Hi-pek-lâi 第 6 章 - 巴克禮全羅

1

Só͘-í Ki-tok tō-lí ê chho͘-ha̍k, lán chhiáⁿ pàng-hē teh, lâi tì-ì chìn-pō͘ kàu ôan-chôan; bián koh hē tōe-ki, chiū-sī hóan-hóe lâi thoat-lī chiah ê sí-sí ê só͘ kiâⁿ, kap sìn Siōng-tè, chiah ê sóe ê lé-sò͘,

2

í-kı̍p hōaⁿ chhiú, sí lâng koh-o̍ah, kap éng-óan ê sím-phòaⁿ, chiah ê kàu-hùn.

3

Siōng-tè nā chún, góan chiū beh án-ni kiâⁿ.

4

In-ūi lâng í-keng bat tit-tio̍h kng chiò, siū-tio̍h thiⁿ-nı̍h ê un-sù, ū hūn tī Sèng Sîn,

5

koh siū-tio̍h Siōng-tè ê hó ōe, kap teh lâi ê sè-kài chiah ê kôan-lêng,

6

āu-lâi pōe-pōan, chiū bōe-ōe hō͘ in koh ōaⁿ-sin lâi hóan-hóe; in-ūi in ka-kī koh tèng Siōng-tè ê Kiáⁿ tī sı̍p-jī-kè, lâi hián-bêng lêng-jio̍k I.

7

In-ūi thó͘-tōe chia̍h-tio̍h ta̍uh-ta̍uh lo̍h ê hō͘-chúi, lâi siⁿ chhài-soe, ha̍p choh-sit lâng ê lō͘-ēng, chiū tit-tio̍h Siōng-tè sù hok;

8

nā-sī siⁿ chháu-chhì kap chı̍t-lê, chiū siū khì-sak, kūn tī siū chiù-chó͘, i ê kiat-kio̍k chiū-sī sio-lio-khì.

9

Só͘ thiàⁿ ê hiaⁿ-tī ah! góan sui-bóng án-ni kóng, nā-sī chhim sìn lín ta̍k hāng khah-iâⁿ che, koh sio̍k tī tit kiù;

10

in-ūi Siōng-tè m̄ sī bô kong-tō, lâi bōe kì-tit lín ê kang, kap lín ūi-tio̍h I ê miâ só͘ hián-bêng ê jîn-ài, in-ūi lín pêng-sò͘ ho̍k-sāi chiah ê sèng-tô͘, kàu taⁿ ia̍h ho̍k-sāi in.

11

Góa ài lín ta̍k lâng iû-gôan hián-chhut chit hō ê un-khûn, hō͘ lín ê ǹg-bāng móa-chiok kàu lō͘-bé:

12

hō͘ lín bô tì-kàu pîn-tōaⁿ, chiū-sī o̍h hiah ê tùi sìn kap thun-lún lâi sêng-chiap chiah ê èng-ún ê lâng.

13

Taⁿ Siōng-tè èng-ún A-pek-la̍h-hán ê sî, in-ūi bô khah tōa ê thang kí lâi chiù-chōa, chiū kí pún-sin lâi chiù-chōa kóng,

14

Góa sù-hok beh sù-hok lí, ke-thiⁿ beh ke-thiⁿ lí ê hō͘-è.

15

Chhin-chhiūⁿ án-ni, A-pek-la̍h-hán gâu thun-lún, chiū tit-tio̍h só͘ èng-ún ê.

16

In-ūi lâng sī kí khah tōa ê lâi chiù-chōa; ia̍h ēng chiù-chōa chòe saⁿ-chiⁿ ê kiat-bé, lâi koat-tiāⁿ i.

17

Án-ni, Siōng-tè ài beh kek-gōa hián-bêng I ê chí-ì bōe î-e̍k, hō͘ hiah ê sêng-chiap èng-ún ê lâng chai, chiah ēng chiù-chōa lâi chòe chèng-kìⁿ:

18

beh tùi nn̄g hāng bōe î-e̍k ê sū, Siōng-tè só͘ bōe-ōe pe̍h-chha̍t ê, hō͘ lán ū tōa-tōa ê an-ùi, chiū-sī lán í-keng tô-pī lâi khîⁿ só͘ hē tī thâu-chêng ê ǹg-bāng;

19

lán ūi chit ê ǹg-bāng, chhin-chhiūⁿ lêng-hûn ê tiàⁿ, pha tī tiùⁿ-lî lāi, kian-kò͘ bô î-sóa;

20

Iâ-so͘ chòe sian-hong, í-keng ūi-tio̍h lán jı̍p khì hia, chiâⁿ-chòe éng-óan ê Chè-si-tiúⁿ, chiàu Be̍k-ki-sé-tek ê pan-lia̍t.