Hi-pek-lâi 第 7 章 - 巴克禮全羅

1

In-ūi chit ê Be̍k-ki-sé-tek, chiū-sī Sat-léng ông, iā sī chì-kôaiⁿ Siōng-tè ê chè-si, chá tú-tio̍h A-pek-la̍h-hán thâi-iâⁿ chiah ê ông tò-lâi ê sî, kā i chiok-hok ê,

2

A-pek-la̍h-hán ia̍h chiong it-chhè só͘ tit-tio̍h ê, thiu cha̍p hūn chı̍t hō͘ i (i ê miâ hoan-e̍k chiū-sī gī ê Ông, koh sī Sat-léng Ông, chiū-sī pêng-an Ông;

3

i bô pē bô bú, bô sè-hē, bô sî-jı̍t ê khí-thâu, bô o̍ah-miā ê lō͘-bé, sī chhin-chhiūⁿ Siōng-tè ê Kiáⁿ) kú-tn̂g teh chòe chè-si.

4

Chhì-siūⁿ sian-chó͘ A-pek-la̍h-hán chiong só͘ tit-tio̍h siōng-téng ê mı̍h, thiu cha̍p hūn chı̍t hō͘ i, chiū hit lâng chun-kùi kàu cháiⁿ-iūⁿ,

5

Taⁿ Lī-bī ê kiáⁿ-sun tam-tng chè-si ê chit ê, sui-jiân kap peh-sìⁿ lóng sī A-pek-la̍h-hán ê hō͘-è, pîⁿ-pîⁿ sī hiaⁿ-tī, iáu-kú hōng bēng-lēng, chiàu lu̍t-hoat tùi peh-sìⁿ the̍h cha̍p hūn chı̍t;

6

chóng-sī hit ê bô sio̍k Lī-bī ê sè-hē ê, bat tùi A-pek-la̍h-hán the̍h cha̍p hūn chı̍t, koh kā tit-tio̍h chiah ê èng-ún ê chiok-hok.

7

To̍k-to̍k sī-sòe hō͘ sī-tōa chiok-hok, che sī bô thang piān-pok.

8

Taⁿ tī chia the̍h cha̍p hūn chı̍t ê, lóng sī ōe sí ê lâng; nā-sī tī hia sī hit-ê ū siū kan-chèng kóng, i sī o̍ah ê.

9

Koh iā ōe kóng-tit, liân the̍h cha̍p hūn chı̍t ê Lī-bī iā bat chāi-tī A-pek-la̍h-hán lâi la̍p cha̍p hūn chı̍t;

10

in-ūi Be̍k-ki-sé-tek tú-tio̍h A-pek-la̍h-hán ê sî, Lī-bī iáu-kú tī in chó͘ ê sin-khu.

11

Chá peh-sìⁿ siū lu̍t-hoat, sī tī Lī-bī cho̍k chè-si ê chit-jīm ē; nā tùi i ōe tit-tio̍h ôan-chôan, chiū mih-sái lēng-gōa koh heng-khí chı̍t ê chè-si, chiàu Be̍k-ki-sé-tek ê pan-lia̍t, bô kóng chiàu A-lûn ê pan-lia̍t ah?

12

In-ūi chè-si ê chit í-keng kóe-ōaⁿ, chiū lu̍t-hoat ia̍h tek-khak tio̍h kóe-ōaⁿ.

13

In-ūi chiah ê ōe só͘ chí ê, sī sio̍k tī pa̍t ê chi-phài, in tiong-kan bē bat ū lâng kun-sûi tī chè-tôaⁿ.

14

Sī lán ê Chú bêng-bêng tùi Iû-tāi chhut; lūn chit ê chi-phài, Mô͘-se bē bat thê-khí chè-si ê chit.

15

Koh nā chiàu Be̍k-ki-sé-tek ê khóan-sit, ū heng-khí pa̍t ê chè-si;

16

m̄ sī chiàu jio̍k-thé kài-bēng ê hoat lâi siat-lı̍p, sī chiàu bōe húi-hōai ê o̍ah-miā ê kôan-lêng, chiū téng-bīn só͘ kóng ê lí chám-jiân khah bêng.

17

In-ūi ū kan-chèng I kóng, Lí éng-éng chòe chè-si, Chiàu Be̍k-ki-sé-tek ê pan-lia̍t.

18

In-ūi chêng ê kài-bēng hòe-bô, sī ūi-tio̍h i ê lóan-jio̍k kap bô lī-ek,

19

(in-ūi lu̍t-hoat bô chòe chı̍t hāng kàu ôan-chôan) chiah siat-lı̍p koh khah hó ê ǹg-bāng, chiū-sī lán só͘ tùi i lâi chhin-kūn Siōng-tè ê.

20

Koh in-ūi I m̄ sī bô tùi chiù-chōa lâi siat-lı̍p;

21

(in hiah-ê lı̍p chòe chè-si bô tùi chiù-chōa; to̍k-to̍k chit-ê chiū tùi chiù-chōa, in-ūi siat-lı̍p I ê ū kā I kóng, Chú chiù-chōa, bô thè-hóe, Lí éng-éng chòe chè-si:)

22

Chhin-chhiūⁿ án-ni, Iâ-so͘ chòe koh khah hó ê iok ê pó-jīn.

23

Hiah ê chòe chè-si ê, in-ūi hō͘ sí chó͘-keh, bōe-ōe kú-tn̂g, só͘-í tio̍h chin chōe lâng;

24

to̍k-to̍k chit-ê, in-ūi éng-éng tī-teh, ū bōe kóe-ōaⁿ ê chè-si chit.

25

Só͘-í hōan-nā tùi I chiū-kūn Siōng-tè ê lâng, I ōe kiù in kàu ôan-chôan, in-ūi I tn̂g-tn̂g o̍ah, lâi thòe in kî-kiû.

26

In-ūi chit hō ê chè-si-thâu ha̍p lán ê khiàm-ēng; I sī sèng, bô pháiⁿ, bô lâ-sâm, lī-khui chōe-jîn, chiâⁿ-chòe khah kôaiⁿ chiah ê thiⁿ;

27

I m̄ bián chhin-chhiūⁿ hiah ê chè-si-thâu, tio̍h jı̍t-jı̍t tāi-seng ūi-tio̍h ka-kī ê chōe, āu-lâi ūi-tio̍h peh-sìⁿ ê chōe, lâi hiàn-chè; in-ūi I hiàn pún-sin, chiū chòe chı̍t-ē chiâⁿ chit ê sū.

28

In-ūi lu̍t-hoat siat-lı̍p nńg-chiáⁿ ê lâng chòe chè-si-thâu; to̍k-to̍k lu̍t-hoat āu chiù-chōa ê ōe siat-lı̍p Kiáⁿ, éng-óan chòe ôan-chôan ê chè-si-thâu.