-lûn chı̍t iūⁿ.

5

Chhin-chhiūⁿ án-ni, Ki-tok ia̍h m̄ sī ka-kī chun chòe chè-si-thâu, chiū-sī hit-ê tùi I kóng, Lí chiū-sī góa ê Kiáⁿ, Góa kin-á-jı̍t siⁿ lín ê.

6

Tī pa̍t ūi ia̍h kóng, Lí éng-óan chòe chè-si, Chiàu Be̍k-ki-sé-tek ê pan-lia̍t.

7

Ki-tok tī I tiàm jio̍k-thé ê jı̍t, ēng chhut-la̍t âu-kiò, koh lâu ba̍k-sái, hiàn kî-tó khún-kiû hō͘ hit ê ōe kiù I chhut sí ê, koh in-ūi I ê kèng-khiân tit-tio̍h thiaⁿ-kìⁿ,

8

sui-jiân chòe Kiáⁿ, ia̍h tùi só͘ siū chiah ê khó͘-lān lâi o̍h sūn-ho̍k;

9

í-keng chiâⁿ-chòe ôan-chôan, chiū chòe hōan-nā sūn-ho̍k I ê lâng éng-óan chín-kiû ê kun-gôan;

10

hō͘ Siōng-tè chheng I chòe chè-si-thâu, chiàu Be̍k-ki-sé-tek ê pan-lia̍t.

11

Lūn-kàu chit-ê, góan ū chōe-chōe ōe ài kóng, m̄ kú oh-tit kóe-bêng, in-ūi lín hī-khang tūn ê iân-kò͘.

12

In-ūi lūn-kàu sî ê kú, lín tio̍h ka-kī chòe sian-siⁿ, nā-sī iáu khiàm-ēng lâng chiong Siōng-tè ê ōe chiah ê siáu-ha̍k ê khí-thâu kà lín; koh chiâⁿ-chòe khiàm-ēng lin, bô khiàm-ēng ngó͘-kok.

13

Hōan-nā chia̍h lin ê, bô láu-liān gī ê tō-lí; in-ūi i sī eⁿ-á.

14

To̍k-to̍k tióng-sêng ê lâng chia̍h ngó͘-kok, in ê sim-khiàu tùi liān-sı̍p lâi liān-ta̍t, kàu ōe hun-piat hó pháiⁿ.