Hi-pek-lâi 第 8 章 - 巴克禮全羅

1

Taⁿ góan só͘ kóng kî-tiong tē it iàu-kín ê, chiū-sī lán ū chhin-chhiūⁿ chit hō ê chè-si-thâu, í-keng chē tī thiⁿ-téng tōa ui-giâm ê pó-chō ê tōa pêng,

2

I chòe sèng-só͘ kap chin ê hōe-bō͘ ê chhe-ēng, chit ê hōe-bō͘ sī Chú só͘ siat ê, m̄ sī lâng só͘ siat ê.

3

Hōan-nā chè-si-thâu lóng ūi-tio̍h hiàn lé-mı̍h kap chè-sū lâi siat-lı̍p: só͘-í chit ê chè-si-thâu ia̍h tek-khak tio̍h ū só͘ hiàn.

4

Siat-sú I tī tōe-nı̍h, chiū bô chòe chè-si, in-ūi í-keng ū chiàu lu̍t-hoat teh hiàn lé-mı̍h ê;

5

in só͘ ēng lâi ho̍k-sāi ê, chiū-sī thiⁿ-nı̍h ê mı̍h ê siōng kap iáⁿ; chhin-chhiūⁿ Mô͘-se beh chō hōe-bō͘ ê sî, siū-tio̍h bēng-lēng, kóng, Lí tio̍h kín-sīn, chiàu tī soaⁿ-téng só͘ chí-sī lí ê khóan-sit, lâi chō ta̍k hāng mı̍h.

6

Taⁿ Iâ-so͘ í-keng tit-tio̍h khah chun-kùi ê chit, sī I chòe koh khah hó ê iok ê tiong-pó, chiū-sī ēng koh khah hó ê èng-ún lâi siat-lı̍p ê.

7

In-ūi thâu chı̍t ê iok nā bô thang hiâm, chiū bô siūⁿ beh lı̍p tē jī ê iok.

8

In-ūi ū hiâm in, chiū kóng, Chú kóng, Lí khòaⁿ, sî-jı̍t beh kàu, Góa beh kap Í-sek-lia̍t ke, í-kı̍p Iû-tāi ke, sêng-lı̍p sin ê iok;

9

M̄ sī chiàu góa kap in lia̍t-chó͘ só͘ lı̍p ê iok, Chiū-sī tī khan in ê chhiú, chhōa in chhut Ai-kı̍p tōe ê sî, só͘ lı̍p ê; In-ūi in bô siông-siông siú góa ê iok, Góa iā bô khòaⁿ-kò͘ in: che sī Chú só͘ kóng ê.

10

Chú koh kóng, Chiah ê jı̍t liáu-āu, Góa kap Í-sek-lia̍t ke só͘ beh lı̍p ê iok sī chit-ê, Chiū-sī góa beh chiong góa ê lu̍t-hoat hē tī in ê thâu-náu, Khek tī in ê sim: Góa beh chòe in ê Siōng-tè, In beh chòe góa ê peh-sìⁿ:

11

In ta̍k lâng chiong-lâi bô kà-sī in pún siâⁿ ê peh-sìⁿ, Kap in ta̍k lâng ê hiaⁿ-tī, kóng, Lí tio̍h bat Chú: In-ūi tùi sòe kàu tōa, in lóng beh bat góa.

12

In-ūi góa beh lîn-bín in ê put-gī, Bô koh kì-liām in ê chōe-ok.

13

Kì-jiân ū kóng sin-ê, chiū-sī hō͘ chêng ê iok chòe kū. Hōan-nā kū lâi soe-thè ê chiū-sī chiong-kūn bô-khì.